Galásia 1:1-24
1 Haʼu Paulo, neʼebé sai apóstolu ida laʼós tanba ema mak hili no laʼós liuhusi ema ida, maibé liuhusi Jesus Kristu+ no Aman Maromak,+ neʼebé fó moris-hiʼas fali ba Kristu husi mate,
2 haʼu no maun-alin hotu neʼebé hamutuk ho haʼu mak hakerek ba kongregasaun* sira iha Galásia:
3 Haʼu harohan katak ita-nia Aman Maromak no Naʼi Jesus Kristu sei hatudu laran-diʼak neʼebé boot no haraik dame ba imi.
4 Kristu fó nia moris tanba ita-nia sala+ atu nuneʼe nia bele salva ita husi tempu* aat neʼe+ hodi tuir ita-nia Maromak no Aman nia hakarak.+
5 Haʼu hein katak Maromak sei simu glória tinan ba tinan nafatin. Amen.
6 Haʼu hakfodak tanba imi lalais atu fila kotuk ba* Ida neʼebé bolu imi liuhusi Kristu nia laran-diʼak neʼebé boot, hodi simu fali liafuan diʼak seluk.+
7 Tuir loloos la iha liafuan diʼak seluk, maibé iha ema balu neʼebé hamosu problema+ ba imi no hakarak atu halo kleʼuk liafuan diʼak kona-ba Kristu.
8 Maibé, se ami ka anju ida husi lalehan fó sai ba imi liafuan diʼak neʼebé la hanesan ho liafuan diʼak neʼebé ami fó sai ona ba imi, husik nia hetan malisan bá.
9 Hanesan ami dehan tiha ona, agora haʼu mós dehan fali: Ema naran deʼit neʼebé fó sai ba imi liafuan diʼak neʼebé la hanesan liafuan diʼak neʼebé imi simu ona, husik nia hetan malisan bá.
10 Tuir loloos, agora haʼu buka atu halo kontente ema ka Maromak? Se haʼu nafatin buka atu halo kontente ema, haʼu laʼós Kristu nia atan.
11 Maun-alin sira, haʼu hakarak imi hatene katak liafuan diʼak neʼebé haʼu fó sai ona ba imi laʼós husi ema,+
12 tanba haʼu la simu ida-neʼe husi ema, no laʼós ema mak hanorin haʼu, maibé Jesus Kristu rasik mak fó sai ida-neʼe.
13 Imi rona tiha ona kona-ba haʼu-nia hahalok uluk nian bainhira haʼu sei tuir relijiaun Judeu nian,+ katak haʼu kontinua fó-terus makaʼas* ba Maromak nia kongregasaun no koko atu halakon kongregasaun neʼe.+
14 Iha relijiaun Judeu nian haʼu laʼo ba oin diʼak liu fali ema barak neʼebé idade hanesan haʼu iha haʼu-nia nasaun, tanba haʼu laran-manas liu atu halo tuir haʼu-nia beiʼala sira-nia lisan.+
15 Maibé Maromak, neʼebé halo haʼu moris* no bolu haʼu liuhusi ninia laran-diʼak neʼebé boot,+ nia hanoin katak diʼak
16 atu hatudu sai ninia Oan liuhusi haʼu, atu nuneʼe haʼu bele fó sai liafuan diʼak kona-ba nia ba nasaun sira.+ Kuandu nia hili haʼu, haʼu la husu kedas konsellu husi ema ruma,
17 no haʼu mós la saʼe ba Jeruzalein atu hasoru sira neʼebé sai apóstolu uluk liu haʼu, maibé haʼu bá rai-Arábia, no tuirmai haʼu fila fali ba Damasku.+
18 Liutiha tinan tolu, haʼu saʼe ba Jeruzalein+ atu vizita Cefas,*+ no haʼu hela ho nia ba loron 15.
19 Maibé haʼu la hasoru apóstolu sira seluk, só hasoru deʼit Naʼi nia alin Tiago.+
20 Agora haʼu hatete ba imi iha Maromak nia oin katak buat sira neʼebé haʼu hakerek ba imi laʼós bosok.
21 Depois neʼe, haʼu bá área sira iha Síria no Silísia.+
22 Maibé kongregasaun sira iha Judeia neʼebé ida deʼit ho Kristu, la koñese haʼu.
23 Sira rona deʼit ema seluk dehan: “Mane neʼebé uluk fó-terus ba ita+ agora fó sai liafuan diʼak kona-ba fiar neʼebé uluk nia koko atu halakon.”+
24 Tan neʼe, sira hahú fó glória ba Maromak tanba haʼu.
Nota-rodapé
^ Ka “atu hadook an husi”.
^ Orj., “fó-terus barak liu”.
^ Ka “Ida neʼebé haketak ona haʼu husi haʼu-nia inan nia knotak”.
^ Ninia naran seluk mak Pedro.
