Terseiru João 1:1-14
1 Haʼu, nuʼudar katuas ida,* haʼu hakerek ba haʼu-nia maluk doben Gaio neʼebé haʼu hadomi tebes.
2 Haʼu-nia maluk doben, haʼu harohan katak ó sempre iha saúde diʼak no buat hotu iha ó-nia moris sempre laʼo ho diʼak hanesan agora daudaun.
3 Tanba haʼu haksolok tebes bainhira maun-alin sira mai no fó sasin katak ó kaer metin ba lia-loos, no ó kontinua laʼo iha lia-loos neʼe.+
4 La iha buat ida neʼebé halo haʼu haksolok* liu fali ida-neʼe: katak haʼu rona haʼu-nia oan sira kontinua laʼo iha lia-loos.+
5 Haʼu-nia maluk doben, ó hatudu ó-nia laran-metin iha buat sira neʼebé ó halo ba maluk fiar-naʼin sira, maski ó la koñese sira.+
6 Sira fó sasin ona iha kongregasaun* nia oin kona-ba ó-nia domin. Favór ida, ajuda sira iha dalan neʼebé halo Maromak kontente kuandu sira husik hela ó-nia fatin hodi kontinua sira-nia viajen.+
7 Sira bá atu haklaken tanba Maromak nia naran, hodi la hein atu simu buat ida+ husi nasaun sira.*
8 Tan neʼe, ita iha obrigasaun atu simu ema hanesan neʼe ho laran-diʼak,*+ atu nuneʼe ita bele sai nuʼudar maluk serbisu-naʼin iha lia-loos.+
9 Haʼu hakerek ona karta ba kongregasaun, maibé Diótrefes, neʼebé hakarak atu hetan pozisaun primeiru iha sira-nia leet,+ lakohi simu ami-nia liafuan ho respeitu.+
10 Tan neʼe se haʼu bá vizita imi, haʼu sei hatudu sai buat neʼebé nia halo, tanba nia habelar liafuan aat oioin kona-ba ami.*+ Nia la kontente deʼit ho buat sira-neʼe, nia mós lakohi simu maun-alin sira+ ho respeitu. No kona-ba ema sira neʼebé hakarak simu maun-alin sira-neʼe, Diótrefes koko atu hanetik no hasai sira husi kongregasaun.
11 Haʼu-nia maluk doben, keta halo tuir hahalok neʼebé aat, maibé halo tuir hahalok neʼebé diʼak.+ Ema neʼebé halo diʼak mai husi Maromak.+ Ema neʼebé halo aat seidauk koñese Maromak.+
12 Maun-alin sira hotu koʼalia diʼak kona-ba Demétrio nia hahalok diʼak no nia moris tuir lia-loos. Tuir loloos, ami mós fó sasin kona-ba nia, no ó hatene katak ami-nia sasin mak loos.
13 Haʼu iha buat barak atu hakerek ba ó, maibé haʼu lakohi hakerek tan ba ó ho tinta no lapizeira.
14 Tanba haʼu hein katak lakleur tan haʼu sei bá vizita ó, no ita sei koʼalia oin ba oin.
Haʼu harohan katak ó hetan dame.
Belun sira haruka sira-nia kumprimentus ba ó. Fó haʼu-nia kumprimentus ba belun sira ida ba ida.
Nota-rodapé
^ Ka “katuas kongregasaun”.
^ Ka karik “agradese”.
^ Karik neʼe refere ba nasaun sira neʼebé laʼós ema Judeu no la fiar Kristu.
^ Ka “atu tau matan ba ema hanesan neʼe”.
^ Orj., “nia koʼalia kona-ba ami ho liafuan aat”.
