Segundu João 1:1-13
1 Haʼu, nuʼudar katuas ida,* haʼu hakerek ba feto neʼebé Maromak hili ona, no ba ninia oan sira, neʼebé haʼu hadomi tebes, no laʼós haʼu deʼit, maibé mós sira hotu neʼebé hatene ona lia-loos.
2 Ami hadomi imi tanba lia-loos neʼebé hela iha ita-nia laran no sei hamutuk nafatin ho ita.
3 Aman Maromak no mós ninia Oan-Mane, Jesus Kristu, sei fó lia-loos no domin ba ita. Sira sei hatudu laran-diʼak neʼebé boot, laran-sadiʼa, no fó dame ba ita.
4 Haʼu haksolok tebes tanba haʼu hatene katak ó-nia oan balu laʼo iha lia-loos,+ hodi tuir ukun-fuan neʼebé ita simu ona husi Aman.
5 Entaun agora, haʼu hakerek ba ó feto neʼebé Maromak hili ona, haʼu husu ó laʼós atu halo tuir ukun-fuan foun ida, maibé halo tuir ukun-fuan neʼebé ita simu ona horiuluk kedas, neʼe mak ita tenke hadomi malu.+
6 No domin signifika katak ita kontinua moris tuir ninia ukun-fuan sira.+ Hanesan imi rona ona horiuluk kedas, ninia ukun-fuan mak imi tenke kontinua hadomi malu.
7 Tanba lohidór barak mosu ona iha mundu,+ no sira la rekoñese katak Jesus Kristu mai ona nuʼudar ema.*+ Sira mak lohidór no Kristu nia inimigu.*+
8 Kuidadu imi-nia an bá, atu nuneʼe imi la halakon rezultadu husi ami-nia hakaʼas an iha imi-nia leet, maibé atu imi hetan kolen tomak husi Maromak.+
9 Ema hotu neʼebé hakat liu Kristu nia hanorin no la hela iha hanorin neʼe, nia laʼós ida deʼit ho Maromak.+ Maibé, ema neʼebé hela nafatin iha hanorin neʼe mak ema neʼebé ida deʼit ho Aman no mós Oan-Mane.+
10 Se ema ruma bá vizita imi no la lori hanorin neʼe, imi keta simu nia iha imi-nia uma+ no keta kumprimenta nia.
11 Tanba ema neʼebé kumprimenta nia hola parte iha ninia hahalok aat sira.
12 Maski haʼu iha buat barak atu hakerek ba imi, maibé haʼu lakohi halo nuneʼe ho surat-tahan no tinta, tanba haʼu hein katak haʼu sei bá vizita imi no koʼalia ba imi oin ba oin, atu nuneʼe imi-nia ksolok bele sai kompletu.
13 Kona-ba ó-nia biin neʼebé Maromak hili ona, ninia oan sira haruka sira-nia kumprimentus ba ó.
