Primeiru Krónikas 20:1-8
20 Bainhira tinan foin komesa,* katak tempu neʼebé liurai sira baibain bá atu halo funu, Joab+ dirije tropa sira atu bá funu no sira harahun ema Ammon nia rai. Depois neʼe, nia mai no halo serku ba sidade Rabá,+ maibé David hela iha Jeruzalein.+ Joab ataka Rabá no harahun sidade neʼe.+
2 Tuirmai David foti Malkam* nia koroa husi Malkam nia ulun. Osan-mean iha koroa neʼe todan kilograma 34 ho grama 200* no iha mós fatuk-murak oioin, no David tau koroa neʼe iha ninia ulun. Nia mós foti sasán barak husi sidade neʼe.+
3 Nia lori sai povu sira husi sidade laran no haruka sira halo serbisu+ atu fera fatuk, no sira mós halo serbisu hodi uza baliu no sasán kroʼat oioin husi besi. Neʼe mak buat neʼebé David halo ba ema Ammon nia sidade sira hotu. Ikusmai David no ninia tropa hotu fila fali ba Jeruzalein.
4 Depois neʼe, funu entre ema Izraél ho ema Filístia akontese iha Gezer. Iha tempu neʼebá mak Sibekai+ ema Husa oho Sipai, neʼebé mak ema Refaim nia jerasaun,+ no ema Filístia lakon funu.
5 No dala ida tan funu akontese ho ema Filístia, no Jair nia oan-mane Elanan oho Lami. Lami mak Golias+ ema Gat nia alin-mane neʼebé lori diman boot hanesan ai neʼebé ema uza atu soru hena.+
6 Funu akontese dala ida tan iha Gat,+ no iha neʼebá iha mane ida neʼebé isin-boot tebes,+ no ninia liman-fuan 6 iha liman ida-idak no ain-fuan 6 iha ain ida-idak, entaun ninia liman-fuan no ain-fuan hamutuk 24. Nia mós ema Refaim nia jerasaun.+
7 Nia kontinua sadik+ ema Izraél. Entaun David nia maun Simeia+ nia oan-mane Jonatan oho ema neʼe.
8 Mane sira-neʼe mak ema Refaim+ nia jerasaun iha Gat,+ no sira mate iha David no ninia atan sira-nia liman.
