Éfeso 6:1-24
6 Oan sira, halo tuir imi-nia inan-aman+ bá hodi tuir Naʼi nia hakarak, tanba ida-neʼe mak hahalok loos.
2 “Hatudu respeitu ba imi-nia inan-aman”,+ ida-neʼe mak ukun-fuan primeiru neʼebé fó sai hamutuk ho promesa ida neʼebé dehan:
3 “Atu imi bele hetan buat diʼak* no imi bele moris naruk iha rai.”
4 No aman sira, keta halo imi-nia oan sai laran-hirus,+ maibé kontinua haboot sira ho dixiplina+ no ho hanorin* neʼebé tuir Jeová* nia hakarak.+
5 Atan sira, halo tuir imi-nia patraun iha rai,+ ho taʼuk no nakdedar no ho laran-moos, hanesan imi hatudu ba Kristu,
6 laʼós deʼit kuandu ema seluk haree imi, hodi halo kontente ema,+ maibé halo tuir sira hanesan imi halo tuir Maromak nia hakarak ho laran tomak nuʼudar Kristu nia atan.+
7 Serbí imi-nia naʼi ho hanoin neʼebé diʼak, hanesan imi halo ba Jeová,*+ laʼós ba ema,
8 tanba imi hatene katak buat diʼak hotu neʼebé ema ida-idak halo, nia sei simu fali husi Jeová,*+ maski nia mak atan ka ema livre.
9 No mós imi naʼi sira, halo nuneʼe mós ba imi-nia atan sira, keta ameasa sira, tanba imi hatene katak sira-nia Naʼi no imi-nia Naʼi mak iha lalehan,+ no nia la todan ba sorin.
10 Ikusliu, kontinua hakaʼas an atu hetan kbiit+ husi Naʼi liuhusi ninia forsa boot.
11 Uza kompletu ekipamentu funu nian+ husi Maromak atu nuneʼe imi bele hamriik metin hodi kontra Diabu nia lasu* sira,
12 tanba ita halo funu*+ laʼós kontra raan no isin, maibé kontra governu sira, kontra sira neʼebé iha podér, kontra ukun-naʼin sira iha mundu neʼebé nakukun no kontra anju aat sira+ iha lalehan.
13 Tan razaun neʼe, uza kompletu ekipamentu funu nian husi Maromak,+ atu imi bele tahan iha loron neʼebé aat, no bainhira imi kumpre tiha ona buat hotu, imi bele hamriik metin.
14 Tan neʼe, hamriik metin bá, hodi kesi metin sintu lia-loos nian iha imi-nia knotak,+ no halo hahalok loos hanesan taka imi-nia hirus-matan ho besi,+
15 no sai prontu atu haklaken liafuan diʼak dame nian hanesan uza sapatu iha imi-nia ain.+
16 Laʼós neʼe deʼit, imi mós tenke lori eskudu* boot fiar nian,+ hodi imi bele hamate rama-oan hotu neʼebé lakan ho ahi husi aat-naʼin.*+
17 No mós taka kapasete salvasaun nian,+ no lori surik espíritu nian, neʼe katak Maromak nia liafuan.+
18 Iha tempu hanesan, halo orasaun+ no harohan iha dalan oioin, kontinua halo orasaun iha situasaun hotu ho espíritu.+ Matan-moris nafatin bá, harohan beibeik hodi hanoin ema santu* hotu nia diʼak.
19 No mós harohan atu Maromak bele fó liafuan mai haʼu bainhira haʼu loke haʼu-nia ibun, atu nuneʼe haʼu bele koʼalia ho aten-brani atu halo ema hatene segredu santu husi liafuan diʼak.+
20 Haʼu fó sai liafuan diʼak neʼe nuʼudar Maromak nia embaixadór+ neʼebé iha dadur laran. Halo orasaun atu haʼu bele koʼalia ida-neʼe ho aten-brani, tanba haʼu tenkesér koʼalia kona-ba neʼe.
21 Ita-nia maluk doben Tíkiko+ neʼebé nuʼudar serbisu-naʼin ida neʼebé laran-metin iha Naʼi, nia sei fó sai ba imi buat hotu kona-ba haʼu no kona-ba haʼu-nia situasaun atu imi bele hatene.+
22 Tan razaun neʼe mak haʼu haruka nia ba imi, atu imi bele hatene ami-nia situasaun no atu nia bele halo imi-nia laran sente kmaan.
23 Haʼu harohan atu maun-alin sira bele iha dame no domin hamutuk ho fiar husi Aman Maromak no Naʼi Jesus Kristu.
24 Haʼu mós harohan katak Maromak nia laran-diʼak neʼebé boot hamutuk ho sira hotu neʼebé hadomi ita-nia Naʼi Jesus Kristu ho domin neʼebé nunka lakon.
Nota-rodapé
^ Ka “moris diʼak”.
^ Ka “no fó matadalan”. Orj., “tau neon”.
^ Ka “planu aat”.
^ Orj., “ita luta”.
^ Neʼe mak ai belar ka buat toos neʼebé soldadu sira kaer iha sira-nia liman hodi proteje an bainhira funu.
^ Neʼe katak Satanás.
^ Haree “Ema santu” iha Glosáriu.
