Éfeso 4:1-32
4 Tan neʼe, haʼu neʼebé dadur+ tanba Naʼi, haʼu husu ba imi atu moris ho loloos+ nuʼudar ema neʼebé Maromak hili ona,
2 atu sempre hatudu haraik an,+ laran-maus, pasiénsia,+ tahan malu ho domin,+
3 hakaʼas an atu kaer metin nafatin unidade neʼebé imi hetan ona liuhusi espíritu* hodi moris iha dame laran.+
4 Iha isin-lolon ida deʼit+ no espíritu* ida deʼit,+ nuneʼe mós Maromak bolu ona imi ba esperansa ida deʼit.+
5 Iha Naʼi ida deʼit,+ fiar ida deʼit, batizmu* ida deʼit.
6 Iha Maromak no Aman ida deʼit ba ema hotu. Nia aas liu buat hotu, nia uza ita hotu atu halaʼo ninia hakarak, no ninia kbiit book an iha ita hotu.
7 Maromak fó ninia laran-diʼak neʼebé boot ba ita ida-idak tuir dalan neʼebé Kristu fahe prezente neʼebé la presiza selu.+
8 Tanba Eskritura dehan: “Kuandu nia saʼe ona ba leten, nia lori tiha dadur sira; nia fó mane sira nuʼudar prezente.”+
9 Liafuan “nia saʼe ona ba leten” katak sá? Neʼe katak nia mós tun ona ba kraik, ba mundu, loos ka lae?
10 Ida neʼebé tun ona ba kraik, nia mós saʼe ona ba leten+ toʼo aas liu fali lalehan,+ hodi nuneʼe nia bele halo buat hotu sai kompletu.
11 Nia fó ema balu nuʼudar apóstolu,+ balu nuʼudar profeta,+ balu nuʼudar haklaken-naʼin kona-ba liafuan diʼak,+ balu nuʼudar bibi-atan no mestre,+
12 atu bele ajuda ema santu* sira laʼo tuir dalan loos,* atu serbí ema seluk, no atu hametin Kristu nia isin-lolon+
13 toʼo ita hotu sai ida deʼit iha fiar no hetan koñesimentu neʼebé loos kona-ba Maromak nia Oan-Mane, atu sai hanesan ema boot,*+ neʼe katak sai maduru hanesan ho Kristu.
14 Ita labele tan sai hanesan labarik kiʼik hodi tuir deʼit ema lohidór sira-nia hanorin sala oioin,+ no tuir deʼit lia-bosok neʼebé ho laran-makerek, atu ita la sai hanesan ró iha tasi laran neʼebé anin no laloran baku bá-mai.
15 Maibé, ita tenke koʼalia lia-loos no hatudu domin, atu nuneʼe ita bele sai boot iha buat hotu hodi sai hanesan Kristu, ita-nia ulun.+
16 Liuhusi nia mak parte ida-idak iha isin-lolon tomak+ tutan hamutuk ho didiʼak no apoia malu hodi fó buat neʼebé isin presiza. Kuandu parte ida-idak halo ninia serbisu ho loloos, ida-neʼe ajuda isin-lolon atu sai boot hodi isin-lolon tomak sai metin iha domin.+
17 Tan neʼe, haʼu koʼalia no fó sasin hodi Naʼi nia naran katak imi labele kontinua moris hanesan nasaun sira,+ tanba sira moris tuir deʼit sira-nia hanoin neʼebé folin-laek.*+
18 Sira-nia neon iha nakukun laran, sira dook husi moris neʼebé mai husi Maromak, tanba sira la hatene Maromak no sira laran-toos.
19 Sira la hatene morál neʼebé loos, no sira entrega sira-nia an hodi halo hahalok aat toʼo la sente moe*+ no ho kaan-teen halo hahalok oioin neʼebé la moos.
20 Maibé imi aprende ona katak Kristu la hanesan neʼe,
21 naran katak imi rona ona nia no simu hanorin, hodi tuir lia-loos neʼebé Jesus hanorin.
22 Imi simu ona hanorin katak imi tenke hasai tiha hahalok tuan,*+ katak imi-nia moris uluk nian, tanba hahalok tuan neʼe sai aat ba beibeik hodi tuir imi-nia hakarak aat neʼebé lohi imi.+
23 No imi tenke kontinua hafoun imi-nia dalan atu hanoin,*+
24 no imi tenke tau hahalok foun nuʼudar imi-nia roupa,+ katak hahalok foun neʼebé Maromak kria tuir ninia hakarak. Hahalok neʼe mak hahalok loos no laran-metin.
25 Neʼe duni, tanba agora imi husik ona hahalok bosok hotu, imi ida-idak tenke koʼalia lia-loos ba malu,+ tanba ita mak liman-ain husi isin-lolon ida.+
26 Se imi hirus karik, keta halo sala.+ Keta husik loro-matan tun bainhira imi sei hirus hela.+
27 Keta fó oportunidade* ba Diabu.+
28 Ema neʼebé naʼok keta naʼok tan, maibé nia tenke halo serbisu makaʼas. Nia tenke halo serbisu neʼebé diʼak ho ninia liman,+ atu nuneʼe nia iha buat ruma atu fahe ba ema neʼebé presiza.+
29 Keta husik liafuan aat sai husi imi-nia ibun,+ maibé koʼalia deʼit buat neʼebé diʼak atu hametin ema seluk, atu bele fó benefísiu ba sira neʼebé rona.+
30 No mós, keta halo Maromak nia espíritu santu triste,*+ tanba liuhusi espíritu neʼe mak Maromak tau sinál*+ ba imi toʼo loron neʼebé imi sai livre husi imi-nia isin liuhusi Jesus nia sakrifísiu.+
31 Hasai tiha husi imi-nia an hahalok odi malu,+ hirus, laran-nakali, hakilar malu, koʼalia aat,+ no mós buat hotu neʼebé hakanek malu.+
32 Maibé hatudu laran-diʼak ba malu, hanoin malu,+ perdua malu ho laran hanesan Maromak mós fó perdua ho laran ba imi liuhusi Kristu.+
Nota-rodapé
^ Haree “Pneuma” iha Glosáriu.
^ Haree “Pneuma” iha Glosáriu.
^ Haree “Ema santu” iha Glosáriu.
^ Ka “hetan treinu”.
^ Ka “maduru”.
^ Ka “saugati deʼit; neon mamuk”.
^ Orj., “hasai tiha ema tuan”.
^ Ka “hafoun forsa neʼebé book imi-nia neon”. Orj., “hafoun espíritu iha imi-nia neon”. Haree “Pneuma” iha Glosáriu.
^ Ka “fatin”.
^ Ka “laran-susar”.
