•  Bíblia nia resposta

•  Oinsá mak virjen ida bele tuur-ahi?

•  Tanbasá Jesus tenke moris mai liuhusi virjen ida?

•  Maria nafatin virjen ka lae?

•  Jesus neʼebé moris mai husi virjen Maria mak hanesan ho doutrina Imaculada Conceição ka lae?

•  Ita presiza iha hanoin saida kona-ba Maria?

 Bíblia hatete katak Maria, Jesus nia inan, hetan priviléjiu neʼebé úniku atu tuur-ahi ba Jesus kuandu nia sei virjen hela. Bíblia fó sai nanis kona-ba milagre neʼe iha livru Isaias no esplika fali oinsá ida-neʼe sai loos iha Evanjellu Mateus no Lucas.

 Isaias hakerek profesia ida kona-ba Mesias nia moris, hodi dehan: “Haree bá! Feto joven ida sei sai isin-rua no tuur-ahi oan-mane ida.” (Isaias 7:14) Jeová dirije Mateus neʼebé hakerek Evanjellu ida atu liga Isaias nia profesia ho Maria neʼebé isin-rua. Depois konta tiha kona-ba Maria neʼebé sai isin-rua liuhusi milagre, Mateus hatete: “Buat hotu neʼe akontese duni hodi kumpre Jeová nia liafuan neʼebé nia fó sai ona liuhusi ninia profeta, hodi dehan: ‘Haree bá! Feto virjen a ida sei sai isin-rua no tuur-ahi oan-mane ida, no ema sei hanaran oan neʼe Emanuel’, neʼe katak ‘Maromak hamutuk ho ita.’”​—Mateus 1:22, 23.

 Lucas neʼebé hakerek Evanjellu ida mós hakerek kona-ba Maria neʼebé sai isin-rua liuhusi milagre. Lucas hakerek katak Maromak haruka anju Gabriel “atu hasoru feto virjen ida neʼebé promete ona atu kaben ho mane ida naran José husi David nia umakain. Feto virjen neʼe naran Maria”. (Lucas 1:26, 27) Maria mós fó sai katak nia mak virjen ida. Depois anju Gabriel fó-hatene katak nia sei sai inan ba Jesus, ka Mesias, Maria husu: “Haʼu seidauk halo relasaun seksuál ho mane ida. Entaun oinsá mak haʼu bele iha oan?”​—Lucas 1:34, nota-rodapé.

 Maria sai isin-rua liuhusi espíritu santu, neʼe mak Maromak nia forsa neʼebé nia uza atu kumpre ninia hakarak. (Mateus 1:18) Anju fó-hatene Maria katak: “Espíritu santu sei tun ba ó, no kbiit husi Maromak neʼebé Aas Liu Hotu sei tun ba ó. Tan neʼe, oan neʼebé sei moris mai mak santu no ema sei bolu nia nuʼudar Maromak nia Oan-Mane.” b (Lucas 1:35) Liuhusi milagre, Maromak muda ninia Oan-Mane nia moris ba Maria nia knotak, tuirmai Maria sai isin-rua.

 Maromak uza virjen ida atu tuur-ahi ba Jesus, atu nuneʼe Jesus bele iha isin neʼebé perfeitu hodi bele salva ema husi sala no mate. (João 3:16; Ebreu 10:5) Maromak muda Jesus nia moris ba Maria nia knotak. Bainhira Maria isin-rua, Maromak nia espíritu santu proteje bebé neʼe atu la simu kondisaun la perfeitu.​—Lucas 1:35.

 Tuirmai Jesus moris mai nuʼudar ema neʼebé perfeitu, hanesan ho Adão, antes nia halo sala. Bíblia esplika kona-ba Jesus katak: “Nia la halo sala ida.” (1 Pedro 2:22) Nuʼudar ema perfeitu, Jesus bele fó ninia moris nuʼudar sakrifísiu hodi salva ema husi sala no mate.​—1 Korinto 15:21, 22; 1 Timóteo 2:5, 6.

 Bíblia la hanorin katak Maria nafatin virjen iha ninia moris tomak. Maibé Bíblia hatudu katak Maria iha oan seluk tan.​—Mateus 12:46; Marcos 6:3; Lucas 2:7; João 7:5.

 Lae. New Catholic Encyclopedia esplika katak doutrina Imaculada Conceição mak “hanorin ida katak husi tempu neʼebé virjen Maria moris iha ninia inan nia knotak, nia livre ona husi sala neʼebé mai husi Adão no Eva. Ema hotu iha mundu moris mai nuʼudar sala-naʼin . . . Maibé Maria mak úniku tebes, nia moris mai sala-laek.” c

 Maibé Bíblia la hanorin katak Maria livre husi sala. (Salmo 51:5; Roma 5:12) Tuir loloos, Maria hatudu katak nia mós sala-naʼin bainhira nia hasaʼe sakrifísiu hamoos sala nian tuir mandamentu husi Moisés nia Ukun-Fuan ba inan sira. (Levítico 12:2-8; Lucas 2:21-24) Livru ida (New Catholic Encyclopedia) hatete: “Bíblia la hanorin kona-ba Imaculada Conceição . . . [Neʼe] mak hanorin husi Igreja.”

 Maria hatudu ezemplu diʼak kona-ba fiar, halo tuir, haraik an, no hadomi Maromak. Nia mak fiar-naʼin ida neʼebé ita bele banati-tuir.​—Ebreu 6:12.

 Maski Maria iha knaar úniku nuʼudar Jesus nia inan, maibé Bíblia la hanorin katak ita presiza adora Maria ka halo orasaun ba nia. Jesus mós la trata ninia inan iha dalan neʼebé espesiál, no nia mós la haruka ninia dixípulu sira atu halo nuneʼe. Tuir loloos, Evanjellu sira no mós versíkulu ida iha livru Apóstolu mak temi kona-ba Maria, maibé livru 22 seluk iha Testamentu Foun la temi kona-ba nia.​—Apóstolu 1:14.

 Eskritura sira iha Bíblia mós la hatudu katak ema Kristaun sira iha apóstolu sira-nia tempu trata Maria iha dalan espesiál ka fó hahiʼi ba nia. Bíblia hanorin katak ema Kristaun tenke adora Maromak mesak deʼit.​—Mateus 4:​10.