Maromak iha naran hira?

LOKE

Bíblia nia resposta

Maromak iha naran ida deʼit. Neʼe hakerek hanesan neʼe יהוה iha lian Ebraiku no baibain tradús nuʼudar “Jehovah” iha lian Inglés, no “Jeová” iha lian Portugés no Tetun. a Liuhusi ninia profeta Isaias, Maromak hatete: “Haʼu mak Jeová. Neʼe mak haʼu-nia naran.” (Isaias 42:8) Naran neʼe mosu maizumenus dala 7.000 iha manuskritu Bíblia antigu, ida-neʼe barak liu fali títulu hanesan Maromak, ka ema ruma nia naran iha Bíblia laran. b

Iha naran seluk ba Jeová ka lae?

Bíblia temi naran ida deʼit atu refere ba Maromak, maibé iha títulu barak no fraze barak mak uza atu esplika kona-ba nia. Lista iha kraik mak títulu no fraze balu neʼebé hatudu sai Jeová nia pozisaun no hahalok.

Títulu	Referénsia	Signifikadu
Alfa no Ómega	Apokalipse 1:8; 21:6; 22:13	“Ida neʼebé primeiru no ida neʼebé ikus”, ka “ida neʼebé hun no ida neʼebé rohan”, signifika la iha Maromak Aas Liu antes ka depois Jeová. (Isaias 43:10) Alfa no Ómega mak alfabetu primeiru no ikus iha lian Gregu.
Allah	(La iha)	Liafuan “Allah”, mai husi lian Arabi, neʼe laʼós Maromak nia naran maibé neʼe títulu ida neʼebé signifika Maromak. Tradusaun Bíblia barak iha lian Arabi no lian sira seluk uza “Allah” hanesan ho “Maromak.”
Aman	Mateus 6:9	Ida-neʼebé fó moris ba buat hotu.
Badaen Rai-Mean	Isaias 64:8	Iha autoridade atu ukun ema ida-idak no nasaun sira, hanesan badaen rai-mean neʼebé bele halo buat saida deʼit ba rai-mean.—Roma 9:20, 21.
Bibi-Atan	Salmo 23:1	Nia tau matan ninia atan sira.
Fatuk Boot	Salmo 18:2, 46	Fatin neʼebé seguru no hun ba salvasaun.
Haʼu Sei Sai Buat Neʼebé Haʼu Hakarak	Éxodo 3:14	Sai buat naran deʼit atu kumpre ninia hakarak. Fraze neʼe mak esplikasaun ba Maromak nia naran Jeová neʼebé temi iha versíkulu tuirmai.—Éxodo 3:15.
Horiuluk Kedas	Daniel 7:9, 13, 22	La iha hun; iha nanis ona antes buat hotu hahú eziste.—Salmo 90:2.
Ida neʼebé Aas Liu	Daniel 7:18, 27	Nia mak iha pozisaun aas liu hotu.
Ida neʼebé Sosa Fali	Isaias 41:14	Taka fali ka sosa fali ema husi sala no mate liuhusi Jesus nia sakrifísiu.—João 3:16.
Ida neʼebé ukun tropa lalehan nian, Naʼi funu-naʼin sira-nian	Isaias 1:9; Roma 9:29, Liafuan diak ba imi, segunda edisaun	Komandante ba tropa anju rihun ba rihun. Títulu “Naʼi funu-naʼin sira-nian” bele mós tradús nuʼudar “Jeová neʼebé ukun tropa lalehan nian”.—Roma 9:29, Bíblia Tradusaun Mundu Foun.
Kriadór, Kriadór Boot	Isaias 40:28; Salmo 149:2	Nia mak kria buat hotu, nia mak halo buat hotu eziste.—Apokalipse 4:11.
Laran-moras	Éxodo 34:14, Kadi Kapasidade	La tolera adorasaun ba maromak seluk. Fraze neʼe mós tradús nuʼudar “la simu sira neʼebé hakarak hadau ninia pozisaun” no “Maromak neʼebé hakarak ema atu adora nia mesak deʼit.”—Bíblia Tradusaun Mundu Foun.
Liurai rohan-laek	1 Timóteo 1:17	Ninia ukun la iha hun no la iha rohan.
Maromak	Génesis 1:1	Ida neʼebé merese simu adorasaun; Ida neʼebé kbiit-naʼin. Liafuan Ebraiku ʼElo·himʹ mak plurál, neʼe hatudu katak Jeová mak boot liu, kmanek liu no pozisaun aas liu.
Maromak neʼebé Aas Liu Hotu	Salmo 47:2	Nia mak iha pozisaun aas liu hotu.
Maromak neʼebé aas liu maromak sira seluk	Deuteronómio 10:17	Maromak neʼebé aas liu, la hanesan ho “maromak folin-laek” neʼebé ema balu adora.—Isaias 2:8.
Maromak neʼebé Kbiit Boot Liu Hotu	Génesis 17:1	Hatudu sai Jeová nia kbiit boot. Iha Bíblia laran, iha liafuan Ebraiku ʼEl Shad·daiʹ, katak “Maromak neʼebé Kbiit Boot Liu Hotu” mosu dala hitu.
Maromak neʼebé kontente	1 Timóteo 1:11	Nia laran haksolok no kontente.—Salmo 104:31.
Maromak neʼebé rona ba orasaun	Salmo 65:2	Nia rasik rona orasaun ida-idak neʼebé ema hatoʼo ba nia ho fiar.
Maromak neʼebé Santu Liu Hotu	Provérbios 9:10	Nia mak santu liu (moos iha dalan morál no la iha sala) fali buat seluk hotu.
Mestre Boot	Isaias 30:20, 21	Nia hanorin ita no fó matadalan neʼebé lori benefísiu.—Isaias 48:17, 18.
Naʼi	Salmo 135:5	Naʼin ka naʼi; lian Ebraiku ʼA·dhohnʹ no ʼAdho·nimʹ.
Naʼi Ukun-Naʼin Boot Liu	Génesis 15:2	Iha autoridade boot liu hotu; lian Ebraiku ʼAdho·naiʹ.
Salvadór	Isaias 45:21	Salva husi perigu.

Naran ba fatin sira iha Eskritura Lian Ebraiku

Fatin balu nia naran neʼebé temi iha Bíblia inklui Maromak nia naran, maibé liafuan sira-neʼe laʼós naran seluk atu refere ba Maromak.

Fatin sira-nia naran	Referénsia	Signifikadu
Jeová-Jire	Génesis 22:13, 14	“Jeová sei fó; Jeová sei halo ida-neʼe.”
Jeová-Nisi	Éxodo 17:15	“Jeová mak haʼu-nia ai-riin sinál nian.” Jeová mak Maromak neʼebé ninia povu bele buka-hetan protesaun no ajuda.—Éxodo 17:13-16.
Jeová-Salom	Juís 6:23, 24	“Jeová mak dame”.

Razaun atu buka-hatene no uza Maromak nia naran

Maromak hakarak hatudu mai ita katak ninia naran mak importante tanba nia hakerek ida-neʼe iha Bíblia laran dala rihun ba rihun.—Malaquias 1:11.
Maromak nia Oan-Mane Jesus mós hatudu dala barak katak Maromak nia naran mak importante. Porezemplu, nia halo orasaun ba Jeová: “Halo Ita-nia naran sai santu.”—Mateus 6:9; João 17:6.
Ema sira neʼebé buka-hatene no uza Maromak nia naran, sira bele iha relasaun diʼak ho Jeová. (Salmo 9:10; Malaquias 3:16) Relasaun hanesan neʼe mak ajuda ema sira-neʼe atu hetan benefísiu husi Maromak nia promesa: “Haʼu sei salva nia tanba nia hadomi haʼu. Haʼu sei proteje nia tanba nia hatene haʼu-nia naran.”—Salmo 91:14.
Bíblia rekoñese: “Iha maromak barak iha lalehan no iha rai. Maski ba ema, iha ‘maromak’ barak no ‘naʼi’ barak.” (1 Korinto 8:5, 6) Maibé klaru katak só iha Maromak mesak ida deʼit neʼebé loos, neʼe mak naran Jeová.—Salmo 83:18.

a Matenek-naʼin balu neʼebé estuda língua Ebraiku gosta liu “Yahweh” nuʼudar Maromak nia naran.

b “Jah” mak Maromak nia naran neʼebé habadak ona. Bíblia temi liafuan “Jah” maizumenus dala 50, inklui liafuan “Aleluia”. “Aleluia” signifika “Hahiʼi Jah”.—Apokalipse 19:1.