Bíblia hatete saida kona-ba ema nia liberdade atu hili? Maromak mak kontrola Ita-nia destinu ka lae?

LOKE

Bíblia nia resposta

Maromak fó dignidade ba ita hodi fó liberdade atu hili, tan neʼe ita bele foti desizaun rasik, laʼós Maromak mak tau destinu mai ita. Mai ita hanoin saida mak Bíblia hanorin.

Maromak kria ema tuir ninia ilas. (Génesis 1:26) La hanesan ho animál, ema iha kapasidade atu hatudu hahalok oioin tuir Kriadór, hanesan domin no justisa. Ita mós iha liberdade atu foti desizaun rasik, hanesan ho ita-nia Kriadór.
Ita bele foti desizaun oioin ba ita-nia futuru. Bíblia anima ita atu “hili moris . . . hodi rona ba [Maromak nia] liafuan”, neʼe katak hili atu moris tuir Maromak nia mandamentu sira. (Deuteronómio 30:19, 20) Se karik ita la iha kbiit atu foti desizaun rasik, entaun liafuan iha eskritura neʼe mak saugati deʼit, no hatudu katak Maromak mak laran-aat tanba husu buat neʼebé ema la iha kbiit atu halo. Maromak la obriga ita atu halo tuir ninia hakarak, maibé ho laran-diʼak konvida ita: “Haʼu hakarak atu imi halo tuir haʼu-nia mandamentu sira! Se imi halo nuneʼe, imi-nia dame sei sai hanesan mota.”—Isaias 48:18.
Atu hetan susesu ka hetan susar, neʼe laʼós destinu mak determina. Se ita hakarak hetan susesu, ita presiza hakaʼas an. Bíblia dehan: “Buat hotu neʼebé ó-nia liman bele halo, halo bá ho ó-nia forsa tomak.” (Eclesiastes 9:10) Bíblia mós dehan: “Ema badinas nia planu sei hetan duni susesu.”—Provérbios 21:5.

Liberdade atu hili mak prezente folin-boot husi Maromak, tanba neʼe loke dalan ba ita atu hadomi Maromak ho ita-nia “laran tomak” tanba hakarak rasik.—Mateus 22:37.

Maromak mak kontrola buat hotu-hotu ka lae?

Bíblia dehan duni katak Maromak mak Kbiit Boot Liu Hotu, la iha buat ida neʼebé bele hanetik ninia kbiit. (Job 37:23, Isaias 40:26) Maski nuneʼe, nia la uza ninia kbiit atu kontrola buat hotu-hotu. Porezemplu, Bíblia dehan katak Maromak “kontrola an” atu la halo buat ruma ba Babilónia antigu neʼebé fó susar ba ninia povu. (Isaias 42:14) Hanesan neʼe mós ohin loron, maski ema balu uza sala sira-nia liberdade hodi halo aat ba ema seluk, maibé Maromak husik ida-neʼe akontese ba tempu balu. Maski nuneʼe, nia sei la husik ida-neʼe ba nafatin.—Salmo 37:10, 11.