Bíblia mak livru ida neʼebé tau livru kiʼik 66 hamutuk. Livru kiʼik sira-neʼe hakerek maizumenus durante tinan 1.600 nia laran. Bíblia mak “Maromak nia liafuan”.—1 Tesalónika 2:13.

Iha informasaun neʼe

•  Faktu sira kona-ba Bíblia

•  Bíblia koʼalia kona-ba saida?

•  Bíblia nia informasaun troka ka lae?

•  Tanbasá iha tradusaun Bíblia barak?

•  Sé mak deside kona-ba informasaun neʼebé tau iha Bíblia laran?

•  Iha livru neʼebé lakon husi Bíblia laran ka lae?

•  Oinsá atu buka-hetan eskritura sira

•  Lista ba livru sira iha Bíblia laran

•   Sé mak hakerek Bíblia? Maromak mak Autór ba Bíblia, maibé nia uza mane maizumenus naʼin-40 atu hakerek ninia liafuan. Sira balu mak Moisés, Liurai David, Mateus, Marcos, Lucas no João. a Maromak tau ninia hanoin ba hakerek-naʼin sira-neʼe nia neon hodi sira bele hakerek ninia liafuan.—2 Timóteo 3:16.

   Komparasaun: Se patraun ida haruka ninia sekretáriu atu hakerek mensajen ruma, mensajen neʼe nia autór mak patraun, laʼós sekretáriu neʼe. Nuneʼe mós, maski Maromak uza ema atu hakerek ninia mensajen, Bíblia nia Autór mak Maromak.

•   Liafuan “Bíblia” signifika saida? “Bíblia” mai husi liafuan Gregu biblia, neʼebé signifika “livru sira neʼebé kiʼik”. Ikusmai, ema uza liafuan biblia hodi refere ba livru ida neʼebé halibur livru kiʼik barak.

•   Horibainhira mak ema hakerek Bíblia? Bíblia hakerek kompletu maizumenus durante tinan 1600 nia laran, hahú husi tinan 1513 AEC toʼo maizumenus tinan 98 EC.

•   Bíblia orijinál iha neʼebé? Toʼo agora, ema la hetan Bíblia nia manuskritu orijinál tanba uluk Bíblia hakerek iha surat-tahan neʼebé halo husi duʼut-papiru ka animál nia kulit neʼebé fasil atu sai aat. Maibé husi tempu uluk, ema balu iha knaar atu kopia Bíblia ho kuidadu, hodi nuneʼe Bíblia bele toʼo mai ita ohin loron.

•   Saida mak “Testamentu Tuan” no “Testamentu Foun”? Testamentu Tuan refere ba parte husi Bíblia neʼebé maioria hakerek iha lian Ebraiku b, tan neʼe ema bolu nuʼudar Eskritura Lian Ebraiku. Testamentu Foun refere ba parte husi Bíblia neʼebé hakerek iha lian Gregu, tan neʼe ema bolu nuʼudar Eskritura Lian Gregu. Parte rua neʼe tau hamutuk mak sai nuʼudar Bíblia kompletu, ka Eskritura Sagrada c.

•   Informasaun hanesan saida deʼit mak iha Bíblia laran? Informasaun iha Bíblia laran inklui istória, ukun-fuan, profesia, poezia, lia-dadolin, knananuk, no karta sira.—Haree “ Lista ba livru sira iha Bíblia laran”.

 Bíblia hahú ho esplikasaun badak kona-ba oinsá Maromak kria lalehan no rai. Maromak hakarak ema atu koñese nia, tan neʼe liuhusi Bíblia, nia fó sai katak ninia naran mak Jeová.—Salmo 83:18.

 Bíblia fó sai katak ema barak iha hanoin sala kona-ba Maromak. Bíblia mós esplika kona-ba oinsá Maromak sei halo santu ninia naran.

 Bíblia fó sai Maromak nia hakarak ba ema no mundu, no mós esplika oinsá nia sei halakon buat hotu neʼebé haterus ema.

 Bíblia fó matadalan ba ita-nia moris loroloron nian. Porezemplu:

•   Mantein relasaun diʼak ho ema seluk. “Buat hotu neʼebé imi hakarak ema halo ba imi, imi mós tenke halo ba sira.”—Mateus 7:12.

   Neʼe katak sá: Ita tenke halo ba ema seluk buat neʼebé Ita hakarak ema halo ba Ita.

•   Kontrola estrese. “Keta hanoin resin kona-ba loron aban, tanba loron aban iha ninia susar rasik.”—Mateus 6:34.

   Neʼe katak sá: Duké hanoin demais kona-ba saida mak karik sei akontese iha futuru, diʼak liu fokus ba loron ohin.

•   Halaʼo moris kaben nian neʼebé kontente. “Laʼen ida-idak tenke hadomi ninia feen hanesan ninia an rasik, no feen mós tenke hatudu respeitu kleʼan ba ninia laʼen.”—Éfeso 5:33.

   Neʼe katak sá: Domin no respeitu mak importante tebes atu moris kaben nian bele hetan susesu.

 Lae. Matenek-naʼin sira kompara Bíblia nia manuskritu antigu ho Bíblia ohin loron, no sira haree katak Bíblia nia mensajen la troka. Neʼe lójiku, tanba se Maromak hakarak ema atu lee no komprende ninia liafuan, nia sei la husik ema atu troka. d—Isaias 40:8.

 Ohin loron ema barak la komprende língua neʼebé uza atu hakerek Bíblia iha tempu uluk. Maibé Bíblia iha “liafuan diʼak” ba “nasaun, suku, língua no povu hotu”. (Apokalipse 14:6) Tan neʼe, presiza tradusaun Bíblia neʼebé ema bele komprende bainhira lee Maromak nia mensajen.

 Bainhira tradús Bíblia, ema uza métodu tolu tuirmai neʼe:

•   Tradús liafuan ida ba ida, ka tradús literál.

•   Tradús tuir signifikadu hodi uza liafuan atu hatoʼo ideia husi língua orijinál.

•   Tradús livre atu halo ema gosta lee. Maibé kuandu tradús iha dalan hanesan neʼe, lee-naʼin sira sei labele hatene ideia orijinál ho klaru.

 Dalan neʼebé diʼak liu atu tradús Bíblia mak tradús literál, se bele, no mós uza língua neʼebé modernu atu ema bele komprende ho loloos mensajen husi Maromak. e

 Nuʼudar Autór ba Bíblia, Maromak mak deside saida mak merese tau iha Bíblia laran. Foufoun, Maromak “fó liafuan sagradu” ba ema Izraél antigu hodi tau fiar ba sira atu proteje Eskritura Lian Ebraiku.—Roma 3:2.

 Lae. Bíblia kompletu, la iha livru ida mak “lakon” husi Bíblia laran. Ema balu hatete katak iha livru antigu balu neʼebé kleur ona subar hela maibé loloos tenkesér iha Bíblia laran. f Maibé atu livru ida bele inklui iha Bíblia laran, livru neʼe tenke bazeia ba kritéria neʼebé Bíblia rasik fó sai. (2 Timóteo 1:13) Kuandu aplika kritéria neʼe, livru sira neʼebé mai husi Maromak tenkesér liga malu no la kontra malu. Tan neʼe, maski ema hatete katak livru antigu balu tenke inklui iha Bíblia laran, maibé livru sira-neʼe la kumpre kritéria neʼe. g