Bíblia hatete katak se ita la kontrola ita-nia hirus neʼe bele lori perigu ba ita-nia an no ema neʼebé besik ita. (Provérbios 29:22) Dala ruma, iha duni razaun neʼebé loos atu sai hirus, maski nuneʼe Bíblia hatete katak ema neʼebé “hirus toʼo la kontrola an” sei la hetan salvasaun. (Galásia 5:​19-​21) Bíblia iha prinsípiu sira neʼebé bele ajuda ema ida atu kontrola ninia hirus.

•  Sempre sala atu sai hirus ka lae?

•  Hirus hanesan saida mak sala?

•  Saida mak Ita bele halo atu kontrola sentimentu hirus?

•  Eskritura sira kona-ba hirus

 Lae. Dala ruma, ita presiza hirus duni. Porezemplu, Maromak nia profeta laran-metin ida naran Neemias “sai hirus tebes” bainhira hatene katak ema haterus ninia maluk fiar-naʼin.​—Neemias 5:6.

 Dala ruma, Maromak mós hirus. Porezemplu, uluk “Jeová sai hirus tebes hasoru ema Izraél” tanba sira la kumpre sira-nia promete atu adora nia mesak deʼit, sira adora fali maromak falsu sira. (Juís 2:​13, 14) Maski nuneʼe, Jeová laʼós Maromak neʼebé hirus-teen. Nia sempre iha razaun neʼebé loos atu sai hirus no nia mós bele kontrola ninia hirus.​—Éxodo 34:6; Isaias 48:9.

 Hirus neʼebé sala mak hirus neʼebé labele kontrola no la ho razaun loos. Baibain ema neʼebé la perfeitu hatudu hirus hanesan neʼe. Porezemplu:

•   Caim “sai hirus tebes” bainhira Maromak la simu ninia sakrifísiu. Caim la kontrola ninia hirus toʼo ikusmai nia oho ninia alin-mane.​—Génesis 4:​3-8.

•   Profeta Jonas “sai hirus makaʼas” bainhira Maromak hatudu laran-sadiʼa ba ema Nínive. Maromak korrije Jonas no hatete katak nia la “iha direitu atu sai hirus makaʼas”. Maromak mós hatete ba Jonas katak nia presiza hatudu laran-sadiʼa ba ema neʼebé arrepende an.​—Jonas 3:10–​4:​1, 4, 11. a

 Ezemplu sira-neʼe hatudu katak bainhira ema la perfeitu hirus, ida-neʼe “la kumpre buat neʼebé loos iha Maromak nia oin”.​—Tiago 1:​20.

•   Hanoin-hetan katak perigu se ita la kontrola ita-nia hirus. Ema balu karik hanoin katak se sira fó sai sira-nia sentimentu hirus, ema sei haree sira nuʼudar ema neʼebé forsa. Maibé realidade mak bainhira ema ida labele kontrola ninia hirus, neʼe mak ninia fraku. “Ema neʼebé labele kontrola ninia hirus mak hanesan sidade neʼebé ninia moru naksobu ona.” (Provérbios 25:28; 29:11) Maibé, bainhira ita hakaʼas an kontrola ita-nia hirus, ita hatudu katak ita iha forsa no matenek. (Provérbios 14:29) Bíblia hatete: “Ema neʼebé la hirus lalais mak diʼak liu fali mane ida neʼebé iha forsa boot.”​—Provérbios 16:32.

•   Kontrola ita-nia hirus, hodi nuneʼe ita la halo buat ruma neʼebé ita sei arrepende. Salmo 37:8 hatete: “Husik tiha hirus no soe tiha laran-nakali; keta sai laran-nakali no halo hahalok aat.” Eskritura neʼe hatudu katak ita bele hili atu husik tiha ita-nia hirus atu nuneʼe ita la “halo hahalok aat”. Éfeso 4:​26 hatete: “Se imi hirus karik, keta halo sala.”

•   Kuandu ita komesa sente hirus, se bele, sai husi situasaun neʼe. Bíblia hatete: “Hahú istori malu mak hanesan loke odamatan neʼebé tahan netik bee-lihun boot ida; tan neʼe, diʼak liu husik tiha fatin neʼe antes mosu istori malu.” (Provérbios 17:14) Kuandu ita istori malu ho ema ruma, keta demora atu rezolve problema. Maibé Ita no ema neʼe presiza buka tempu atu sai kalma lai hodi nuneʼe bele koʼalia hamutuk ho dame.

•    Buka-hatene faktu hotu. Provérbios 19:11 hatete: “Ema nia matenek sei ajuda duni nia atu la sai hirus lalais.” Antes atu halo konkluzaun ida, ita tenke buka-hatene uluk faktu sira. No kuandu ita rona didiʼak ba faktu hotu, neʼe sei ajuda ita atu la sai hirus la ho razaun.​—Tiago 1:​19.

•    Halo orasaun hodi husu dame. Hodi halo orasaun, Ita bele hetan “Maromak nia dame neʼebé aas liu ema nia hanoin hotu”. (Filipe 4:7) Orasaun mak dalan ida atu hetan Maromak nia espíritu santu, no neʼe sei ajuda ita atu haburas hahalok sira hanesan dame, pasiénsia no kontrola an.​—Lucas 11:13; Galásia 5:​22, 23.

•   Hili didiʼak ita-nia kolega. Ita-nia kolega sira bele fó influénsia ba ita-nia hahalok. (Provérbios 13:20; 1 Korinto 15:33) Tan neʼe mak Bíblia hatete: “Keta habelun ho ema neʼebé hirusdór ka ransu ho ema neʼebé sempre sai hirus lalais.” Tanbasá? “Atu nuneʼe ó la aprende sira-nia hahalok sira no ó la tau lasu ba ó-nia an rasik.”​—Provérbios 22:24, 25.