Sin iha duni. Bíblia fó evidénsia barak atu hatudu katak Maromak iha duni. Evidénsia sira-neʼe ajuda ita atu hametin ita-nia fiar ba Maromak hodi uza ita-nia “kbiit atu hanoin”, laʼós hodi fiar deʼit. (Roma 12:1; 1 João 5:​20, nota-rodapé) Hanoin toʼok oinsá mak ita bele hanoin loloos tuir Bíblia:

•   Universu neʼebé la runguranga no kriatura moris sira hatudu ho klaru katak iha duni Kriadór. Bíblia dehan: “Tuir loloos, ema mak harii uma ida-idak, maibé Maromak mak harii buat hotu.” (Ebreu 3:4) Matenek-naʼin barak sente katak evidénsia simples neʼe halo sira labele nega katak Kriadór iha duni. a

•   Ita ema hakarak atu komprende tanbasá mak ita moris. Maski karik ita iha buat hotu neʼebé ita presiza iha ita-nia moris, maibé hakarak neʼe nafatin iha. Ida-neʼe liga ho buat neʼebé Bíblia hatete katak ita “presiza Maromak nia matadalan”. Ita-nia hakarak atu koñese no adora Maromak mak buat neʼebé normál. (Mateus 5:3; Apokalipse 4:11) Ida-neʼe hatudu katak Maromak iha duni no mós hatudu katak nia hakarak ita atu koñese nia no adora nia.​—Mateus 4:4.

•   Profesia neʼebé hakerek nanis iha Bíblia laran sai loos duni tuir buat neʼebé fó-hatene nanis. Profesia sira-neʼe hakerek ho loloos no iha informasaun espesífiku, ida-neʼe hatudu katak neʼe mai husi Maromak neʼebé iha kbiit boot.​—2 Pedro 1:21.

•   Ema sira neʼebé hakerek Bíblia iha koñesimentu barak liu kona-ba siénsia se kompara ho ema seluk neʼebé moris iha tempu neʼebá. Porezemplu, iha tempu antigu, ema barak fiar katak animál ruma hanesan, elefante, fahi ka karau mak tula mundu iha sira-nia kotuk. Maibé Bíblia hatete katak “mundu la tara ba buat ida”. (Job 26:7) Bíblia mós fó sai ho loloos katak mundu mak kabuar. (Isaias 40:22) Ema barak fiar katak Bíblia nia hakerek-naʼin sira hatene kona-ba buat sira-neʼe tanba Maromak mak fó-hatene sira.

•   Iha Bíblia laran, ita bele hetan resposta ba pergunta importante sira. Baibain kuandu ema la hetan resposta neʼebé loos ba pergunta sira-neʼe, neʼe book sira atu la tau fiar tan ba Maromak. Porezemplu: se Maromak mak domin no iha kbiit boot, tanbasá nia husik terus no buat aat akontese iha mundu? Tanbasá relijiaun hamosu problema duké lori buat diʼak?​—Tito 1:16.