Pár barak mak moris hamutuk ona antes sira kaben. Sira balu halo nuneʼe tanba sira hakarak haree se sira toman malu no sira hanoin katak neʼe sei ajuda sira atu iha moris kaben nian neʼebé susesu. Maibé moris hamutuk antes kaben, neʼe mak desizaun neʼebé matenek ka lae?

Iha informasaun neʼe

•  Saida mak Bíblia hatete?

•  Moris hamutuk sei ajuda Ita sai prontu ba moris kaben nian ka lae?

•  Moris hamutuk sei ajuda Ita atu poupa osan ka lae?

•  Moris hamutuk sei ajuda Ita atu kaben ho ema neʼebé diʼak ka lae?

•  Iha opsaun neʼebé diʼak liu ka lae?

•   Bíblia dehan katak halo relasaun seksuál antes kaben mak sala. Porezemplu Bíblia dehan: “Hasees an husi sala seksuál.” (1 Tesalónika 4:3; 1 Korinto 6:18) Neʼe inklui relasaun seksuál entre pár neʼebé hela hamutuk antes kaben, maski sira iha planu atu kaben. a Pár neʼebé moris tuir Bíblia nia matadalan bele hadook an husi konsekuénsia oioin no la sai isin-rua sedu antes kaben.

•   Arranju kaben nian mai husi Maromak. Bainhira nia hahú arranju neʼe, nia dehan: “Mane ida sei husik ninia inan-aman no nia sei hela hamutuk ho ninia feen, no sira sei sai isin ida deʼit.” (Génesis 2:24) Bainhira mane no feto halo juramentu kaben nian, neʼe sei halo sira sente domin no seguru.

 Ema balu dehan sin. Sira sente katak pár sira-neʼe bele sai prontu ba moris kaben nian hodi fahe serbisu uma-laran nian no observa sira-nia pár nia toman. Maibé, buat importante liu atu moris família nian susesu mak laran-metin ba malu.

 Oinsá mak pár sira bele aprende atu laran-metin ba malu durante tempu diʼak no susar? Baibain kuandu ema hela hamutuk antes kaben, sira hanoin neʼe mak buat neʼebé temporáriu deʼit no bele hakotu relasaun neʼe iha tempu naran deʼit. Maibé neʼe laʼós dalan atu hetan moris kaben nian neʼebé kontente. Bainhira mane no feto kaer metin ba desizaun atu hatudu laran-metin ba malu no rezolve problema hamutuk, neʼe sei hametin sira-nia relasaun.

 Buat neʼebé importante: Pár neʼebé hili atu hela hamutuk antes kaben, karik sira laʼós prepara an ba moris kaben maibé prepara an atu fahe malu.

 Bíblia nia prinsípiu: “Buat naran deʼit neʼebé ema kari, nia mós sei koʼa ida-neʼe.”—Galásia 6:7.

 Ema balu dehan sin. Peskiza ida husi Pew Research Center iha Estadus Unidus fó sai katak maizumenus porsentu 40 husi ema neʼebé komesa hela hamutuk antes kaben, hanoin katak neʼe sei ajuda sira atu poupa osan. Maibé, depois hela hamutuk ba tempu balu, sira barak nafatin iha problema ekonomia neʼebé halo sira seidauk prontu atu kaben.

 Hela hamutuk antes kaben bele lori mós konsekuénsia seluk tan, liuliu ba feto sira. Porezemplu, depois sira-nia relasaun kotu, dala barak feto sira mak ida neʼebé iha responsabilidade atu haboot oan sira.

 Buat neʼebé importante: Moris hamutuk antes kaben lori konsekuénsia aat barak liu duké benefísiu neʼebé ita hakarak hetan.

 Bíblia nia prinsípiu: “Haʼu, Jeová, mak imi-nia Maromak, haʼu hanorin imi kona-ba buat neʼebé diʼak liu ba imi.”—Isaias 48:17.

 Ema balu dehan sin. Maibé livru Fighting for Your Marriage hatete: “Ema neʼebé hela hamutuk no halo relasaun seksuál antes kaben, dala barak la rekoñese katak hela hamutuk mak halo susar liu atu fahe malu.” Tanbasá? Pár balu neʼebé hela hamutuk antes kaben karik ikusmai hatene katak sira la cocok. Maibé tanba razaun oioin hanesan hakiak animál hamutuk, aluga uma, ka isin-rua sedu, peskizadór sira hatete katak pár sira-neʼe kontinua hela hamutuk tan deʼit sira toman ona no labele halo mudansa foun iha sira-nia moris. b No livru neʼe hatutan tan katak “maski ema balu hatene katak sira la cocok maibé sira hili atu kaben deʼit duké haketak malu tanba neʼe mak opsaun neʼebé fasil liu”.

 Buat neʼebé importante: Moris hamutuk antes kaben sei la ajuda Ita atu hetan pár neʼebé loos. Tuir loloos, karik neʼe sei halo susar liután atu hakotu relasaun ho pár neʼebé la diʼak.

 Bíblia nia prinsípiu: “Ema neʼebé matenek haree perigu no subar nia an, maibé ema neʼebé la iha esperiénsia la hasees an no hetan susar.”—Provérbios 22:3.

 Ita bele hasees an husi problema sira neʼebé mosu tanba moris hamutuk antes kaben no bele iha moris kaben nian neʼebé susesu. Oinsá? Neʼe mak hodi halo tuir Bíblia nia matadalan kona-ba moris kaben nian. Uza tempu atu koñese didiʼak ema neʼebé sei sai Ita-nia pár antes Ita komesa hela hamutuk nuʼudar feen-laʼen. Diʼak liu atu hili kaben neʼebé iha prinsípiu no fiar hanesan ho Ita, duké haree deʼit ba ema neʼe nia bonita ka bonitu.

 Bíblia fó matadalan oioin neʼebé bele ajuda Ita atu prepara an ba moris kaben nian neʼebé estavel no kontente. c Porezemplu, Bíblia fó prinsípiu neʼebé bele ajuda Ita atu . . .

•   nafatin laran-metin ba Ita-nia pár

•   prepara Ita-nia an atu sai feen ka laʼen neʼebé diʼak

•   haree didiʼak sinál sira neʼebé hatudu katak ema neʼe la diʼak durante tempu namora

 Atu aprende liután kona-ba tópiku sira-neʼe, haree parte “Moris kaben nian no família” iha jw.org.

 Bíblia nia prinsípiu: “Eskritura hotu mai husi Maromak no neʼe diʼak atu hanorin.”—2 Timóteo 3:16.