ESPLIKASAUN KONA-BA ESKRITURA

Mateus 6:33—“Buka uluk knanain Maromak nia reinu”

LOKE

“Neʼe duni, kontinua buka uluk Maromak nia Ukun no buat neʼebé loos tuir Maromak nia haree, no nia sei fó mós buat sira seluk ba imi.”—Mateus 6:33, Tradusaun Mundu Foun.

“Neʼe duni, buka uluk knanain Maromak nia reinu ho nia justisa; buat hirak neʼe sei fo tan ba imi.”—Mateus 6:33, Liafuan diak ba imi, segunda edisaun.

Signifikadu husi Mateus 6:33

Maromak nia reinu, ka Maromak nia Ukun mak governu ida iha lalehan no liuhusi governu neʼe Maromak sei kumpre ninia hakarak iha mundu. (Mateus 6:9, 10) Ema neʼebé buka uluk Maromak nia Ukun sei haree ida-neʼe nuʼudar buat neʼebé importante liu iha ninia moris. a Nia laʼós deʼit badinas estuda kona-ba Maromak nia Ukun maibé nia mós fó-hatene ba ema seluk kona-ba buat diʼak oioin neʼebé Ukun neʼe sei halo. (Mateus 24:14) Ema hanesan neʼe mós sei halo orasaun hodi husu Ukun neʼe toʼo mai rai.—Lucas 11:2.

Buat neʼebé loos tuir Maromak nia haree inklui Maromak nia hanoin kona-ba saida mak loos no saida mak sala. (Salmo 119:172) Tan neʼe, ema neʼebé buka uluk buat neʼebé loos tuir Maromak nia haree sei moris tuir Maromak nia ukun-fuan kona-ba morál neʼebé sempre lori benefísiu ba ema nia moris.—Isaias 48:17.

Fraze nia sei fó mós buat sira seluk ba imi, neʼe mak Maromak nia promesa katak nia sei tau matan ba ema neʼebé buka uluk ninia Ukun no halo tuir ninia matadalan iha sira-nia moris.—Mateus 6:31, 32.

Kontestu husi Mateus 6:33

Jesus koʼalia liafuan sira-neʼe iha ninia diskursu neʼebé hakerek iha Mateus kapítulu 5-7. Ema neʼebé rona diskursu neʼe maioria mak ema kiak. Karik sira hanoin katak sira presiza buka uluk sira-nia moris no ladún iha tempu atu buka Maromak nia Ukun. Maibé Jesus anima sira atu haree didiʼak oinsá Maromak tau matan ba ninia kriatura sira hanesan ai-horis no animál. Maromak promete katak nia sei tau matan mós ba ema neʼebé buka uluk ninia Ukun.—Mateus 6:25-30.

Hanoin neʼebé sala kona-ba Mateus 6:33

Hanoin sala: Ema neʼebé buka uluk Maromak nia Ukun sei sai riku.

Faktu: Jesus dehan katak ema neʼebé buka uluk Maromak nia Ukun sei hetan buat neʼebé sira presiza, hanesan ai-han no roupa. (Mateus 6:25, 31, 32) Maibé Jesus la promete katak sira sei hetan sasán neʼebé diʼak liu, no nia mós la hatete katak sira bele sukat bensaun neʼebé sira simu husi Maromak liuhusi rikusoin neʼebé sira iha. Tuir loloos, Jesus fó avizu kona-ba buka rikusoin, tanba neʼe bele hanetik ema atu buka uluk Maromak nia Ukun. (Mateus 6:19, 20, 24) Apóstolu Paulo halo buat barak atu apoia Maromak nia Ukun, maibé dala ruma nia moris ho buat uitoan deʼit. Hanesan Jesus, Paulo mós fó avizu kona-ba perigu neʼebé bele mosu kuandu hakaʼas an atu sai riku.—Filipe 4:11, 12; 1 Timóteo 6:6-10.

Hanoin sala: Ema Kristaun la presiza halo serbisu hodi buka moris.

Faktu: Bíblia dehan katak ema Kristaun tenke serbisu hodi sustenta ninia an no ninia família. (1 Tesalónika 4:11, 12; 2 Tesalónika 3:10; 1 Timóteo 5:8) Jesus la hatete katak ninia dixípulu sira tenke buka deʼit Maromak nia Ukun; maibé nia hatete sira presiza buka uluk Maromak nia Ukun.

Ema neʼebé buka uluk Maromak nia Ukun no prontu atu serbisu hodi buka moris bele fiar katak Maromak ajuda sira atu iha buat neʼebé sira presiza iha sira-nia moris.—1 Timóteo 6:17-19.

a Liafuan “Kontinua buka uluk” tradús husi liafuan Gregu neʼebé fó ideia kona-ba kontinua halo buat ruma. Tan neʼe, ita presiza kontinua buka Maromak nia Ukun nuʼudar prioridade iha ita-nia moris, laʼós ba tempu uitoan deʼit.