•   Ita sente oinsá bainhira rona ema seluk tolok?

  •  Haʼu sente baibain deʼit.

  •  Haʼu-nia laran la hakmatek, maibé diʼak hela.

  •  Haʼu la gosta, haʼu lakohi atu rona ida-neʼe.

•   Dala hira mak Ita tolok?

  •  Nunka

  •  Dala ruma

  •  Beibeik

•   Tuir Ita-nia hanoin, tolok mak problema neʼebé sériu ka lae?

  •  Sin

  •  Lae

 Tuir Ita-nia hanoin, tolok mak buat neʼebé sériu ka lae? Karik Ita hatán: ‘Ladún sériu. Iha problema seluk neʼebé sériu liu neʼebé ita presiza hanoin. No tuir loloos, tolok mak buat neʼebé baibain deʼit.’ Neʼe loos ka lae?

 Tuir loloos iha ema barak neʼebé la gosta atu uza liafuan tolok. No sira iha razaun diʼak tanbasá sira la tolok no ema seluk karik nunka hanoin kona-ba neʼe. Porezemplu:

•  Ita-nia liafuan haleno Ita-nia an. Ita-nia liafuan hatudu sai ita mak ema hanesan saida. Se Ita uza liafuan tolok, ema bele hanoin katak Ita mak ema neʼebé la hanoin ema seluk nia sentimentu. Ita mak ema hanesan neʼe duni ka lae?

   Bíblia hatete: “Buat neʼebé sai husi ibun mai husi laran.”​—Mateus 15:18.

•  Se Ita tolok, neʼe book ema atu hanoin negativu kona-ba Ita. Livru Cuss Control hatete: “Dalan neʼebé ita koʼalia, bele determina belun hanesan saida mak ita sei hetan, ita-nia família no belun sei respeitu ita ka lae, ita-nia relasaun ho ema seluk sei sai oinsá, oinsá ita bele afeta ema seluk nia moris, serbisu ka pozisaun saida mak ita sei hetan no oinsá ema oin-foun trata ita.” Livru neʼe mós hatete: “Hanoin toʼok kona-ba neʼe, se Ita la tolok, Ita-nia relasaun ho ema seluk sei sai diʼak liu.”

   Bíblia hatete: “Hasai tiha . . . koʼalia aat.”​—Éfeso 4:31.

•  Tolok la halo Ita haree jeitu. Dr. Alex Packer nia livru ho títulu How Rude! esplika: “Ema la gosta rona ba ema neʼebé sempre tolok.” Nia esplika katak linguajen neʼebé nakonu ho liafuan aat sei la halo ema ida haree matenek, komik ka diʼak. Nia mós esplika katak liafuan aat sira sei fó impaktu ba ema nia neon.

   Bíblia hatete: “Keta husik liafuan aat sai husi imi-nia ibun.”​—Éfeso 4:29.

•  Halo planu. Koko toʼok atu hamenus Ita-nia toman atu tolok iha fulan ida nia laran. Hakerek ka tau nota kona-ba mudansa neʼebé Ita halo iha kalendáriu. Hakaʼas an atu kumpre Ita-nia planu neʼe, karik Ita presiza halo buat sira tuirmai neʼe. Porezemplu:

•  Hasees an husi atividade halimar nian neʼebé bele halo nakonu Ita-nia neon ho liafuan la diʼak. Bíblia hatete: “Ransu hamutuk ho ema aat sei estraga morál neʼebé diʼak.” (1 Korinto 15:33, nota-rodapé) “Ransu” bele inklui ema no mós atividade halimar nian, hanesan nonton filme, halimar vídeo game no rona ba múzika. Kenneth neʼebé idade 17 hatete: “Fasil deʼit ba ita atu kanta tuir múzika ida neʼebé ita gosta no la preokupa ho liafuan tolok iha múzika laran, tan deʼit ita gosta múzika neʼe nia melodia.”

•  Hatudu hahalok neʼebé maduru. Ema balu hanoin katak se sira uza liafuan tolok, neʼe sei halo sira haree hanesan ema adultu. Maibé loloos lae. Bíblia hatete katak ema neʼebé maduru ‘treinu ona sira-nia kbiit atu hatene saida mak loos no saida mak sala’. (Ebreu 5:14) Sira sei la husik sira-nia toman diʼak, tan deʼit atu halo ema seluk gosta sira.

 Liafuan aat sira estraga deʼit ita-nia neon no mós ema seluk nian neʼebé rona ida-neʼe. Iha mundu neʼe, iha ona ema barak neʼebé gosta atu tolok. Livru Cuss Control fó sujestaun: “Keta tolok hanesan ema seluk. Kuidadu ho ita-nia liafuan atu nuneʼe situasaun sei la sai aat liután. Hodi halo nuneʼe ita sei sente diʼak liu, no ema seluk mós sei kontente ho ita.”