•  Buat neʼebé estudante sira taʼuk

•  Buat neʼebé Ita bele halo

•  Oinsá atu koʼalia ba Ita-nia mestre?

•  Ita-nia kolega hanoin saida

 Maizumenus estudante hotu hasoru ona mestre neʼebé trata sira la ho justisa, ezije demais ka la laran-diʼak.

•   Luis neʼebé tinan 21 konta ninia istória: “Uluk haʼu iha mestra ida neʼebé gosta atu tolok no la respeitu ninia alunu sira. Karik nia hanoin katak nia bele halo nuneʼe no eskola sei la hasai nia tanba nia ferik ona no lakleur tan nia sei para serbisu nuʼudar mestra.”

•   Melanie neʼebé tinan 25 hanoin-hetan katak uluk ninia mestra ida trata aat nia. Nia hatete: “Haʼu-nia mestra trata aat haʼu tanba haʼu-nia relijiaun la hanesan ho alunu seluk. Nia hatete katak haʼu tenke hatoman an ho situasaun hanesan neʼe.”

 Karik Ita-nia mestre ka mestra mós hanesan neʼe. Maski nuneʼe, Ita bele halo buat balu atu ajuda Ita kontente nafatin atu bá eskola. Halo tuir toʼok sujestaun sira tuirmai neʼe.

•   Koko atu hatoman an. Mestre ida-idak nia hakarak ba estudante mak la hanesan. Koko atu buka-hatene saida mak Ita-nia mestre hakarak husi Ita no hakaʼas an atu kumpre ida-neʼe.

   Bíblia nia prinsípiu: “Ema neʼebé matenek rona no hakarak atu simu hanorin tan.”—Provérbios 1:5.

   “Haʼu rekoñese katak haʼu presiza troka atu tuir haʼu-nia mestra nia hakarak. Tan neʼe haʼu hakaʼas an atu halo buat neʼebé nia husu, tuir dalan neʼebé nia hakarak. Hodi nuneʼe, haʼu bele iha relasaun diʼak ho haʼu-nia mestra.”—Christopher.

•   Respeitu Ita-nia mestre. Koko atu koʼalia ho respeitu ba Ita-nia mestre sira. Labele koʼalia hasoru sira, maski karik sira halo Ita hirus. Hanoin-hetan, mestre sira haree Ita nuʼudar estudante, laʼós nuʼudar kolega.

   Bíblia nia prinsípiu: “Sempre koʼalia ho laran-diʼak hodi tau masin uitoan, atu nuneʼe imi bele hatene oinsá imi tenke hatán ba ema ida-idak.”—Koloso 4:6.

   “Alunu barak la hatudu respeitu ba mestre sira. Tan neʼe, se Ita hakaʼas an atu hatudu respeitu ba Ita-nia mestre, neʼe sei book Ita-nia mestre atu trata Ita ho diʼak liután.”—Ciara.

•   Koko komprende sira. Mestre sira mós ema hanesan ho Ita. Neʼe katak sira mós bele sente laran-taridu no estrese. Tan neʼe keta hanoin: ‘Haʼu-nia mestre laran-aat’ ka ‘Haʼu-nia mestre odi haʼu’.

   Bíblia nia prinsípiu: “Ita hotu halo sala.”—Tiago 3:2.

   “Sai mestre laʼós buat neʼebé fasil. Haʼu labele imajina se haʼu tenke hanorin haʼu-nia kolega eskola sira atu sai labarik neʼebé diʼak no matenek. Haʼu sempre hakaʼas an atu sai estudante neʼebé diʼak atu nuneʼe haʼu bele hamenus haʼu-nia mestra nia estrese.”—Alexis.

•   Konta ba Ita-nia inan-aman. Ita-nia inan-aman sei prontu atu ajuda Ita. Sira hakarak Ita atu hetan susesu iha eskola. No sira mós bele fó sujestaun kona-ba buat neʼebé Ita bele halo bainhira mestre ka mestra halo susar Ita.

   Bíblia nia prinsípiu: “Planu sira sei la sai loos kuandu ema la koʼalia ba malu.”—Provérbios 15:22.

   “Inan-aman iha esperiénsia barak liu kona-ba rezolve problema sira se kompara ho ita. Tan neʼe, rona ba sira-nia konsellu. Neʼe bele lori benefísiu ba ita.”—Olivia.

 Karik Ita presiza koʼalia ba Ita-nia mestre kona-ba susar neʼebé Ita sente tanba ninia hahalok. Se Ita sente taʼuk atu fó sai ida-neʼe, hanoin-hetan katak Ita laʼós atu debate ho Ita-nia mestre, maibé Ita hakarak koʼalia ho nia. Karik Ita sei aprende katak afinál la susar atu koʼalia ba Ita-nia mestre no karik neʼe mós lori rezultadu diʼak.

 Bíblia nia prinsípiu: “Buka atu halo buat neʼebé haburas dame.”—Roma 14:19.

 “Se Ita sente katak Ita-nia mestre la gosta Ita, koko husu ba nia saida mak halo nia la gosta Ita. Hodi nuneʼe Ita bele hatene buat neʼebé Ita presiza hadiʼa husi Ita-nia an.”—Juliana.

 “Diʼak liu atu koʼalia ho Ita-nia mestre, antes aula komesa ka depois aula remata kuandu ema seluk la iha. Fó sai Ita-nia sentimentu ho kalma. Karik Ita-nia mestre bele komprende liután Ita no hafolin Ita-nia hakaʼas an.”—Benjamin.

 ESPERIÉNSIA

 “Haʼu hetan valór aat iha eskola, no haʼu-nia mestra la ajuda haʼu atu bele hadiʼa haʼu-nia valór. Tanba nia, haʼu hanoin atu para eskola.

 “Haʼu hakbesik mestre seluk atu husu sujestaun. No mestre neʼe hatete: ‘Ó-nia mestra la koñese didiʼak ó, no ó mós la koñese didiʼak nia. Ó presiza fó sai buat neʼebé ó sente ba nia. Karik neʼe bele ajuda alunu seluk neʼebé mós durante neʼe sente taʼuk atu koʼalia ba nia.’

 “Loloos haʼu lakohi koʼalia ho haʼu-nia mestra. Maibé haʼu tetu didiʼak mestre neʼe nia liafuan, no haʼu rekoñese katak buat neʼebé nia hatete mak loos. Se haʼu hakarak atu hadiʼa situasaun neʼe, haʼu presiza hakbesik uluk ba haʼu-nia mestra.

 “Loron tuirmai, haʼu hakbesik ba haʼu-nia mestra no hatete ba nia katak haʼu hafolin tebes buat neʼebé nia hanorin iha klase laran no haʼu hakarak atu aproveita didiʼak buat neʼebé nia hanorin. Maibé susar ba haʼu atu komprende ninia matéria no haʼu la hatene atu halo saida. Nia fó haʼu sujestaun balu no oferese atu esplika liután kona-ba matéria depois aula remata ka liuhusi e-mail.

 “Haʼu hakfodak loos! Depois ami-nia diskusaun neʼe, haʼu no haʼu-nia mestra komprende malu liután. No haʼu sente kontente ho haʼu-nia tempu iha eskola.”—Maria.

 Sujestaun: Se Ita iha problema ho Ita-nia mestre, haree ida-neʼe nuʼudar treinu neʼebé bele ajuda Ita bainhira Ita hasoru problema iha futuru. Katie neʼebé tinan 22 hatete: “Maski ita gradua ona husi eskola, ita sei hasoru ema seluk neʼebé iha pozisaun aas liu ita no la hatudu laran-diʼak. Tan neʼe se ita bele rezolve situasaun susar entre ita no ita-nia mestre, neʼe sei ajuda ita atu rezolve situasaun susar hanesan neʼe kuandu ita sai boot.”