“Dala ruma haʼu bele kontrola haʼu-nia ibun, maibé dala ruma haʼu-nia ibun koʼalia kedas antes haʼu-nia kakutak hanoin uluk.”​—James.

 “Bainhira haʼu laran-nakdedar, haʼu koʼalia la hanoin uluk, no bainhira haʼu kalma, haʼu koʼalia barak. Entaun bele dehan katak haʼu sempre koʼalia sala.”​—Marie.

 Bíblia hatete: “Nanál . . . hanesan ahi ida” no, “Ahi neʼebé kiʼik bele han ai-laran neʼebé boot”. (Tiago 3:5, 6) Dala ruma buat neʼebé Ita koʼalia sempre lori problema ba Ita ka lae? Se nuneʼe, informasaun neʼe bele ajuda Ita.

•  Tanbasá haʼu sempre koʼalia buat neʼebé sala?

•  Kontrola Ita-nia ibun

•  Ita-nia kolega sira hanoin saida

 Ita la perfeitu. Bíblia hatete: “Ita hotu sidi dala barak. Se ema ida la halo sala ho ninia liafuan, nia mak ema perfeitu.” (Tiago 3:2, nota-rodapé) Ita la perfeitu, tan neʼe fasil ba ita atu sidi, laʼós deʼit kuandu ita laʼo maibé mós koʼalia buat ruma neʼebé sala.

 “Tanba haʼu-nia kakutak no ibun la perfeitu, klaru katak haʼu labele kontrola haʼu-nia liafuan iha dalan neʼebé perfeitu.”​—Anna.

 Koʼalia barak demais. Bíblia hatete: “Kuandu ema hasai liafuan barak, nia labele hasees an husi sala.” (Provérbios 10:19) Ema neʼebé koʼalia barak maibé rona uitoan baibain sempre hakanek ema ho ninia liafuan.

 “Ema neʼebé matenek liu laʼós katak nia sempre koʼalia. Jesus mak ema neʼebé matenek liu hotu iha mundu, maibé nia mós dala ruma nonook.”​—Julia.

 Liafuan kroʼat. Bíblia hatete: “Liafuan neʼebé koʼalia sai hodi la hanoin uluk mak hanesan sona ho surik.” (Provérbios 12:18) Ezemplu ida kona-ba liafuan neʼebé la hanoin uluk mak liafuan kroʼat atu hatún ema seluk. Ema neʼebé gosta hatún ema seluk, bele dehan, “Haʼu halimar deʼit!” Maibé tuir loloos, halo ema seluk moe neʼe laʼós komik. Bíblia hatete katak ita tenke hadook an husi “koʼalia aat no mós buat hotu neʼebé hakanek malu”.​—Éfeso 4:​31.

 “Haʼu gosta koʼalia kedas, no haʼu gosta halo komik. Maibé tuir loloos haʼu-nia liafuan sempre rona hanesan hatún ema. Ikusmai haʼu kona problema.”​—Oksana.

 Aprende atu kontrola Ita-nia ibun neʼe la fasil, maibé Bíblia nia prinsípiu bele ajuda. Haree toʼok matadalan balu tuirmai.

 “Hanoin deʼit iha imi-nia laran, . . . no . . . nonook deʼit.”​—Salmo 4:4.

 Dala ruma buat diʼak atu halo mak nonook deʼit. Feto joven ida naran Laura hatete: “Se haʼu hirus hela, haʼu-nia laran sei sai manas. Maibé lakleur, neʼe sei lakon. Baibain kuandu kalma ona, haʼu agradese tanba haʼu la koʼalia liafuan neʼebé haʼu sei arrepende.” Entaun, Ita bele kontrola ita-nia ibun kuandu ita hanoin uluk no la ansi atu koʼalia.

 “Tilun koko liafuan sira hanesan nanál koko hahán, loos ka lae?”​—Job 12:11.

 Atu la sente arrepende an kona-ba Ita-nia liafuan, koko hanoin toʼok pergunta sira-neʼe antes Ita atu koʼalia:

•   Neʼe loos ka? Neʼe diʼak ka? Presiza ka?​—Roma 14:19.

•   Haʼu sei sente oinsá se ema seluk koʼalia hanesan neʼe mai haʼu?​—Mateus 7:12.

•   Neʼe sei hatudu respeitu ba ema neʼebé haʼu koʼalia ka lae?​—Roma 12:10.

•   Agora mak tempu diʼak atu koʼalia ka lae?​—Eclesiastes 3:7.

 “Ho haraik an . . . haree ema seluk boot liu fali imi.”​—Filipe 2:3.

 Konsellu neʼe bele ajuda Ita atu hanoin buat diʼak kona-ba ema seluk, neʼe mós ajuda ita atu hanoin uluk antes koʼalia. Oinsá se Ita hakanek tiha ona ema seluk ho Ita-nia liafuan? Hatudu haraik an hodi husu deskulpa, no halo neʼe lalais! (Mateus 5:​23, 24) Depois, hakaʼas an atu kontrola Ita-nia liafuan.