17  போர் செய்வதற்காக பெலிஸ்தியர்கள்+ படைகளைத் திரட்டினார்கள். யூதாவுக்குச் சொந்தமான சோக்கோவில்+ அவர்கள் ஒன்றுகூடி, சோக்கோவுக்கும் அசெக்காவுக்கும்+ இடையில் எபேஸ்-தம்மீம்+ என்ற இடத்தில் முகாம்போட்டார்கள். ²  சவுலும் இஸ்ரவேல் வீரர்களும் திரண்டு வந்து ஏலா பள்ளத்தாக்கில்+ முகாம்போட்டு, பெலிஸ்தியர்களோடு போர் செய்வதற்காக அணிவகுத்து நின்றார்கள். ³  ஒரு பக்கத்திலுள்ள மலையில் பெலிஸ்தியர்கள் நின்றார்கள், இன்னொரு பக்கத்திலுள்ள மலையில் இஸ்ரவேலர்கள் நின்றார்கள், நடுவே பள்ளத்தாக்கு இருந்தது. ⁴  பின்பு, பெலிஸ்தியர்களுடைய முகாமிலிருந்து ஒரு மாவீரன் வந்தான். அவனுடைய பெயர் கோலியாத்.+ அவன் காத்+ நகரத்தைச் சேர்ந்தவன். அவனுடைய உயரம் சுமார் ஒன்பது அடி, ஆறு அங்குலம்.* ⁵  செம்பினால் செய்யப்பட்ட தலைக்கவசத்தையும், செதில்செதிலாக வடிவமைக்கப்பட்ட உடல்கவசத்தையும் அவன் போட்டிருந்தான். அந்தச் செம்பு உடல்கவசத்தின்+ எடை 5,000 சேக்கல்.* ⁶  கால்களில் அவன் செம்புக் கவசங்களைப் போட்டிருந்தான், செம்பினால் செய்யப்பட்ட சிறிய ஈட்டியை+ முதுகுக்குப் பின்னால் வைத்திருந்தான். ⁷  அவன் கையில் வைத்திருந்த பெரிய ஈட்டியின் கம்பு, நெசவாளர்களுடைய தறிக்கட்டையைப் போல்+ இருந்தது. அந்த ஈட்டியின் இரும்பு முனை 600 சேக்கல்* எடையுள்ளதாக இருந்தது. அவனுடைய கேடயத்தைச் சுமந்தவன் அவனுக்கு முன்னால் நடந்துவந்தான். ⁸  பின்பு, கோலியாத் இஸ்ரவேல் படையைப் பார்த்து,+ “எதற்காகப் போருக்கு அணிவகுத்து நிற்கிறீர்கள்? நான் ஒரு பெலிஸ்திய வீரன். ஆனால், நீங்கள் சவுலின் அடிமைகள். என்னோடு மோதுவதற்குச் சரியான ஒரு ஆளை அனுப்புங்கள். ⁹  அவன் என்னோடு சண்டைபோட்டு என்னைக் கொன்றுவிட்டால், நாங்கள் உங்களுக்கு அடிமைகளாக இருப்போம். ஆனால் நான் அவனைக் கொன்றுவிட்டால், நீங்கள் எங்களுக்கு அடிமைகளாக இருப்பீர்கள்” என்று கத்தினான். ¹⁰  அதோடு, “இன்று இஸ்ரவேல் படைக்குச் சவால்விடுகிறேன்.+ என்னோடு மோதுவதற்கு ஒருவனை அனுப்புங்கள், இரண்டில் ஒன்று பார்த்துவிடலாம்!” என்று சொன்னான். ¹¹  அந்தப் பெலிஸ்தியன் பேசியதை சவுலும் இஸ்ரவேலர்களும் கேட்டு பயந்து நடுங்கினார்கள். ¹²  யூதாவிலுள்ள பெத்லகேமைச்+ சேர்ந்த எப்பிராத்தியரான+ ஈசாயின்+ மகன்களில் ஒருவன்தான் தாவீது. ஈசாய்க்கு மொத்தம் எட்டு மகன்கள்+ இருந்தார்கள். சவுலின் காலத்தில் ஈசாய் வயதானவராக இருந்தார். ¹³  இவருடைய மூத்த மகன் எலியாபும்,+ இரண்டாம் மகன் அபினதாபும்,+ மூன்றாம் மகன் சம்மாவும்+ சவுலோடு போருக்குப் போயிருந்தார்கள்.+ ¹⁴  தாவீதுதான் கடைசி மகன்.+ மூத்தவர்கள் மூன்று பேரும் சவுலோடு போயிருந்தார்கள். ¹⁵  சவுலுக்குப் பணிவிடை செய்துவந்த தாவீது, தன்னுடைய அப்பாவின் ஆடுகளை மேய்ப்பதற்காக+ பெத்லகேமுக்குப் போவதும் வருவதுமாக இருந்தான். ¹⁶  இதற்கிடையில், அந்தப் பெலிஸ்தியன் 40 நாட்களுக்குக் காலையிலும் சாயங்காலத்திலும் வந்துவந்து நின்றான். ¹⁷  ஈசாய் தன்னுடைய மகன் தாவீதிடம், “ஒரு எப்பா அளவு* உள்ள இந்த வறுத்த தானியத்தையும் பத்து ரொட்டிகளையும் தயவுசெய்து எடுத்துக்கொண்டு, முகாமில் இருக்கிற உன் அண்ணன்களிடம் சீக்கிரமாகப் போ. ¹⁸  ஆயிரம் வீரர்களின் தலைவனுக்கு இந்தப் பத்துப் பாலாடைக் கட்டிகளைக் கொடு. அதோடு, உன் அண்ணன்கள் பத்திரமாக இருக்கிறார்கள் என்பதற்கு அடையாளமாக அவர்களிடமிருந்து ஏதாவது வாங்கிக்கொண்டு வா” என்று சொன்னார். ¹⁹  பெலிஸ்தியர்களுடன் போர் செய்வதற்காக+ அவர்கள் சவுலோடும் மற்ற எல்லா இஸ்ரவேல் வீரர்களோடும் ஏலா பள்ளத்தாக்கில்+ கூடியிருந்தார்கள். ²⁰  தாவீது விடியற்காலையிலேயே எழுந்து, ஆடுகளை வேறொருவனிடம் ஒப்படைத்துவிட்டு, ஈசாய் சொன்னபடியே எல்லாவற்றையும் எடுத்துக்கொண்டு புறப்பட்டுப் போனான். அவன் முகாமுக்குள் போனபோது படைவீரர்கள் போர் முழக்கம் செய்தபடி அணிவகுத்துப் போய்க்கொண்டிருந்தார்கள். ²¹  இஸ்ரவேல் படையும் பெலிஸ்தியப் படையும் எதிரெதிராக அணிவகுத்து நின்றன. ²²  தாவீது உடனே மூட்டைமுடிச்சுகளைக் காவலனிடம் ஒப்படைத்துவிட்டுப் போர்க்களத்துக்கு நேராக ஓடினான். அங்கு போய்ச் சேர்ந்தவுடன், தன் அண்ணன்களிடம் நலம் விசாரித்தான்.+ ²³  அவர்களிடம் தாவீது பேசிக்கொண்டிருந்த சமயத்தில், காத் நகரத்தைச் சேர்ந்த மாவீரன் கோலியாத்+ பெலிஸ்தியப் படையிலிருந்து வந்து, முன்பு சொல்லிய அதே வார்த்தைகளைச் சொல்லி+ சவால்விட்டான். அதை தாவீது கேட்டான். ²⁴  இஸ்ரவேல் வீரர்கள் கோலியாத்தைப் பார்த்தபோது பயந்துபோய்,+ தலைதெறிக்க ஓடினார்கள். ²⁵  இஸ்ரவேலர்கள் ஒருவருக்கொருவர், “இஸ்ரவேல் படைக்கு முன்னால் வந்து நின்றுகொண்டு சவால் விடுகிற+ மனிதனைப் பார்த்தீர்களா? அவனை ஜெயிக்கிறவனுக்கு ராஜா பெரிய சன்மானம் கொடுப்பாராம், தன்னுடைய மகளையே கல்யாணம் செய்து கொடுப்பாராம்.+ அதுமட்டுமல்ல, இஸ்ரவேலில் அவனுடைய அப்பாவின் குடும்பத்துக்கு விசேஷ சலுகைகளும் செய்வாராம்” என்று சொல்லிக்கொண்டார்கள். ²⁶  தாவீது தனக்குப் பக்கத்தில் நின்றவர்களிடம், “அந்தப் பெலிஸ்தியனைக் கொன்று, இஸ்ரவேலர்களின் பெயரைக் காப்பாற்றுகிறவனுக்கு என்ன கிடைக்கும்? விருத்தசேதனம் செய்யாத அந்தப் பெலிஸ்தியன் எப்படி உயிருள்ள கடவுளின் படைக்குச் சவால்விடலாம்?”+ என்று கேட்டான். ²⁷  அப்போது அந்த வீரர்கள், அவனைக் கொன்றுபோடுகிறவனுக்கு என்னவெல்லாம் கிடைக்கும் என்று சொல்லப்பட்டிருந்ததோ அதை தாவீதிடம் சொன்னார்கள். ²⁸  வீரர்களிடம் தாவீது பேசிக்கொண்டிருப்பதை மூத்த அண்ணன் எலியாப்+ கேட்டபோது அவன்மேல் கோபப்பட்டு, “நீ எதற்கு இங்கே வந்தாய்? இருக்கிற கொஞ்சநஞ்ச ஆடுகளையும் வனாந்தரத்தில் யாரிடம் விட்டுவிட்டு வந்தாய்?+ போர் நடப்பதை வேடிக்கை பார்க்கத்தானே வந்தாய்? எனக்குத் தெரியும், நீ கெட்ட எண்ணம்பிடித்தவன், திமிர்பிடித்தவன்” என்றான். ²⁹  அதற்கு தாவீது, “இப்போது நான் என்ன செய்துவிட்டேன்? ஒரேவொரு கேள்விதானே கேட்டேன்!” என்றான். ³⁰  பின்பு, வேறொருவனிடம் திரும்பி, முன்பு கேட்டதையே கேட்டான்.+ அங்கிருந்தவர்களும் முன்பு சொன்னதையே சொன்னார்கள்.+ ³¹  தாவீது பேசிக்கொண்டிருந்ததைக் கேட்ட சிலர் சவுலிடம் போய் அதைச் சொன்னார்கள். உடனே, சவுல் அவனைக் கூட்டிக்கொண்டு வரச் சொன்னார். ³²  தாவீது சவுலிடம் வந்து, “அந்தப் பெலிஸ்தியனைப் பார்த்து யாரும் பயப்பட வேண்டாம். நான் போய் அவனோடு சண்டை போடுகிறேன்”+ என்று சொன்னான். ³³  அதற்கு சவுல், “அந்தப் பெலிஸ்தியனை எதிர்த்து உன்னால் சண்டை போட முடியாது. நீ சின்னப் பையன்,+ ஆனால் அவன் சின்ன வயதிலிருந்தே ஒரு போர்வீரன்” என்று சொன்னார். ³⁴  அப்போது தாவீது, “உங்கள் அடியேனாகிய நான் என்னுடைய அப்பாவின் ஆடுகளை மேய்த்துவருகிறேன். ஒருநாள் ஒரு சிங்கமும்,+ இன்னொரு நாள் ஒரு கரடியும் வந்து மந்தையிலுள்ள ஆட்டைக் கவ்விக்கொண்டு போனது. ³⁵  நான் அதைத் துரத்திக் கொண்டுபோய், அதன் வாயிலிருந்து ஆட்டைக் காப்பாற்றினேன். அது என்மேல் பாய்ந்தபோது, அதன் தாடையைப் பிடித்து, அதை அடித்துக் கொன்றுபோட்டேன். ³⁶  சிங்கம், கரடி இரண்டையுமே அடித்துக் கொன்றேன். விருத்தசேதனம் செய்யாத இந்தப் பெலிஸ்தியனுக்கும் அதே கதிதான் வரும்! உயிருள்ள கடவுளின் படையிடமே அவன் சவால்விட்டிருக்கிறானே!”+ என்றான். ³⁷  அதோடு, “சிங்கத்தின் பிடியிலிருந்தும் கரடியின் பிடியிலிருந்தும் என்னைக் காப்பாற்றிய யெகோவாதான் இந்தப் பெலிஸ்தியனிடமிருந்தும் என்னைக் காப்பாற்றுவார்”+ என்றான். அதற்கு சவுல், “சரி, புறப்பட்டுப் போ, யெகோவா உன்னோடு இருப்பார்!” என்று சொன்னார். ³⁸  பின்பு, சவுல் தாவீதுக்குத் தன்னுடைய உடைகளைப் போட்டுவிட்டார். அதோடு, செம்பினால் செய்யப்பட்ட தலைக்கவசத்தையும் உடல்கவசத்தையும் போட்டுவிட்டார். ³⁹  அதன்பின், தாவீது சவுலின் வாளைத் தன் உடைமேல் வைத்துக் கட்டிக்கொண்டு, நடந்து பார்த்தான். அதையெல்லாம் போட்டுப் பழக்கமில்லாததால் அவனால் நடக்க முடியவில்லை. அதனால் சவுலிடம், “எனக்குப் பழக்கமில்லாததால் இதையெல்லாம் போட்டுக்கொண்டு என்னால் நடக்க முடியவில்லை” என்று சொல்லி, அவற்றைக் கழற்றிவிட்டான். ⁴⁰  பின்பு, ஆற்றுப்படுகையிலிருந்து* ஐந்து கூழாங்கற்களைத் தேர்ந்தெடுத்து, மேய்ப்பனுக்குரிய தன் பையில் போட்டுக்கொண்டு, தடியையும் கவணையும்+ எடுத்துக்கொண்டு அந்தப் பெலிஸ்தியனின் முன்னால் போனான். ⁴¹  அந்தப் பெலிஸ்தியன் தாவீதை நெருங்கிக்கொண்டே வந்தான், அவனுடைய கேடயத்தைச் சுமந்தவன் அவனுக்கு முன்னால் நடந்துவந்தான். ⁴²  செக்கச்செவேல் என்று அழகாக இருந்த தாவீது அவன் முன்னால் போனான். தாவீது வெறும் சின்னப் பையனாக+ இருந்ததால் அவனை அந்தப் பெலிஸ்தியன் ரொம்பவே இளக்காரமாகப் பார்த்தான். ⁴³  அவன் தாவீதிடம், “ஒரு தடியை எடுத்துக்கொண்டு வந்திருக்கிறாயே, நான் என்ன நாயா?”+ என்று கேட்டான். பின்பு, தன்னுடைய தெய்வங்களின் பெயரைச் சொல்லி அவனைச் சபித்தான். ⁴⁴  அதோடு, “இங்கே வா, உன்னுடைய உடலை வானத்துப் பறவைகளுக்கும் காட்டு மிருகங்களுக்கும் இரையாகப் போடுகிறேன்” என்று மிரட்டினான். ⁴⁵  அதற்கு தாவீது, “நீ வாளோடும் பெரிய ஈட்டியோடும்+ சிறிய ஈட்டியோடும் என்னை எதிர்த்து வருகிறாய். ஆனால் நான் பரலோகப் படைகளின் யெகோவாவுடைய பெயரில் உன்னை எதிர்த்து வருகிறேன்,+ நீ சவால்விட்ட இஸ்ரவேல் படையின் கடவுளுடைய பெயரில் வருகிறேன்.+ ⁴⁶  இன்றைக்கு யெகோவா உன்னை என் கையில் கொடுப்பார்.+ நான் உன்னைக் கொல்வேன், உன் தலையை வெட்டுவேன். இன்று பெலிஸ்திய வீரர்களின் உடல்களை வானத்துப் பறவைகளுக்கும் காட்டு மிருகங்களுக்கும் இரையாகப் போடுவேன். அப்போது, இஸ்ரவேலின் கடவுள்தான் உண்மைக் கடவுள் என்பதைப் பூமியிலுள்ள எல்லாரும் தெரிந்துகொள்வார்கள்.+ ⁴⁷  யெகோவாவுக்குத் தன்னுடைய ஜனங்களைக் காப்பாற்ற வாளோ ஈட்டியோ தேவையில்லை+ என்பதை இங்கே இருக்கிற எல்லாரும் தெரிந்துகொள்வார்கள். இந்தப் போர் யெகோவாவின் போர்,+ உங்கள் எல்லாரையும் அவர் எங்கள் கையில் கொடுப்பார்”+ என்று சொன்னான். ⁴⁸  அந்தப் பெலிஸ்தியன் தாவீதை நெருங்கிக்கொண்டே வந்தான், தாவீதும் அவனைத் தாக்குவதற்காகப் போர்க்களத்தில் வேகமாக ஓடினான். ⁴⁹  தன்னுடைய பையிலிருந்து ஒரு கல்லை எடுத்து, அதைக் கவணில் வைத்துச் சுழற்றி, அந்தப் பெலிஸ்தியனின் நெற்றியைக் குறிபார்த்து வீசினான். அது அந்தப் பெலிஸ்தியனின் நெற்றியைத் துளைத்தது, அவன் அப்படியே தரையில் குப்புற விழுந்தான்.+ ⁵⁰  இப்படி, தாவீது ஒரு கவணையும் கல்லையும் வைத்தே அந்தப் பெலிஸ்தியனை ஜெயித்தான். கையில் வாள் இல்லாமலேயே அவனைத் தாக்கிக் கொன்றுபோட்டான்.+ ⁵¹  பின்பு, ஓடிப்போய் அந்தப் பெலிஸ்தியன்மேல் ஏறி நின்று, அந்தப் பெலிஸ்தியனின் வாளை உருவி,+ அவனுடைய தலையை வெட்டி, அவன் செத்துவிட்டதை ஊர்ஜிதப்படுத்தினான். தங்களுடைய மாவீரன் செத்துப்போனதை பெலிஸ்தியர்கள் பார்த்தபோது அங்கிருந்து தலைதெறிக்க ஓடினார்கள்.+ ⁵²  உடனே, இஸ்ரவேல் வீரர்களும் யூதாவின் வீரர்களும் கத்திக் கூச்சல் போட்டுக்கொண்டே பள்ளத்தாக்கிலிருந்து+ எக்ரோனின்+ நுழைவாசல்கள் வரைக்கும் பெலிஸ்தியர்களைத் துரத்திக்கொண்டு போனார்கள். சாராயிமுக்குப்+ போகும் சாலை தொடங்கி காத் மற்றும் எக்ரோன் வரைக்கும் பெலிஸ்தியர்களை வழியெல்லாம் வெட்டிச் சாய்த்தார்கள். ⁵³  பெலிஸ்தியர்களை விரட்டிப் பிடித்து சாகடித்த பின்பு அவர்களுடைய முகாம்களுக்கு வந்து அவற்றைச் சூறையாடினார்கள். ⁵⁴  பின்பு, தாவீது அந்தப் பெலிஸ்தியனுடைய தலையை எருசலேமுக்குக் கொண்டுவந்தான். அந்தப் பெலிஸ்தியனுடைய ஆயுதங்களை தன்னுடைய வீட்டில் வைத்துக்கொண்டான்.+ ⁵⁵  அந்தப் பெலிஸ்தியனோடு சண்டை போட தாவீது புறப்பட்டுப் போனதை சவுல் பார்த்தபோது தன்னுடைய படைத் தளபதி அப்னேரிடம்,+ “இவன் யாருடைய பையன்?”+ என்று கேட்டார். அதற்கு அப்னேர், “ராஜாவே, உங்கள் உயிர்மேல் ஆணையாகச் சொல்கிறேன்,* எனக்குத் தெரியாது!” என்றான். ⁵⁶  அதற்கு ராஜா, “அப்படியென்றால், இவன் யாருடைய பையன் என்று விசாரி” என்றார். ⁵⁷  தாவீது அந்தப் பெலிஸ்தியனைக் கொன்றுவிட்டுத் திரும்பியதும் அப்னேர் அவனை சவுலிடம் கூட்டிக்கொண்டு வந்தான். தாவீது அந்தப் பெலிஸ்தியனுடைய தலையைக்+ கையில் வைத்திருந்தான். ⁵⁸  அப்போது சவுல் அவனிடம், “நீ யாருடைய பையன்?” என்று கேட்டார். அதற்கு தாவீது, “பெத்லகேம் ஊரைச் சேர்ந்த+ உங்கள் அடிமை ஈசாயின்+ பையன்” என்று சொன்னான்.