தீவிரவாத தாக்குதல் நடக்கும்போது நம் மனதுக்குள் நிறைய கேள்விகள் வரலாம்: ‘கடவுளுக்கு நம்மேல் அக்கறை இருக்கிறதா? ஏன் இந்த கெட்ட விஷயங்கள் நடக்கின்றன? தீவிரவாதம் a என்றைக்காவது ஒழியுமா? என்னுடைய பயத்தை எப்படி சமாளிக்கலாம்?’ இவற்றுக்கெல்லாம் பைபிள் திருப்தியான பதில் தருகிறது.

 கடவுள் வன்முறையையும் தீவிரவாதத்தையும் வெறுக்கிறார். (சங்கீதம் 11:5; நீதிமொழிகள் 6:16, 17) கடவுளுடைய பிரதிநிதியாக இயேசு இந்த பூமிக்கு வந்தபோது, தன்னுடைய சீஷர்கள் ஒருசமயம் வன்முறையை கையில் எடுத்தார்கள். அவர்கள் அப்படி செய்ததை இயேசு கண்டித்தார். (மத்தேயு 26:50-52) சிலர், கடவுளுடைய பெயரில் வன்முறையில் இறங்குகிறார்கள். ஆனால், கடவுள் இதையெல்லாம் அங்கீகரிப்பது இல்லை. அவர்கள் செய்கிற ஜெபத்தைக்கூட அவர் கேட்பதில்லை.—ஏசாயா 1:15.

 கஷ்டப்படுகிறவர்களையும் தீவிரவாத சம்பவங்களால் பாதிக்கப்பட்டவர்களையும் பார்க்கும்போது கடவுள் ரொம்ப வேதனைப்படுகிறார். அப்படி பாதிக்கப்பட்ட ஒவ்வொருவர்மேலும் கடவுள் ரொம்ப அக்கறையாக இருக்கிறார். (சங்கீதம் 31:7; 1 பேதுரு 5:7) வன்முறையை கண்டிப்பாக கடவுள் ஒழித்துக்கட்டுவார் என்று பைபிள் சொல்கிறது.—ஏசாயா 60:18.

 தீவிரவாதத்தின் அடிப்படை காரணத்தை பற்றி பைபிள் இப்படி சொல்கிறது: “மனுஷனை மனுஷன் அடக்கி ஆண்டிருப்பதால் அவனுக்குக் கேடுதான் வந்திருக்கிறது.” (பிரசங்கி 8:9) சரித்திரத்தின் பக்கங்களை புரட்டிப் பார்த்தால், அதிகாரத்தில் இருப்பவர்கள் ரொம்ப கொடூரமான முறைகளை பயன்படுத்தி மற்றவர்களை அடக்கி ஒடுக்கியிருக்கிறார்கள். அப்படி ஒடுக்கப்பட்ட மக்கள், திரும்ப போராடுவதற்கு தீவிரவாதத்தை கையில் எடுக்கிறார்கள்.—பிரசங்கி 7:7.

 பயத்தை உண்டாக்குகிற சூழ்நிலைகளையும் வன்முறையையும் ஒழித்துக்கட்டுவதாக கடவுள் சொல்லியிருக்கிறார். பூமியில் சமாதானத்தைக் கொண்டுவருவதாக வாக்கு கொடுத்திருக்கிறார். (ஏசாயா 32:18; மீகா 4:3, 4) அவர் இதையெல்லாம் செய்யப்போகிறார்:

•   தீவிரவாதத்தின் முக்கிய காரணத்தை இல்லாமல் செய்துவிடுவார். கடவுள் மனித அரசாங்கங்களை நீக்கிவிட்டு தன்னுடைய அரசாங்கத்தை கொண்டுவருவார். அது உலகம் முழுவதும் ஆட்சி செய்யும். அந்த அரசாங்கத்தின் ராஜாவான இயேசு, எல்லாரையும் சரிசமமாக நடத்துவார். வன்முறையையும் அடக்குமுறையையும் ஒழித்துக்கட்டுவார். (சங்கீதம் 72:2, 14) அந்த சமயத்தில் யாருமே தீவிரவாதத்தை கையில் எடுக்க மாட்டார்கள். ஏனென்றால், மக்கள் எல்லாரும் “அளவில்லாத சமாதானத்தையும், முடிவில்லாத சந்தோஷத்தையும் அனுபவிப்பார்கள்.”—சங்கீதம் 37:10, 11.

•   தீவிரவாதத்தால் ஏற்பட்ட பாதிப்புகளை சரி செய்வார். தீவிரவாதத்தால் ஏற்பட்ட ஆறாத காயங்களை கடவுள் சரி செய்வார். அது உடலளவில் இருந்தாலும் சரி, மனதளவில் இருந்தாலும் சரி! (ஏசாயா 65:17; வெளிப்படுத்துதல் 21:3, 4) இறந்துபோனவர்களை மறுபடியும் உயிரோடு கொண்டு வருவதாக வாக்கு கொடுத்திருக்கிறார். சமாதானமான பூமியில் அவர்களை மறுபடியும் வாழ வைப்பார்.—யோவான் 5:28, 29.

 கடவுள் சீக்கிரமாக செயலில் இறங்குவார் என்று பைபிள் சொல்கிறது. ஆனால், ‘கடவுள் ஏன் இவ்வளவு காலம் தீவிரவாதத்தை விட்டுவைத்திருக்கிறார்?’ என்று ஒருவேளை நீங்கள் யோசிக்கலாம். அதற்கு பதில் தெரிந்துகொள்ள, கடவுள் ஏன் இன்னும் கஷ்டத்தை தீர்க்காமல் இருக்கிறார்? என்ற வீடியோவை பாருங்கள்.