யெகோவாதான் உண்மைக் கடவுள் என்று பைபிள் சொல்கிறது; அவர்தான் எல்லாவற்றையும் படைத்தவர். (வெளிப்படுத்துதல் 4:11) தீர்க்கதரிசிகளான ஆபிரகாமும் மோசேயும் இயேசுவும்கூட அவரைத்தான் வணங்கினார்கள். (ஆதியாகமம் 24:27; யாத்திராகமம் 15:1, 2; யோவான் 20:17) அவர் ஒரேவொரு இனத்தாருக்கு மட்டுமல்ல, “பூமி முழுவதுக்கும்” கடவுளாக இருக்கிறார்.—சங்கீதம் 47:2.

 பைபிளில் வெளிப்படுத்தப்பட்டுள்ள யெகோவா என்ற பெயர் தனித்தன்மை வாய்ந்த பெயராக இருக்கிறது. (யாத்திராகமம் 3:15; சங்கீதம் 83:18) “ஆகும்படி” என்ற அர்த்தத்தைத் தருகிற எபிரெய வினைச்சொல்லில் இருந்து இது வருகிறது; அதனால், ஏராளமான அறிஞர்கள் இந்தப் பெயருக்கு “ஆகும்படி செய்கிறவர்” என்ற அர்த்தம் இருப்பதாகச் சொல்கிறார்கள். யெகோவா படைப்பாளராக, தன்னுடைய நோக்கத்தை நிறைவேற்றுகிறவராக இருப்பதால், இந்தப் பெயரின் விளக்கம் ஏகப் பொருத்தமாக இருக்கிறது. (ஏசாயா 55:10, 11) யெகோவா என்ற பெயரைப் பற்றி மட்டுமல்ல, அந்தப் பெயரின் சொந்தக்காரரைப் பற்றியும் தெரிந்துகொள்வதற்கு, முக்கியமாக அன்பு என்ற அவருடைய பிரதான குணத்தைப் பற்றித் தெரிந்துகொள்வதற்கு, பைபிள் உதவுகிறது.—யாத்திராகமம் 34:5-7; லூக்கா 6:35; 1 யோவான் 4:8.

 டெட்ராகிரமாட்டன் என்று அழைக்கப்படுகிற நான்கு எபிரெய மெய்யெழுத்துக்கள் יהוה (ய்ஹ்வ்ஹ்) அடங்கிய கடவுளுடைய பெயரின் ஆங்கில மொழிபெயர்ப்புதான் ஜெஹோவா. தமிழில் யெகோவா. பண்டைய எபிரெய மொழியில் இந்தப் பெயர் எப்படி உச்சரிக்கப்பட்டது என்று நமக்குத் தெரியாது. ஆனால், ஆங்கில மொழியில் “ஜெஹோவா” என்ற பெயர் காலம் காலமாகப் பயன்படுத்தப்பட்டு வருகிறது; முதன்முதலாக, 1530-ல் வெளியிடப்பட்ட வில்லியம் டின்டேலின் பைபிள் மொழிபெயர்ப்பில் இது காணப்படுகிறது. a

பண்டைய எபிரெய மொழியில் கடவுளுடைய பெயர் எப்படி உச்சரிக்கப்பட்டதென நமக்கு ஏன் தெரியாது?

 பண்டைய எபிரெய மொழியில் உயிரெழுத்துக்கள் இல்லை, மெய்யெழுத்துக்கள் மட்டும்தான் இருந்தன. எபிரெய மொழியை வாசிக்கத் தெரிந்த ஒருவர் எபிரெய வார்த்தைகளைச் சரியான உயிரெழுத்துக்களோடு சேர்த்து எளிதாக வாசித்துவிடுவார். ஆனால், எபிரெய வேதாகமம் (“பழைய ஏற்பாடு”) எழுதி முடிக்கப்பட்ட பிறகு, சில யூதர்கள் கடவுளுடைய பெயரை உச்சரிப்பது தவறு என்ற மூடநம்பிக்கையைப் பின்பற்ற ஆரம்பித்தார்கள். வசனங்களை அவர்கள் சத்தமாக வாசிக்கும்போது கடவுளுடைய பெயர் வந்தால், அதை உச்சரிக்காமல், அதற்குப் பதிலாக “கர்த்தர்” அல்லது “கடவுள்” என்று உச்சரித்தார்கள். நூற்றாண்டுகள் செல்லச்செல்ல, இந்த மூடநம்பிக்கை பல இடங்களுக்குப் பரவியது; கடைசியில், பண்டைய உச்சரிப்பு அப்படியே மறைந்துபோய்விட்டது. b

 கடவுளுடைய பெயர் “யாவே” என உச்சரிக்கப்பட்டதாகச் சிலர் சொல்கிறார்கள், ஆனால் மற்றவர்கள் ஆளுக்கொரு விதமாகச் சொல்கிறார்கள். லேவியராகமப் புத்தகத்தின் ஒரு பகுதியைக் கொண்ட சவக்கடல் சுருள் ஒன்றில், கடவுளுடைய பெயர் யாவோ என்று கிரேக்கில் எழுத்துப்பெயர்ப்பு செய்யப்பட்டிருக்கிறது. இதைத் தவிர, யாயே, யாபே, யாவூவே என்றெல்லாம் அது உச்சரிக்கப்பட்டிருக்கலாம் என்று ஆரம்பக் கால கிரேக்க எழுத்தாளர்கள் சொல்கிறார்கள். ஆனால், எது சரியான உச்சரிப்பு என்று நம்மால் உறுதியாகச் சொல்ல முடியாது. c

பைபிளிலுள்ள கடவுளுடைய பெயரைக் குறித்த தவறான கருத்துகள்

 தவறான கருத்து: எபிரெய மொழியில் கடவுளுடைய பெயரின் சரியான உச்சரிப்பு யாருக்குமே தெரியாது என்பதால், பைபிளில் அந்தப் பெயரைப் பயன்படுத்தக் கூடாது.

 உண்மை: எல்லா மொழியினரும் தன்னுடைய பெயரை ஒரே விதமாகத்தான் உச்சரிக்க வேண்டுமென்று கடவுள் எதிர்பார்ப்பது போல் இந்தக் கருத்து உள்ளது. ஆனால், வெவ்வேறு மொழிகளைப் பேசிய கடவுளுடைய பூர்வகால வணக்கத்தார் வெவ்வேறு விதமாகத்தான் பெயர்களை உச்சரித்தார்கள்.

 உதாரணத்துக்கு, இஸ்ரவேல் நியாயாதிபதி யோசுவாவின் பெயரை எடுத்துக்கொள்ளுங்கள். எபிரெய மொழி பேசிய முதல் நூற்றாண்டு கிறிஸ்தவர்கள், இந்தப் பெயரை யெஹோஷுவா என்று உச்சரித்தார்கள், ஆனால் கிரேக்க மொழி பேசியவர்கள் ஈஷூஸ் என்று உச்சரித்தார்கள். யோசுவாவின் எபிரெயப் பெயருடைய கிரேக்க மொழிபெயர்ப்பு பைபிளில் இருப்பது, கிறிஸ்தவர்கள் பொதுவாகத் தங்களுடைய மொழியில் உச்சரிக்கப்பட்டபடியே பெயர்களை உச்சரித்தார்கள் என்பதைக் காட்டுகிறது.—அப்போஸ்தலர் 7:45; எபிரெயர் 4:8.

 கடவுளுடைய பெயர் மொழிபெயர்க்கப்படுவதிலும் இதே நியமம் பொருத்தப்படலாம். கடவுளுடைய பெயரின் துல்லியமான உச்சரிப்புக்குக் கொடுக்கிற முக்கியத்துவத்தைவிட அந்தப் பெயர் பைபிளில் இருக்க வேண்டிய இடங்களில் இருக்க வேண்டும் என்பதற்குத்தான் இன்னும் அதிக முக்கியத்துவம் கொடுக்க வேண்டும்.