1. Kerea 2 Korintus 3:1-3 makatul᷊ung si kitẹ makaěna mẹ̌tul᷊ung taumata sarang ibaptisẹ̌ ene kai sěmbaụ kehormatan? (Pěmanda gambarẹ̌ sampul.)

KEREA pěndangu su tempong nakasilo měngangěndung Alkitapẹ̌ su sidangu nibaptisẹ̌? I kau tantu mal᷊uasẹ̌! (Mat. 28:19) Kụ, mạeng i kau něněntiro Alkitapẹ̌ si sie, i kau tantu sěbạe mal᷊uasẹ̌ nakasilo i sie nibaptisẹ̌. (1 Tes. 2:19, 20) Měngangěndung ene botonge někoạ kemajuan kụ nibaptisẹ̌ ual᷊ingu i kau dingangu taumata wal᷊inẹ su sidang seng nẹ̌tawakal᷊i gunang mẹ̌tul᷊ung si sie. Hakị u ene, sěngkatau měngangěndung Alkitapẹ̌ apang nibaptisẹ̌ botonge isěbạ ”suratẹ̌ daralo” gunang měnaněntirone lai gunang sidang.​—Basa 2 Korintus 3:1-3.

2. (a) Kakiwal᷊o penting apa harusẹ̌ tiněnang i kitẹ, kụ kawe nụe? (b) Su tempo kerea botonge ikawera i kitẹ seng něngahạ pěngangěndungang Alkitapẹ̌? (Pěmanda catatan kaki.)

² Su ral᷊ungu ěpạ taung ini, piạ ěndịu 10.000.000 měngangěndung Alkitapẹ̌ * su patikụ dunia nilaporẹ̌ sabang wul᷊ang. Ini sěbạe makạlaherang. Kụ su ral᷊ungu ěpạ taung ene, sabang taung piạ nal᷊iu wọu 280.000 taumata nibaptisẹ̌. Kerea i kitẹ botonge mẹ̌tul᷊ung měngangěndung Alkitapẹ̌ gunang ibaptisẹ̌? Yehuwa bědang něgělị kesempatan su taumata gunang makoạ Sahidi-Ne. Hakị u ene, i kitẹ mapulu mẹ̌tawakal᷊i mẹ̌tul᷊ung měngangěndung Alkitapẹ̌ tadeạu botonge lighạ měkoạ kemajuan kụ ibaptisẹ̌. Tempone seng maraning masue!​—1 Kor. 7:29a; 1 Ptr. 4:7.

3. Apa sarung ěndungang i kitẹ su pěngangěndungang ini?

 ³ Ual᷊ingu hal᷊ẹ̌ měkoạ muritẹ̌ sěbạe penting orasẹ̌ ini, Badan Pimpinan nẹ̌kiwal᷊o su manga kantor cabang, apa wotonge koateng gunang mẹ̌tul᷊ung limembong lawọ měngangěndung Alkitapẹ̌ tadeạu ibaptisẹ̌. Hakị u ene, su pěngangěndungang ini dingangu pěngangěndungang tuhụe, i kitẹ sarung měngěndung bọu manga perintis piạ lawọ pengalaman, utusan injil, dingangu bọu pengawas wilayah. * (Amsal 11:14; 15:22) I sire nělahẹ apa harusẹ̌ koatengu měnaněntiro Alkitapẹ̌ dingangu měngangěndung tadeạu pěngangěndungang Alkitapẹ̌ ene limembong lawọ gunane su měngangěndung Alkitapẹ̌. Su pěngangěndungang ini, i kitẹ sarung měngěndung lima hal᷊ẹ̌ harusẹ̌ koatengu měngangěndung Alkitapẹ̌ tadeạu botonge měkoạ kemajuan sarang ibaptisẹ̌.

4. Kawe nụe bědang kurang mạeng kětạeng měpakẹ mahal᷊i tempo gunang měngěndung Alkitapẹ̌?

⁴ Lawọ anạu sěmbaụ i kitẹ seng něněntiro pěngangěndungang Alkitapẹ̌ su těngong tukadẹ̌. Maning ene kai cara mapaelẹ̌ gunang měnětạ měngěndung Alkitapẹ̌, pěngangěndungang kerene biasane kětạeng mal᷊ighạ kụ tawe kẹ̌koateng sabang misa. Tadeạu měngangěndung mapulu turusẹ̌ měngěndung, piạ penyiar nẹ̌dorong nomoru telpon měngangěndung ene. Hakị u ene, i sire botonge měnelpon arau měndoho pesan si sie gunang měmahiạ manga hal᷊ẹ̌ mapaelẹ̌ bọu Alkitapẹ̌. I sire aramanung seng bul᷊ange něngěndung mal᷊ighạ kerene. Katewe, mạeng měngangěndung kětạeng měpakẹ mahal᷊i tempo gunang měngěndung Alkitapẹ̌, apa i sie sarung měkoạ kemajuan sarang ibaptisẹ̌? Ěndịu tala.

5. Bawerang i Yesus sude su Lukas 14:27-33 botonge paketang i kitẹ gunang mẹ̌tul᷊ung měngangěndung Alkitapẹ̌?

⁵ Su sěngkatempo, Yesus bọu naul᷊ị apa harusẹ̌ koatengu taumata mạeng i sie mapulu makoạ tumatol᷊eng i Yesus. I sie něgělị sasihing soal u tau mapulu měmangung menara dingangu sěngkatau datu mapulu mẹ̌sekẹ. Yesus naul᷊ị tau mapulu měmangung menara ene harusẹ̌ ”kumaiang kal᷊imona kụ měndekeng biayane”, kụ datu mapulu mẹ̌sekẹ lai harusẹ̌ ”kumaiang kal᷊imona kụ mẹ̌dorong sasasa” gunang makasingkạ apa manga prajurite botonge makauntung. (Basa Lukas 14:27-33.) Nal᷊ahẹ, Yesus masingkạ mạeng taumata mapulu makoạ murite, i sie harusẹ̌ kahěngang-hěngang masingkạ apa harusẹ̌ koatenge mạeng makoạ muriti Yesus. Ual᷊ingu ene, měngangěndung Alkitapẹ̌ harusẹ̌ měngěndung sabang misa.  Kerea i kitẹ botonge měmahangsang si sie gunang měkoạ ene?

6. Apa wotonge koateng i kitẹ tadeạu měngangěndung Alkitapẹ̌ měkoạ kemajuan?

⁶ Humotong, i kau botonge měngěndung limembong marěngụ dingange. Aramanung, sabang mẹ̌tiwo i kau botonge mělahẹ nal᷊iu wọu sěmbaụ ayatẹ̌. Mạeng měngangěndung seng nawiasa měngěndung diọ marěngụ, kěnang pẹ̌kiwal᷊o si sie apa wotonge i rua měngěndung apidu kụkaiang. Sasimbahu taghuangu wal᷊e sarung makal᷊ahẹ apa měngěndung Alkitapẹ̌ ene penting si sie arau tala. Gunang mẹ̌tul᷊ung si sie tadeạu masahawụ měkoạ kemajuan, i kau botonge mẹ̌kiwal᷊o apa i sie mapulu měngěndung duang sul᷊ẹ sěngkamisa. Katewe, piạ lai harusẹ̌ koateng i kitẹ.

7. Kerea sěngkatau měnaněntiro Alkitapẹ̌ botonge měkoạ persiapan pakapia těntal᷊ang bědang tawe něněntiro?

⁷ Ual᷊ingu i kau měnaněntiro Alkitapẹ̌, i kau harusẹ̌ měkoạ persiapan pakapia těntal᷊ang bědang tawe něněntiro Alkitapẹ̌. Humotong, basạe bahan sarung ěndungang kụ parikěsạe manga ayate. Pẹ̌tawakal᷊ịe tadeạu pokok utama mal᷊ahẹ su tiněnanu. Pẹ̌tiněna soal u judul, subjudul, kakiwal᷊o pěngangěndungang, ayatẹ̌ basa, gambarẹ̌, dingangu haghing video nělahẹ topik ene. Kụ apidu mẹ̌tiněna soal u měngangěndung, pẹ̌tiněnạe kerea caranu mělahẹ informasi ene dingangu cara sederhana tadeạu měngangěndung gampang makaěna dingangu měkoạ ene.​—Neh. 8:8; Amsal 15:28a.

8. Bọu bawerang Rasul Paulus su Kolose 1:9, 10, apa kaěndungang i kitẹ soal u mẹ̌doa gunang měngangěndung Alkitapẹ̌?

⁸ Bọu ene lai, pẹ̌doạe si Yehuwa soal u měngangěndung dingangu soal u kebutuhan měngangěndung. Pẹ̌dorong si Yehuwa gunang mẹ̌tul᷊ung si kau tadeạu makakanoạ naunge. (Basa Kolose 1:9, 10.) Kěnang pẹ̌tiněna hal᷊ẹ̌ sude aramanung masigěsạ kaěnang dingangu tarimạkengu měngangěndung. Turusẹ̌ pẹ̌tahěndung timonanu ute mẹ̌tul᷊ung si sie měkoạ kemajuan sarang ibaptisẹ̌.

9. Kerea carane měnaněntiro botonge mẹ̌tul᷊ung měngangěndung gunang měkoạ persiapan? Lahẹko.

⁹ Su apang měngangěndung seng masau něngěndung, i kitẹ mělẹ̌harapẹ̌ i sie sarung měngarěga apa seng nikoạ i Yehuwa dingangi Yesus, kụ mapulu měngěndung limembong mal᷊awọ. (Mat. 5:3, 6) Tadeạu makaěbạ lawọ gunane bọu pěngangěndungang, měngangěndung Alkitapẹ̌ harusẹ̌ fokus su tempong měngěndung Alkitapẹ̌. Gunang mẹ̌tul᷊ung si sie měkoạ ene, lahẹko si  sie kawe nụe penting měkoạ persiapan kal᷊imona, ene kai mẹ̌basa dingangu mẹ̌tiněna kerea ene botonge koateng su pěbawiahe. Kerea měnaněntiro botonge mẹ̌tul᷊ung si sie měkoạ persiapan? Pěkoạ persiapan sěngkasio kụ todẹko kerea carane. * Lahẹko carane makaěbạ sasimbahu kakiwal᷊ong pěngangěndungang, kụ todẹko lai cara měgělị tatiala su piram baụ bawera tadeạu makatul᷊ung si sie mẹ̌tahěndung sasimbahe. Bọu ene, pẹ̌dorong si sie gunang sumimbahẹ̌ měpakẹ bawerane hala. Mạeng i sie měpakẹ bawerane hala, i kau sarung makasingkạ apa i sie nakaěna mapia bahan ene arau tala. Katewe, bědang piạ lai hal᷊ẹ̌ wal᷊inẹ harusẹ̌ koatengu.

10. Kawe nụe měngangěndung Alkitapẹ̌ harusẹ̌ mẹ̌basa Alkitapẹ̌ ěllo-ěllo, kụ kerea tadeạu i sie makaěbạ gunane bọu pẹ̌bawasang Alkitapẹ̌?

¹⁰ Selain měngěndung Alkitapẹ̌ dingangu sabang misa, piạ lai harusẹ̌ koatengu měngangěndung sẹ̌sane sabang ěllo. I sie harusẹ̌ mẹ̌bawěke dingangi Yehuwa. Ene mangal᷊ene i sie harusẹ̌ dumaringihẹ̌ si Yehuwa dingangu mẹ̌bisara si Sie. I sie botonge dumaringihẹ̌ si Yehuwa mạeng mẹ̌basa Alkitapẹ̌ ěllo-ěllo. (Yos. 1:8; Mz. 1:1-3) Todẹko si sie carane měpakẹ ”Jadwal Pembacaan Alkitab” su jw.org. * Tadeạu i sie makaěbạ gunane bọu pẹ̌bawasang Alkitapẹ̌, bahangsangko i sie tadeạu mẹ̌tiněna apa niul᷊ịu Alkitapẹ̌ soal i Yehuwa dingangu kerea i sie botonge měkoạ apa niěndungange su pěbawiahe.​—Kis. 17:11; Yak. 1:25.

11. Kerea tadeạu měngangěndung botonge mẹ̌doa dingangu cara nihino, kụ kawe nụe penting i sie masau mẹ̌doa si Yehuwa?

¹¹ Bahangsangko měngangěndung gunang mẹ̌bisara si Yehuwa, carane ute mẹ̌doa ěllo-ěllo. Pẹ̌doạe dingangu kaguwạu naung su tětạu dingangu pěngěngsuengu pěngangěndungang, kụ sěbạko lai soal u měngangěndung. Su tempong i sie makaringihẹ̌ daroanu, i sie sarung měngěndung kerea mẹ̌doa dingangu kaguwạu naung, kụ mẹ̌doa su Mawu Yehuwa lumiung areng i Yesus Kristus. (Mat. 6:9; Yoh. 15:16) Kěnang pẹ̌tiněna mạeng měngangěndung mẹ̌basa Alkitapẹ̌ ěllo-ěllo (dumaringihẹ̌ si Yehuwa) dingangu mẹ̌doa (mẹ̌bisara si Yehuwa), i sie sarung limembong mědal᷊ahapị mapia dingangu Mawu Yehuwa. (Yak. 4:8) Mạeng i sie mẹ̌bawěke dingangi Yehuwa ěllo-ěllo, ene makatul᷊ung si sie gunang měkoạ kemajuan sarang ibaptisẹ̌. Apa lai wotonge makatul᷊ung si sie?

12. Kerea měnaněntiro botonge mẹ̌tul᷊ung měngangěndung tadeạu mědal᷊ahapị dingangi Yehuwa?

¹² I kitẹ mapulu měngangěndung měngěndung soal i Yehuwa. Katewe, apa niěndungange ene harusẹ̌ lai masuang su ral᷊ungu naunge, tadeạu i sie mapulu měkoạ apa seng niěndungange. Yesus něněntiro lawọ hal᷊ẹ̌ su taumata, kụ i sire puluang měngěndung bọu i sie. Katewe, taumata timol᷊e si sie ual᷊ingu apa nitěntirone nakakanoạ naung i sire. (Luk. 24:15, 27, 32) Měngangěndung harusẹ̌ makaěna i sie botonge mědal᷊ahapị dingangu Mawu Yehuwa, kụ i sie lai harusẹ̌ makaěna Yehuwa botonge makoạ i Amange, Mawune, dingangu Hapịe. (Mz. 25:4, 5) Su tempong měngěndung Alkitapẹ̌ dingange, koạ pakal᷊ahẹ manga sipatu Mawu. (Kel. 34:5, 6; 1 Ptr. 5:6, 7) I kau botonge měkoạ ene tawẹ soale topik apa niěndungang i rua. Tul᷊ungko měngangěndung gunang makasilo kakěndagẹ̌, kapiang naung, dingangu tatal᷊ěntụ i Yehuwa. Yesus naul᷊ị parenta ”kahumotongange dingangu paling penting” ene kai ”kěndagẹ̌ko Yehuwa Mawunu”. (Mat. 22:37, 38) Pẹ̌tawakal᷊ịe mẹ̌tul᷊ung měngangěndung gunang kuměndagẹ̌ si Yehuwa.

13. Gělịko contoh kerea carane mẹ̌tul᷊ung měngangěndung měngěndung soal u sipati Yehuwa.

¹³ Su tempong mẹ̌bawěke dingangu měngangěndung, paul᷊ị apa nakakoạ si kau kiměndagẹ̌ si Yehuwa. Ini makatul᷊ung měngangěndung makaěna i sie harusẹ̌ makoạ hapị i Yehuwa dingangu měngěndung gunang kuměndagẹ̌ si Yehuwa. (Mz. 73:28) Contone, mạeng piạ bawera su bukẹ̌ pěngangěndungang dingangu su ayatẹ̌ kụ nělahẹ kakěndagẹ̌, pelesa, kal᷊aadilẹ̌ arau kawasang i Yehuwa kụ ene nakakanoạ naungu, paul᷊ị ene su měngangěndung, kụ paul᷊ị ene kai sěmbaụ alasang i kau kiměndagẹ̌ si Amang su sorga. Piạ lai hal᷊ẹ̌ wal᷊inẹ botonge koatengu měngangěndung tadeạu měkoạ kemajuan sarang ibaptisẹ̌.

14. Apa niul᷊ịu Ibrani 10:24, 25 soal u pěngangibadang kụ sarung makatul᷊ung měngangěndung měkoạ kemajuan?

¹⁴ I kitẹ kěbị mapulu měngangěndung měkoạ kemajuan kụ ibaptisẹ̌. Sěmbaụ cara penting mẹ̌tul᷊ung si sire ene kai měmahangsang si sire gunang duměnta su pěngangibadang. Měnaněntiro piạ lawọ pengalaman naul᷊ị měngangěndung masahawụ měkoạ kemajuan mạeng i sire duměnta su pěngangibadang. (Mz. 111:1) Pirang katau měnaněntiro naul᷊ị su měngangěndung Alkitapẹ̌, i sire wotonge makaěndung hal᷊ẹ̌ wal᷊inẹ su pěngangibadang kụ tawe nikaěbạ i sire su tempong něngěndung Alkitapẹ̌ su  wal᷊e. Pẹ̌basạe Ibrani 10:24, 25 dingangu měngangěndung, kụ lahẹ si sie apa gunane mạeng i sie duměnta su pěngangibadang. Todẹ si sie video Apa Kẹ̌koateng su Pěngangibadang i Kami? * Tul᷊ungko měngangěndung tadeạu mẹ̌pěndang pěngangibadang sabang misa ene kai bageang penting su pěbawiahe.

15. Apa wotonge koateng i kitẹ gunang měmahangsang měngangěndung tadeạu masau duměnta su pěngangibadang?

¹⁵ Apa wotonge koatengu mạeng měngangěndung bědang tawe diměnta su pěngangibadang arau kětạeng diměnta pẹ̌sěngsul᷊ẹ? Pakasěmangatẹ̌e měmahiạ apa niěndungangu su pěngangibadang. Ene limembong makawahangsang si sie sul᷊ungu kětạeng měgausẹ̌ si sie gunang duměnta. Pěgělị si sie majalah Měhabarẹ̌ arau Bageang Pěngangěndungang Pelayanan dingangu Pěbawiahẹ̌ Kristen kawuhuange kụ sarung ěndungang su pěngangibadang. Todẹ si sie apa sarung ěndungang su pěngangibadang tuhụe, kụ pẹ̌kiwal᷊o bageang sude mapulu daringihange. Apa nikasilo dingangu nikaringihu měngangěndung ene su tempo humotong i sie diměnta su pěngangibadang Sahiding Yehuwa, ene tantu limembong mapaelẹ̌ sul᷊ungu apa nikasilo dingangu nikaringihe su pěngangibadang wal᷊inẹ. (1 Kor. 14:24, 25) I sie sarung mẹ̌sombang dingangi sire apang makoạ pẹ̌tatěnoěng si sie kụ sarung makatul᷊ung si sie měkoạ kemajuan sarang ibaptisẹ̌.

16. Manga hal᷊ẹ̌ apa harusẹ̌ koateng i kitẹ tadeạu měngangěndung botonge měkoạ kemajuan kụ ibaptisẹ̌, kụ apa sarung ěndungang i kitẹ su pěngangěndungang tuhụe?

¹⁶ Hakị u ene, apa wotonge koateng i kitẹ tadeạu měngangěndung měkoạ kemajuan kụ ibaptisẹ̌? I kitẹ botonge mẹ̌tul᷊ung měngangěndung tadeạu mẹ̌pěndang pěngangěndungang Alkitapẹ̌ ene kai penting, carane ute měmahangsang si sie gunang měngěndung sabang misa dingangu měkoạ persiapan kal᷊imona gunang pěngangěndungang. I kitẹ lai mapulu měmahangsang si sie gunang mẹ̌bawěke dingangi Yehuwa ěllo-ěllo lai mědal᷊ahapị dingang’E. I kitẹ lai mapulu měmahangsang si sie duměnta su pěngangibadang. (Pěmanda kotak ” Koatengu Měngangěndung”.) Su pěngangěndungang tuhụe, i kitẹ sarung měngěndung lima hal᷊ẹ̌ harusẹ̌ koateng i kitẹ tadeạu měngangěndung botonge měkoạ kemajuan kụ ibaptisẹ̌.