1. Kawe nụe Yehuwa napẹ̌sul᷊ung watangeng’E dingangu sěngkatau matimadẹ̌ wawine?

SU ZAMAN Nabi Yesaya, Mawu Yehuwa naul᷊ị su ělang’E, ”Botonge sěngkatau wawine miwul᷊eng anạe? . . . Maning i sie miwul᷊e, Iạ tawe miwul᷊eng i kau.” (Yes. 49:15) Yehuwa tawe masau mapẹ̌sul᷊ung watangeng’E dingangu sěngkatau matimadẹ̌ wawine. Katewe, sini i Sie někoạ ene. Yehuwa něpakẹ hubungan matimadẹ̌ wawine dingangu anạe gunang měnodẹ kaguwạu kakěndag’E su manga ělang’E. Lawọ matimadẹ̌ wawine piạ pěndang mẹ̌sul᷊ung dingangu sěngkatau saudari arenge Jasmin. I sie nẹ̌bera, ”Su tempong sěngkatau wawine napěnusu anạe, secara emosi i rẹ̌dua nakoạ sěbạe marani, kụ ene matahang su kanandụu pěbawiahẹ̌.”

2. Kerea pěndang i Yehuwa su tempong sěngkatau anạ’E nẹ̌těngkarau bọu i Sie?

² Yehuwa měmẹ̌manda su tempong sěngkatau anạ’E nẹ̌těngkarau bọu sidang dingangu seng tawe někoạ hal᷊ẹ̌ měnginjilẹ̌. Hakị u ene, i Sie tantu sěbạe nasusah naung su tempong hiwune manga ělang’E nakoạ tawe aktif * sabang taung.

3. Apa ikẹ̌kapulung Yehuwa?

³ Lawọ anạu sěmbaụ apang tawe aktif samurine saụ nẹ̌bal᷊ị sarang sidang, kụ i kitẹ mal᷊uasẹ̌ su tempong i sire nẹ̌bal᷊ị. Yehuwa mapulu i sire mẹ̌bal᷊ị, kụ i kitẹ lai kerene. (1 Ptr. 2:25) Kerea i kitẹ botonge mẹ̌tul᷊ung si sire tadeạu saụ mẹ̌bal᷊ị? Těntal᷊ang bědang tawe simimbahẹ̌ kakiwal᷊o ene, mapaelẹ̌ mạeng i kitẹ masingkạ kawe nụe pirang katau něngědo diměnta su pěngangibadang dingangu seng tawe něnginjilẹ̌.

4. Ual᷊ingu hal᷊ẹ̌, apa nariadi su pirang katau ělang i Yehuwa?

⁴ Pirang katau seng němala hal᷊ẹ̌ nakoạ limembong penting su pěbawiahi sire. Sěngkatau saudara mětẹ̌tana su Asia Tenggara, arenge Hung, * nẹ̌bera, ”Iạ něpakẹ tumanịu lawọ tempo dingangu katatoghasẹ̌ su tampạ pělahal᷊ẹ̌kang. Iạ tawe matahuěna. Iạ nẹ̌pikirẹ̌ mạeng iạ piạ limembong lawọ doitẹ̌, iạ botonge limembong mapaelẹ̌ mẹ̌tahamawu si Yehuwa. Hakị u ene, iạ něpakẹ lawọ tempo gunang měhal᷊ẹ̌. Iạ něnětạ tawe diměnta něngibadah kụ samurine iạ něngědo něngibadah. Setang něpakẹ dunia ini gunang měkoạ taumata měngědo mẹ̌tahamawu si Yehuwa.”

5. Kerea haghing masalah piạ pěngarune su sěngkatau saudari?

⁵ Pirang katau lai nasigěsạ ual᷊ingu piạ lawọ masalah. I Anne, sěngkatau saudari su Inggris, piạ anạe limang katau. I sie nẹ̌bera, ”Sěngkatau anạku piạ kurange su wadange. Bọu ene lai, sěngkatau anạku wawine nisěbang bọu sidang, kụ sěngkatau anạku esẹ nakahombang sakị mental. Iạ sěbạe nasusah naung hakị u iạ něngědo diměnta su pěngangibadang dingangu něngědo něnginjilẹ̌. Samurine, iạ nakoạ tawe aktif.” I kitẹ lai tantu nasusah naung ual᷊ingu i Anne dingangu kěluargane, lai anạu sěmbaụ wal᷊inẹ nakahombang masalah kerene.

6. Kawe nụe sěngkatau ělang i Yehuwa sarung mẹ̌těngkarau bọu sidang, mạeng i sie tawe tumol᷊e sasasa su Kolose 3:13?

⁶ Basa Kolose 3:13. Pirang katau ělang i Yehuwa natědụ naung ualingu kakanoạu anạu sěmbaụ wal᷊inẹ. Rasul Paulus masingkạ pẹ̌sěngsul᷊ẹ aramanung i kitẹ piạ ”alasang gunang mẹ̌pědu” su anạu sěmbaụ. I kitẹ aramanung nakahombang barang tawẹ adile. Mạeng tawe maingatẹ̌, i kitẹ sarung mẹ̌pědu. Pěndang pědu makakoạ sěngkatau ělang i Yehuwa mẹ̌těngkarau bọu sidang. Pẹ̌tiněna pengalaman i Pablo, sěngkatau saudara su Amerika Selatan. I sie nitoke někoạ barang nẹ̌sal᷊a, kụ suwụe, i sie nikailangengu hak istimewa su sidang. Apa nikoạe? I sie nẹ̌bera, ”Iạ nẹ̌pědu, kụ kakạrěngụe iạ nẹ̌těngkarau bọu sidang.”

7. Apa pengaruh pěndang nẹ̌sal᷊a su ělang i Yehuwa?

⁷ Bọu ene lai, pěndang nẹ̌sal᷊a aramanung turusẹ̌ mělẹ̌hukung anạu sěmbaụ apang bọu limawang hukungu Mawu su tempong tamai. Ene nakakoạ i sie nẹ̌pěndang tawe layak makatarimạ kakěndagu Mawu. Maning i sie seng nẹ̌tobatẹ̌ dingangu nakatarimạ tatal᷊ěntụ, aramanung i sie nẹ̌pěndang tawe layak makoạ ělangu Mawu. Sěngkatau saudara arenge Fransisco nẹ̌pěndang kerene. I sie naul᷊ị, ”Iạ nakaěbạ sasasa těgasẹ̌ ual᷊ingu někoạ kakanoạ amoral. Maning humotong iạ turusẹ̌ dụděnta su pěngangibadang, iạ sěbạe nasusah naung kụ nẹ̌pěndang tawe layak ene su tal᷊oarang manga ělang i Yehuwa. Iạ turusẹ̌ nẹ̌pěndang nẹ̌sal᷊a, kụ iạ lai nẹ̌pěndang Yehuwa tawe něgělị ampung si siạ. Samurine, iạ něngědo nědal᷊ahapị dingangu anạu sěmbaụ su sidang.” Kerea pěndangu soal u anạu sěmbaụ apang nakahombang masalah kere seng niwisarang i kitẹ? Apa i kau timal᷊ěntụ si sire? Kụ limembong penting, kerea pěndang i Yehuwa soal i sire?

8. Apa Yehuwa niwul᷊e su ělang’E apang bọu nẹ̌tahamawu si Sie? Lahẹko.

⁸ Yehuwa tawe miwul᷊e su ělang’E apang bọu nẹ̌tahamawu si Sie katewe su sěngkatempo něngědo nědal᷊ahapị dingangu  manga ělang’E. Yehuwa tawe niwul᷊e apa seng nikoạ u tau ene gunang i Sie. (Ibr. 6:10) Nabi Yesaya něpakẹ sasihing mapaelẹ̌ gunang mělahẹ kerea Yehuwa mapadul᷊i su manga ělang’E. I sie němohẹ, ”Kere gembala i Sie sarung měngurusẹ̌ manga domba-Ne. Dingangu takiah’E, i Sie sarung měngomol᷊ẹ̌ manga anạu domba, kụ i Sie sarung mẹ̌bawa si sire su sěbạ’E”. (Yes. 40:11) Kerea pěndangu Gembala Mawantugẹ̌ su tempong sěmbaụ domba-Ne nẹ̌těngkarau bọu komol᷊angu manga domba-Ne? Yesus něnodẹ sipati Yehuwa su tempong i sie nẹ̌kiwal᷊o su manga murite, ”Kerea tumuhụ si kamene? Mạeng sěngkatau piạ 100 domba kụ sěmbaụ napal᷊idẹ̌, i sie sarung měněntang 99 dombane su wul᷊udẹ̌ kụ dumal᷊eng mědeạ domba napal᷊idẹ̌ ene, to? Mạeng i sie nakaěbạ domba ene, i sie tantu limembong mal᷊uasẹ̌ ual᷊ingu nakaěbạ domba sěmbaụ ene sul᷊ungu ual᷊ingu 99 domba wal᷊inẹ kụ tawe napal᷊idẹ̌.”​—Mat. 18:12, 13.

9. Kerea gembala mapia su zaman Alkitapẹ̌ měkoạ manga dombane? (Pěmanda gambarẹ̌ sampul.)

⁹ Kawe nụe i kitẹ botonge mapẹ̌sul᷊ung Yehuwa dingangu sěngkatau gembala? Ual᷊ingu sěngkatau gembala mapia su zaman Alkitapẹ̌ sěbạe mapadul᷊i su manga dombane. Contone i Daud. I sie limawang singa dingangu beruang gunang měndiagạ komol᷊angu dombane. (1 Sam. 17:34, 35) Sěngkatau gembala mapia tantu masingkạ mạeng sěmbaụ dombane nailang. (Yoh. 10:3, 14) Gembala kerene sarung měněntang 99 dombane su kandang arau ititipẹ̌ su hapịe, kụ dumal᷊eng mědeạ sěmbau domba ene. Yesus něpakẹ sasihing ene gunang měněntiro sěmbaụ katěngadẹ̌ penting ini: ”I Amangku su sorga madiri sarang sěngkatau bọu taumata dararodọ ini mailang.”​—Mat. 18:14.

10. Tumuhụ Yehezkiel 34:11-16, Yehuwa nẹ̌diandi sarung měkoạ apa su manga domba-Ne apang seng nailang?

¹⁰ Yehuwa makěndagẹ̌ si kitẹ sěngkatau-sěngkatau, sarang lai su ”taumata dararodọ” kụ seng nẹ̌těngkarau bọu komol᷊angu domba-Ne. Limiung Nabi Yehezkiel, Mawu nẹ̌diandi i Sie sarung mědeạ  domba-Ne apang seng nailang kụ mẹ̌tul᷊ung si sire tadeạu saụ masehatẹ̌ secara rohani. I Sie lai nělahẹ apa sarung koateng’E gunang měnal᷊amatẹ̌ si sire. Apa sarung koateng’E ene mẹ̌sul᷊ung dingangu apa kẹ̌koatengu gembala su Israel. (Basa Yehezkiel 34:11-16.) Humotong, gembala sarung mědeạ domba nailang ene. I sie harusẹ̌ mẹ̌tawakal᷊i dingangu měpakẹ lawọ tempo. Su tempong nakaěbạ domba ene, i sie sarung mẹ̌bawa domba ene sarang komol᷊angu dombane. Samurine, mạeng domba ene nal᷊esẹ arau nikal᷊unusang, gembala ene sarung měngundang lesẹe kụ měgělị kaěng su domba ene. Manga penatua, gembala gunang ”komol᷊angu dombang Mawu”, lai harusẹ̌ měkoạ kerene si sire apang seng nẹ̌těngkarau bọu sidang. (1 Ptr. 5:2, 3) Manga penatua sarung mědeạ si sire, mẹ̌tul᷊ung si sire saụ mẹ̌bal᷊ị sarang sidang, dingangu měgělị kaěng rohani si sire. *

11. Gembala mapia nakaěna apa?

¹¹ Gembala mapia nakaěna domba botonge mapal᷊idẹ̌. Mạeng sěmbaụ domba nẹ̌těngkarau bọu komol᷊angu domba, gembala tawe měměbahẹ̌ si sie. Pẹ̌tiněna contoh bọu Mawu su tempong nẹ̌tul᷊ung manga ělang’E apang su sěngkatempo nẹ̌těngkarau bọu i Sie.

12. Kerea Yehuwa někoạ si Yunus?

¹² Nabi Yunus timal᷊ang bọu tugase. Maning kerene, Yehuwa tawe masahawụ menghakimi si Yunus. Kere gembala mapia, Yehuwa něnal᷊amatẹ̌ si Yunus dingangu nẹ̌tul᷊ung si sie saụ nakaěbạ katatoghasẹ̌ gunang měkoạ tugase. (Yun. 2:7; 3:1, 2) Bọu ene, Yehuwa něpakẹ sasuang labung akẹ gunang mẹ̌tul᷊ung si Yunus makaěna pěbawiahu taumata kai maarěga. (Yun. 4:10, 11) Apa wotonge kaěndungang i kitẹ? Manga penatua lai tawe wotonge masahawụ menghakimi si sire apang nakoạ tawe aktif. Katewe, manga penatua mẹ̌tawakal᷊i makaěna apa nakakoạ domba ene nẹ̌těngkarau. Kụ su tempong domba ene saụ nẹ̌bal᷊ị sarang i Yehuwa, manga penatua sarung turusẹ̌ měnodẹ kakěndagẹ̌ si sie.

13. Apa wotonge kaěndungang i kitẹ bọu reaksing i Yehuwa su bawerang měmamohẹ Mazmur 73?

 ¹³ Měmamohẹ Mazmur 73 nakadodọ naung su tempong nakasilo pẹ̌bawiahu taumata ral᷊akị mal᷊uasẹ̌. I sie nẹ̌tiněna apa piạ gunane měkoạ kapulung Mawu. (Mz. 73:12, 13, 16) Kerea reaksing i Yehuwa? Yehuwa tawe nẹ̌pědu si sie. Yehuwa němala bawerang pemazmur ene niwohẹ su Alkitapẹ̌. Samurine, pemazmur ene nasadarẹ̌ makoạ hapị i Yehuwa ene kai hal᷊ẹ̌ limembong kapaelange su pěbawiahẹ̌. (Mz. 73:23, 24, 26, 28) Apa těntirone si kitẹ? Manga penatua tawe wotonge masahawụ menghakimi si sire apang něnětạ ragu apa piạ gunane mẹ̌tahamawu si Yehuwa. Sul᷊ungu mẹ̌pědu si sire, manga penatua harusẹ̌ mẹ̌tawakal᷊i makaěna kawe nụe i sire nẹ̌bisara dingangu někoạ kerene. Mạeng měkoạ ene, manga penatua botonge měpakẹ Alkitapẹ̌ gunang měnoghasẹ̌ si sire.

14. Kawe nụe i Elia harusẹ̌ itul᷊ung, kụ kerea Yehuwa nẹ̌tul᷊ung si sie?

¹⁴ Nabi Elia timal᷊ang bọu Ratu Izebel. (1 Raj. 19:1-3) I sie nẹ̌pěndang seng tawẹ apa nabi wal᷊inẹ mětẹ̌tahamawu si Yehuwa. I sie lai nẹ̌pěndang apa seng nikoạe tawẹ apa gunane. Elia sěbạe nasusah naung sarang mapulu mate. (1 Raj. 19:4, 10) Yehuwa tawe nẹ̌pědu si Elia. Yehuwa naul᷊ị si Elia i sie tawe sẹ̌sane, kụ i sie botonge mangimang su kawasang Mawu. Bọu ene lai, Yehuwa naul᷊ị bědang piạ lawọ hal᷊ẹ̌ harusẹ̌ koateng i Elia. Yehuwa dimaringihẹ̌ su tempong Elia nẹ̌běke kaghaghěnggange kụ Yehuwa něgělị tugasẹ̌ buhu si sie. (1 Raj. 19:11-16, 18) Apa těntirone  si kitẹ? I kitẹ kěbị, kahumotongange manga penatua, harusẹ̌ mapia měkoạ dombang Yehuwa. Tawẹ soale tau ene něnodẹ susang naunge arau nẹ̌pěndang tawe layak makatarimạ tatal᷊ěntụ i Yehuwa, manga penatua sarung dumaringihẹ̌ pakapia su tempong i sie mẹ̌běke pěndange. Bọu ene, i sire sarung mẹ̌tawakal᷊i měkoạ domba nailang ene mangimang i sie maarěga si Yehuwa.

15. Tumuhụ Yohanes 6:39, kerea pěndang i Yesus su manga dombang i Amange?

¹⁵ Yehuwa mapulu harusẹ̌ kerea pěndang i kitẹ su domba-Ne seng nailang? Yesus nakoạ pẹ̌tatěnoěng si kitẹ. I sie masingkạ kěbị dombang Yehuwa kai maarěga si Yehuwa. Hakị u ene, Yesus nẹ̌tawakal᷊i nẹ̌tul᷊ung ”tau Israel apang mẹ̌sul᷊ungu domba napal᷊idẹ̌” gunang mẹ̌bal᷊ị sarang i Yehuwa. (Mat. 15:24; Luk. 19:9, 10) Yesus kai gembala mapia, hakị u ene i sie nẹ̌tawakal᷊i tadeạu tawe kailangengu dombang Yehuwa.​—Basa Yohanes 6:39.

16-17. Pěndangu penatua harusẹ̌ kerea soal u mẹ̌tul᷊ung si sire apang seng nẹ̌těngkarau bọu i Yehuwa? (Pěmanda kotak ” Pěndangu Domba Nailang”.)

¹⁶ Rasul Paulus němahangsang manga penatua su sidang Efesus gunang mẹ̌těno si Yesus. ”I kamene harusẹ̌ mẹ̌tul᷊ung apang lome kụ harusẹ̌ mẹ̌tahěndung bawerang i Tuang Yesus, ’Limembong mal᷊uasẹ̌ měgělị sul᷊ungu měnarimạ.’” (Kis. 20:17, 35) Nal᷊ahẹ, manga penatua piạ tanggung jawab khusus gunang měngurusẹ̌ manga dombang i Yehuwa. I Salvador, sěngkatau penatua su Spanyol, nẹ̌bera, ”Su tempong iạ nẹ̌tiněna kerea Yehuwa sěbạe mapadul᷊i su manga domba-Ne apang seng nailang, iạ nawahangsang gunang mẹ̌tawakal᷊i sěngapang botonge gunang mẹ̌tul᷊ung si sire. Ia nakaěna Yehuwa mapulu iạ mẹ̌padul᷊i si sire.”

¹⁷ Kěbị anạu sěmbaụ apang nisěbạ su pěngangěndungang ini kụ seng nẹ̌těngkarau bọu i Yehuwa, seng nitul᷊ung kụ saụ nẹ̌bal᷊ị sarang i Yehuwa. Orasẹ̌ ini, limembong lawọ dombang Yehuwa seng napal᷊idẹ̌ kụ mapulu saụ mẹ̌bal᷊ị. Pěngangěndungang tuhụe sarung mělahẹ apa wotonge koateng i kitẹ gunang mẹ̌tul᷊ung si sire mẹ̌bal᷊ị sarang i Yehuwa.