1. Kere nilahẹ su 3 Yohanes 3, 4, apa makakoạ si kitẹ mal᷊uasẹ̌?

RASUL YOHANES tantu mal᷊uasẹ̌ su tempong nakaringihẹ̌ taumata apang nitul᷊ung karạe gunang měngěndung katěngadẹ̌ tatapẹ̌ masatia nẹ̌tahamawu si Yehuwa. I sire timatěngo lawọ masalah, kụ Yohanes nẹ̌tawakal᷊i něnoghasẹ̌ pangangimangu tau Kristen masatia ene, ual᷊ingu i sire seng nakoạ kere anạ rohanine. Kerene lai, i kitẹ tantu sěbạe mal᷊uasẹ̌ su tempong anạ i kitẹ arau i sire apang něngěndung katěngadẹ̌ dingangi kitẹ, něgělị pěbawiahi sire si Yehuwa kụ turusẹ̌ nẹ̌tahamawu si Sie.​—Basa 3 Yohanes 3, 4.

2. Apa timonang manga suratẹ̌ niwohẹ i Yohanes?

² Su taung 98 M, ěndịu i Yohanes mětẹ̌tanạ su Efesus arau maraning sene. Aramanung, i sie něngal᷊ing sene su apang nawebasẹ̌ bọu penjara su pulo Patmos. Ěndịu su tempo ene, rohkẹ̌ i Yehuwa něngahạ si sie gunang měmohẹ tatělu suratẹ̌. Timonang manga suratẹ̌ ene ute gunang měmahangsang tau Kristen masatia tadeạu měndiagạ pangangimang i sire si Yesus tatapẹ̌ matoghasẹ̌ dingangu tadeạu turusẹ̌ dumal᷊eng su ral᷊eng katěngadẹ̌.

3. Kakiwal᷊o apa sarung simbaheng i kitẹ?

³ Su tempo ene, kate Yohanes rasul bědang biahẹ̌, kụ i sie gụgěnggang soal u pengaruh guru palsu su manga sidang. * (1 Yoh. 2:18, 19, 26) Manga guru palsu ene něngaku masingkạ su Mawu, katewe i sire tawe timuhụ parentang Yehuwa. Su pěngangěndungang ini, i kitẹ sarung měngěndung soal u sasasa nighělị i Yohanes kụ sumimbahẹ̌ tatělu kakiwal᷊o ini: Apa mangal᷊ene rumal᷊eng su ral᷊eng katěngadẹ̌? Sasal᷊ukạ apa kẹ̌kahombangeng i kitẹ? Dingangu kerea i kitẹ botonge mẹ̌tul᷊ung  taumata wal᷊inẹ tadeạu tatapẹ̌ su ral᷊eng katěngadẹ̌?

4. Tumuhụ 1 Yohanes 2:3-6 dingangu 2 Yohanes 4, 6, apa harusẹ̌ koateng i kitẹ tadeạu dumal᷊eng su ral᷊eng katěngadẹ̌?

⁴ Tadeạu rumal᷊eng su ral᷊eng katěngadẹ̌, i kitẹ harusẹ̌ masingkạ katěngadẹ̌ su ral᷊ungu Hengetangu Mawu, Alkitapẹ̌. Bọu ene lai, i kitẹ harusẹ̌ ’tumuhụ manga parentang [Yehuwa]’. (Basa 1 Yohanes 2:3-6; 2 Yohanes 4, 6.) Yesus nakoạ pẹ̌tatěnoěng kapaelange soal u tumuhụ si Yehuwa. Hakị u ene, sěmbaụ cara penting i kitẹ tumuhụ si Yehuwa ene kai mẹ̌těno si Yesus.​—Yoh. 8:29; 1 Ptr. 2:21.

5. I kitẹ harusẹ̌ mangimang apa?

⁵ Tadeạu turusẹ̌ dumal᷊eng su ral᷊eng katěngadẹ̌, i kitẹ harusẹ̌ mangimang Yehuwa kai Mawung katěngadẹ̌, kụ kěbị apa niwera-Ne su Hengetang’E, Alkitapẹ̌, ene kahěngang. I kitẹ lai harusẹ̌ mangimang i Yesus kai Mesias seng niriandi. Orasẹ̌ ini, lawọ taumata ragu Yesus seng nihengkẹ nakoạ Datung Kararatuangu Mawu. Yohanes seng něgělị laingatẹ̌ piạ ”lawọ tahapěngakal᷊ẹ̌” sarung měmal᷊idẹ̌ taumata apang tawe kahěngang-hěngang mangimang katěngadẹ̌ soal i Yehuwa dingangi Yesus. (2 Yoh. 7-11) Yohanes němohẹ, ”I sai tahapẹ̌konti ene, mạeng bal᷊inẹ i sie seng nẹ̌děndilẹ̌ i Yesus kai Kristus?” (1 Yoh. 2:22) Tadeạu tawe kaakal᷊eng, i kitẹ harusẹ̌ měngěndung Hengetangu Mawu. Mạeng měkoạ ene, i kitẹ sarung makasingkạ si Yehuwa dingangi Yesus. (Yoh. 17:3) Kụ i kitẹ sarung mangimang i kitẹ seng nakaěbạ katěngadẹ̌.

6. Sasal᷊ukạ apa kẹ̌kahombangengu mangangudạ?

⁶ Kěbị tau Kristen harusẹ̌ maingatẹ̌ tadeạu tawe kaakal᷊engu těntirong taumata. (1 Yoh. 2:26) Mangangudạ kahumotongange harusẹ̌ maingatẹ̌ soal u bahaya ini. I Alexia, * sěngkatau saudari bọu Prancis umure 25 su taunge, nẹ̌bera, ”Su tempong bědang měsẹ̌sikol᷊ah, iạ něngěndung soal u evolusi dingangu haghing těntirong taumata, kụ manga hal᷊ẹ̌ ene nakakoạ si siạ ragu su katěngadẹ̌. Su sěngkatempo, iạ puluang su manga těntiro ene. Katewe, iạ nẹ̌pěndang iạ tawe wotonge kětạeng měnarimạ kerene apa nitěntiro su sikol᷊ah, kụ tawe měgělị kesempatan si Yehuwa gunang mẹ̌bisara.” Alexia něngěndung bukẹ̌ Kehidupan—Bagaimana Asal Mulanya? Melalui Evolusi atau  Penciptaan? Pirang kamisa tuhụe, i sie seng tawe ragu. I sie nẹ̌bera, ”Iạ něgělị bukti su watangengku Alkitapẹ̌ ene lohone kai katěngadẹ̌. Kụ iạ nakasingkạ měbiahẹ̌ tuhụ atorangu Alkitapẹ̌ sarung makakoạ si siạ mal᷊uasẹ̌ dingangu makapěndang dame su naung.”

7. I kitẹ harusẹ̌ maingatẹ̌ tadeạu tawe měkoạ apa, kụ kawe nụe?

⁷ Kěbị tau Kristen, mangudạ arau maghurang, harusẹ̌ maingatẹ̌ abe sarang mẹ̌tahamawu si Yehuwa katewe su tempo mẹ̌sul᷊ung měkẹ̌koạ barang dal᷊akị. Yohanes nẹ̌bera i kitẹ tawe wotonge dumal᷊eng su ral᷊eng katěngadẹ̌ kụ su tempo mẹ̌sul᷊ung měbẹ̌biahẹ̌ amoral. (1 Yoh. 1:6) Mạeng mapulu Yehuwa mal᷊uasẹ̌ si kitẹ, i kitẹ harusẹ̌ sěntiniạ mẹ̌tahěndung Yehuwa měmẹ̌manda kěbị apa kẹ̌koateng i kitẹ. Maning taumata wal᷊inẹ tawe nakasilo apa kẹ̌koateng i kitẹ, Yehuwa nakasilo kěbị ene.​—Ibr. 4:13.

8. I kitẹ tawe wotonge měnarimạ apa?

⁸ I kitẹ tawe wotonge měnarimạ tiněnang dunia ini soal u dosa. Rasul Yohanes němohẹ, ”Mạeng i kitẹ mẹ̌bera, ’I kitẹ tawe marosa,’ ene něnodẹ i kitẹ nẹ̌konti su watangeng i kitẹ.” (1 Yoh. 1:8) Su zaman i Yohanes, taumata murtad měbẹ̌bera taumata botonge turusẹ̌ měkoạ dosa apidu tatapẹ̌ mědal᷊ahapị dingangu Mawu. Orasẹ̌ ini, i kitẹ lai měbẹ̌biahẹ̌ su tal᷊oarang taumata piạ pěndang kerene. Lawọ měngẹ̌ngaku mangimang su Mawu, katewe tawe setuju dingangu pěndangu Mawu soal u dosa, něngělembo mạeng soal u seks. Piạ piram baụ kakanoạ seksual nẹ̌sal᷊a su těngong Yehuwa, katewe tumuhụ si sire ene tawẹ apa-apa mạeng i sire mapulu měkoạ ene.

9. Apa gunane mạeng mangangudạ turusẹ̌ tumol᷊e sasasang Alkitapẹ̌?

⁹ Mangangudạ Kristen aramanung masigěsạ tatapẹ̌ piạ tiněna nihino soal u seks ual᷊ingu hapị su sikol᷊ah arau su pělahal᷊ẹ̌kang mětẹ̌tawakal᷊i měmal᷊ui tiněnang i sire. Ene nariadi si Aleksandar. I sie nẹ̌běke, ”Pirang katau mahuala  su sikol᷊ahku němaksa si siạ gunang měkoạ hubungan seks dingangi sire. Ual᷊ingu iạ tawẹ apa sintịku, i sire naul᷊ị iạ homoseksual.” Mạeng i kau nakahombang sasal᷊ukạ kerene, pẹ̌tahěndung mạeng i kau turusẹ̌ tumol᷊e sasasang Alkitapẹ̌, i kau sarung tatapẹ̌ maarěga, masehatẹ̌, tawe mẹ̌sasěsilẹ̌, dingangu tatapẹ̌ mědal᷊ahapị dingangu Mawu. Kụ, sabang i kau makal᷊awang sasal᷊ukạ, i kau sarung limembong gampang měkoạ barang mapia. Pẹ̌tahěndung lai, tiněna nẹ̌sal᷊a bọu dunia ini soal u seks ene asal᷊e bọu Setang. Hakị u ene, su tempong i kau tawe timol᷊e tiněnang dunia ini, i kau ”nakawatạ si ral᷊akị”.​—1 Yoh. 2:14.

10. Kerea 1 Yohanes 1:9 makatul᷊ung si kitẹ mẹ̌tahamawu si Yehuwa dingangu hati nurani burěsi?

¹⁰ I kitẹ něngakui Yehuwa piạ hakẹ̌e gunang měnantu kakanoạ kerea botonge isěbạ dosa. Kụ i kitẹ mẹ̌tawakal᷊i tadeạu tawe měkoạ dosa. Katewe, mạeng i kitẹ někoạ dosa, i kitẹ harusẹ̌ měngaku pẹ̌sasal᷊ang i kitẹ si Yehuwa su ral᷊ungu daroa. (Basa 1 Yohanes 1:9.) Kụ mạeng i kitẹ někoạ dosa gěguwạ, i kitẹ harusẹ̌ makitul᷊ung su manga penatua ual᷊ingu i sire seng nipileng Yehuwa gunang měngurusẹ̌ si kitẹ. (Yak. 5:14-16) Katewe, i kitẹ abe turusẹ̌ mẹ̌pěndang nẹ̌sal᷊a ual᷊ingu apa nikoạ i kitẹ su tempong tamai. Kawe nụe? Ual᷊ingu i Amang i kitẹ makěndagẹ̌ seng něnadia tatěbusẹ̌ Ahus’E tadeạu dosang i kitẹ botonge ampungang. Mạeng Yehuwa maul᷊ị i Sie sarung měgělị ampung su taumata apang kahěngang-hěngang mẹ̌tobatẹ̌, i Sie mang měkoạ ene. Hakị u ene, i kitẹ botonge tatapẹ̌ mẹ̌tahamawu si Yehuwa dingangu hati nurani burěsi.​—1 Yoh. 2:1, 2, 12; 3:19, 20.

11. Kerea měndiagạ watangeng i kitẹ bọu těntiro makal᷊ome pangangimang?

¹¹ I kitẹ tawe wotonge měnarimạ těntirong taumata murtad. Dongkeng sidang Kristen nirarisị, Setang něpakẹ lawọ tahapěngakal᷊ẹ̌  gunang makal᷊ome pangangimangu manga ělangu Mawu. Hakị u ene, i kitẹ harusẹ̌ masingkạ sude těntiro nihino dingangu sude konti. * Manga sědụ i kitẹ aramanung něpakẹ Internet arau media sosial tadeạu makal᷊ome pangangimang i kitẹ si Yehuwa dingangu makal᷊ome kakěndagi kitẹ su anạu sěmbaụ. Abe mangimang manga konti ene ual᷊ingu ene asal᷊e bọu Setang.​—1 Yoh. 4:1, 6; Why. 12:9.

12. Kawe nụe i kitẹ harusẹ̌ limembong mangimang su katěngadẹ̌ seng niěndungang i kitẹ?

¹² Gunang lumawang sasal᷊ukạ bọu Setang, i kitẹ harusẹ̌ měnoghasẹ̌ pangangimang i kitẹ si Yesus dingangu mangimang i sie seng nipakẹ i Yehuwa gunang měkoạ kapulu-Ne. I kitẹ lai harusẹ̌ mangimang si sire apang nipakẹ i Yehuwa gunang měngahạ organisasi-Ne. (Mat. 24:45-47) Tadeạu pangangimang i kitẹ matoghasẹ̌, i kitẹ harusẹ̌ marading měngěndung Hengetangu Mawu. Kụ hasile, pangangimang i kitẹ sarung makoạ kere kalu kụ hamụe nasuẹ̌ sěbạe maral᷊ung su ěntana. Paulus lai nẹ̌bisara hal᷊ẹ̌ mẹ̌sul᷊ung su tempong němohẹ suratẹ̌ gunang sidang Kolose. I sie naul᷊ị, ”Ual᷊ingu i kamene seng něnarimạ si Kristus Yesus, Tuang i kitẹ, turusẹ̌e masěmbaụ dingange. Pangangimang i kamene harusẹ̌ měhamụ, nirarisị su wowong i sie, kụ nakoạ matoghasẹ̌.” (Kol. 2:6, 7) Mạeng i kitẹ mẹ̌tawakal᷊i měnoghasẹ̌ pangangimang, Setang dingangu tumatol᷊ene tawe makaědo si kitẹ dumal᷊eng su ral᷊eng katěngadẹ̌.​—2 Yoh. 8, 9.

13. I kitẹ tawe maherang soal u apa, kụ kawe nụe?

¹³ I kitẹ tawe maherang mạeng dunia ini mawěngsing si kitẹ. (1 Yoh. 3:13) Yohanes něgělị laingatẹ̌ ”patikụ dunia su al᷊ungu kawasang ral᷊aị”. (1 Yoh. 5:19) Pěngěngsuengu dunia ini sauneng kakạranine, kụ Setang sauneng nẹ̌pědu. (Why. 12:12) I sie tawe kětạeng něpakẹ sasal᷊ukạ al᷊usẹ̌, kere amoral arau konting taumata murtad. Katewe i sie lai matingkaị něndariha manga ělang i Yehuwa. Setang masingkạ tempone kate kadodọ gunang mẹ̌sěding hal᷊ẹ̌ měnginjilẹ̌ arau gunang měndusa pangangimang i kitẹ. Hakị u ene, i kitẹ tawe huměkosẹ̌ mạeng hal᷊ẹ̌ i kitẹ nisěding su piram baụ negeri. Maning kerene, anạu sěmbaụ i kitẹ su manga negeri ene tatapẹ̌ nẹ̌tatahang. Hakị u ene, tawẹ soale apa koatengu Setang si kitẹ, i kitẹ botonge tatapẹ̌ masatia.

14. Apa sěmbaụ cara mẹ̌tul᷊ung anạu sěmbaụ tadeạu tatapẹ̌ su ral᷊eng katěngadẹ̌?

¹⁴ Gunang mẹ̌tul᷊ung anạu sěmbaụ tatapẹ̌ su ral᷊eng katěngadẹ̌, i kitẹ harusẹ̌ měnodẹ tatal᷊ěntụ. (1 Yoh. 3:10, 11, 16-18) I kitẹ harusẹ̌ kuměndagẹ̌ anạu sěmbaụ bal᷊inẹ kětạeng su tempong maral᷊uasẹ̌, katewe lai su tempong piạ masalah. Contone, apa piạ anạu sěmbaụ nikapatengu taumata ikẹ̌kěndagi sire kụ harusẹ̌ makaěbạ pělahiborẹ̌ arau harusẹ̌ itulung? Arau, apa i kau nakaringihẹ̌ piạ anạu sěmbaụ nikailangengu arětạ ual᷊ingu bencana alam kụ harusẹ̌ itul᷊ung gunang měkoạ Banalang Kararatuang arau bal᷊eng i sire? I kitẹ měnodẹ kakěndagẹ̌ su anạu sěmbaụ bal᷊inẹ kětạeng bọu bawera, katewe limembong penting bọu kakanoạ.

15. Kere niul᷊ị su 1 Yohanes 4:7, 8, apa harusẹ̌ koateng i kitẹ?

¹⁵ Su tempong i kitẹ něnodẹ kakěndagẹ̌ su sěmbaụ su wal᷊inẹ, i kitẹ nẹ̌těno si Amang i kitẹ makěndagẹ̌. (Basa 1 Yohanes 4:7, 8.) Sěmbaụ cara penting měnodẹ kakěndagẹ̌ ene kai měgělị ampung sěmbaụ su wal᷊inẹ. Contone, aramanung piạ anạu sěmbaụ nakatědụ naung i kitẹ katewe bọu ene i sie nẹ̌dorong ampung. I kitẹ měnodẹ kakěndagẹ̌ su tempong měgělị ampung si sie dingangu seng tawe mẹ̌tahěndung  pẹ̌sasal᷊ane. (Kol. 3:13) Sěngkatau saudara arenge Aldo nakahombang sasal᷊ukạ ini su tempong nakaringihẹ̌ saudara lẹ̌adatenge nẹ̌bisara barang dal᷊akị soal u latar bělakange. Aldo nẹ̌bera, ”Iạ turusẹ̌ nẹ̌doa si Yehuwa tadeạu mẹ̌tul᷊ung si siạ tawe mẹ̌pikirẹ̌ dal᷊akị soal u saudara ene.” Katewe, i Aldo tawe kětạeng někoạ hal᷊ẹ̌ ene. I sie němutusẹ̌ gunang měmaringang si saudara ene měnginjilẹ̌. Su tempong i rẹ̌dua něnginjilẹ̌, i sie nẹ̌běke i sie sěbạe pědu ual᷊ingu bawerang saudara ene. Aldo naul᷊ị, ”Su tempong saudara ene nasadarẹ̌ bawerane nakatědụ naungku, i sie nẹ̌dorong ampung. Bọu tingihe, iạ nakaěna i sie kahěngang-hěngang nẹ̌sasěsilẹ̌. Bọu ene, i kandua saụ nědal᷊ahapị mapia.”

16-17. I kitẹ harusẹ̌ mẹ̌tawakal᷊i gunang měkoạ apa?

¹⁶ Rasul Yohanes sěbạe makěndagẹ̌ su anạu sěmbaụe kụ i sie mapulu i sire piạ pangangimang matoghasẹ̌. Sasasa su ral᷊ungu tatělu surate něnodẹ i sie sěbạe makěndagẹ̌ dingangu mapadul᷊i si sire. I kitẹ tantu mal᷊uasẹ̌ ual᷊ingu manga esẹ dingangu wawine apang mẹ̌parenta dingangi Yesus su sorga lai makěndagẹ̌ dingangu mapadul᷊i kere i Yohanes.​—1 Yoh. 2:27.

¹⁷ Karimạko i kitẹ turusě mẹ̌tahěndung sasasa seng niěndungang i kitẹ. Mahịe i kitẹ mẹ̌tawakal᷊i tadeạu turusẹ̌ dumal᷊eng su ral᷊eng katěngadẹ̌. Ene mangal᷊ene tumuhụ si Yehuwa su kěbị bageang bọu pěbawiahi kitẹ. Pěngěndungke Hengetang’E, kụ pangimang ene. Pangimangke si Yesus. Abe pangimang su těntirong taumata dingangu su bawerang taumata murtad. Abe sarang mẹ̌tahamawu si Yehuwa katewe su tempo mẹ̌sul᷊ung měkẹ̌koạ barang dal᷊akị. Pěbiahe tuhụ atorang i Yehuwa. Kụ pẹ̌tul᷊ung anạu sěmbaụ tadeạu tatapẹ̌ matoghasẹ̌, carane pěgělị ampung si sire apang nakatědụ naung i kitẹ dingangu pẹ̌tul᷊ung si sire apang harusẹ̌ itul᷊ung. Hasile, tawẹ soale sigěsạ apa tatěngong i kitẹ, i kitẹ botonge tatapẹ̌ dumal᷊eng su ral᷊eng katěngadẹ̌.