1. Apa pẹ̌pandaěng i Yehuwa bọu manga ělang’E?

MAWU YEHUWA ”mal᷊uasẹ̌ su ělang’E”. (Mz. 149:4) Ini nakakoạ i kitẹ sěbạe mal᷊uasẹ̌. Yehuwa měmẹ̌manda manga sipati kitẹ mapaelẹ̌. I Sie lai masingkạ i kitẹ makoạ taumata kereapa kụ mẹ̌tul᷊ung si kitẹ makoạ hapị’E. Mạeng i kitẹ tatapẹ̌ satia si Sie, i Sie sarung tatapẹ̌ marani dingangi kitẹ sarang karěngụe.​—Yoh. 6:44.

2. Kawe nụe pirang katau masigěsạ mangimang Yehuwa makěndagẹ̌ si sire?

² Piạ ěndịu mẹ̌bera, ’Iạ masingkạ Yehuwa makěndagẹ̌ su ělang’E secara kelompok, katewe kerea iạ botonge mangimang Yehuwa makěndagẹ̌ si siạ?’ Aramanung, kawe nụe piạu mẹ̌kiwal᷊o kerene? I Oksana * nitingkaitang su tempong kadodọ, nẹ̌bera, ”Iạ sěbạe mal᷊uasẹ̌ su tempong iạ nibaptisẹ̌ kụ něnětạ nakoạ perintis. Katewe 15 taung tuhụe, iạ saụ nakatahěndung manga barang dal᷊akị nikahombangengku. Hakị u ene, iạ nẹ̌pikirẹ̌ Yehuwa seng tawe mal᷊uasẹ̌ si siạ kụ iạ tawe layak makatarimạ kakěndag’E.” Yua, sěngkatau saudari perintis su tempong kadodọ nakahombang lawọ masalah, nẹ̌bera, ”Iạ něgělị pěbawiahẹ̌ku si Yehuwa ual᷊ingu iạ mapulu makal᷊uasẹ̌ si Sie. Katewe, iạ bọu nẹ̌pěndang iạ tawe layak makatarimạ kakěndagu Mawu.”

3. Apa sarung ěndungang i kitẹ su pěngangěndungang ini?

³ Kere duang katau saudari masatia seng nisěbạ kanini, i kau tantu makěndagẹ̌ si Yehuwa. Katewe, i kau ěndịu ragu i Sie makěndagẹ̌ si kau. Kawe nụe i kau harusẹ̌ mangimang Yehuwa kahěngang-hěngang mapadul᷊i si kau? Kụ apa makatul᷊ung si kau su tempong i kau nẹ̌tiněna Yehuwa seng tawe makěndagẹ̌ si kau? Mahịe mědeạ sasimbahu manga kakiwal᷊o ene.

4. Kawe nụe mẹ̌pěndang Mawu tawe makěndagẹ̌ si kitẹ ene makawahaya?

⁴ Kakěndagẹ̌ ene sěbạe makawahangsang. Mạeng mangimang Yehuwa makěndagẹ̌ si kitẹ, i kitẹ sarung mawahangsang mẹ̌tahamawu si Sie dingangu kaguwạu naung maning piạ haghing sasal᷊ukạ su pěbawiahẹ̌. Katewe, mạeng i kitẹ ragu Mawu makěndagẹ̌ si kitẹ, ’katatoghasi kitẹ sarung makurang’. (Amsal 24:10) Kụ su tempong i kitẹ nakadodọ naung dingangu něnětạ nẹ̌pěndang Mawu tawe makěndagẹ̌ si kitẹ, i kitẹ gampang kaakal᷊engu Setang.​—Ef. 6:16.

5. Apa nariadi su pirang katau anạu sěmbaụ ual᷊ingu nẹ̌tiněna Mawu tawe makěndagẹ̌ si sire?

⁵ Pirang katau anạu sěmbaụ něnětạ nẹ̌pěndang Yehuwa tawe makěndagẹ̌ si sire kụ pangangimang i sire nělome. Sěngkatau penatua arenge James nẹ̌bera, ”Maning iạ melayani su Betel dingangu mal᷊uasẹ̌ melayani su sidang měpẹ̌pakẹ bawera wal᷊inẹ, iạ ragu apa Yehuwa mal᷊uasẹ̌ su hal᷊ẹ̌ seng takụ nikoạ. Něngělembo lai iạ mětẹ̌tiněna apa Yehuwa dimaringihẹ̌ daroaku.” Eva, sěngkatau mělẹ̌hal᷊ẹ̌ su Betel lai nẹ̌bera, ”Iạ něngěndung mẹ̌tiněna Yehuwa tawe makěndagẹ̌ si kitẹ ene makawahaya. Ual᷊ingu ene piạ pengaruh su kěbị hal᷊ẹ̌ nikoạ i kitẹ gunang melayani si Yehuwa. I kitẹ měngědo měkoạ manga hal᷊ẹ̌ rohani kụ i kitẹ kailangengu karal᷊uasẹ̌ mẹ̌tahamawu si Yehuwa.” Michael, sěngkatau penatua lai perintis biasa, nẹ̌bera, ”Mạeng i kau tawe mangimang Yehuwa makěndagẹ̌ si kau, i kau sarung mẹ̌těngkarau bọu i Sie.”

6. Apa harusẹ̌ koateng su tempong i kitẹ měnětạ mẹ̌pěndang Mawu tawe makěndagẹ̌ si kitẹ?

⁶ Manga pengalaman ene něnodẹ kerea tiněna negatif makawahaya pangangimang i kitẹ. Katewe, apa harusẹ̌ koateng i kitẹ su tempong i kitẹ měnětạ mẹ̌pěndang Mawu tawe makěndagẹ̌ si kitẹ? I kitẹ harusẹ̌ pakasahawụ lumawang pěndang kerene. Pẹ̌dorong si Yehuwa gunang mẹ̌tul᷊ung si kau měngganti ’pikirang balisa’ dingangu ’karal᷊unsemahẹ̌ bọu Mawu, kụ botonge makawatạ haghing tiněna, sarung měndiagạ naung dingangu tiněnanu’. (Mz. 139:23; Flp. 4:6, 7) Kụ pẹ̌tahěndung, i kau tawe sẹ̌sanu. Anạu sěmbaụ masatia wal᷊inẹ lai mětẹ̌tawakal᷊i lumawang pěndang negatif. Ělangu Mawu su tempong tamai lai mětẹ̌tawakal᷊i lumawang pěndang kerene. Pěmanda apa botonge kaěndungang i kitẹ bọu i Rasul Paulus.

7. Apa manga sasal᷊ukạ nikahombangeng i Paulus?

⁷ Apa pẹ̌sěngsul᷊ẹ i kau nẹ̌pěndang tumanịu lawọ tanggung jawab kụ masulitẹ̌ měkoạ ene? Mạeng iya, i kau kere i Paulus. I sie gụgěnggang bal᷊inẹ kětạeng gunang sěmbaụ sidang, katewe ”gunang kěbị sidang jamaatẹ̌”. (2 Kor. 11:23-28) Apa i kau mahungsakị kụ nikailangengu karal᷊uasẹ̌? Paulus piạ sěmbaụ masalah kụ nakakoạ i sie sěbạe nasigěsạ. Ene ěndịu masalah kasasehatẹ̌ kụ i sie mapulu ene mailang bọu badange. (2 Kor. 12:7-10) Apa i kau nakadodọ naung ual᷊ingu kal᷊alomenu hala? Pẹ̌sěngsul᷊ẹ Paulus lai kerene. I sie nẹ̌sěbạ watangenge taumata ’makạkasiang’ ual᷊ingu i sie turusẹ̌ mětẹ̌tawakal᷊i měkoạ barang mapia.​—Rm. 7:21-24.

8. Apa nakatul᷊ung si Paulus timatěngo masalane?

⁸ Maning i Paulus tụtatěngo kěbị masalah ene, i sie tatapẹ̌ nẹ̌tahamawu si Yehuwa. Apa nakatoghasẹ̌ si sie gunang měkoạ ene? Maning masingkạ i sie tawe nasukụ, i sie piạ pangangimang matoghasẹ̌ su tatěbusẹ̌. I sie lai masingkạ, i Yesus nẹ̌diandi, ”Taumata apang mangimang si sie . . . makaěbạ pěbawiahẹ̌ kěkalẹ̌.” (Yoh. 3:16; Rm. 6:23) Nal᷊ahẹ i Paulus mangimang su tatěbusẹ̌. I sie mangimang Yehuwa sěbạe mapulu měgělị ampung su taumata apang nẹ̌tobatẹ̌, maning taumata ene někoạ dosa gěguwạ.​—Mz. 86:5.

9. Apa kaěndungang i kitẹ bọu bawerang i Paulus su Galatia 2:20?

⁹ Paulus lai mangimang su katoghasu kakěndagu Mawu nal᷊ahẹ bọu i Kristus. (Basa Galatia 2:20.) Pěmanda bawera makatoghasẹ̌ su pěngěngsuengu ayatẹ̌ ene. Paulus nẹ̌bera, ”Ahusu Mawu . . . makěndagẹ̌ si siạ dingangu něgělị watangenge gunang iạ.” Paulus tawe nẹ̌pěndang i sie sěbạe dal᷊akị sarang Mawu tawe kuměndagẹ̌ si sie. I sie tawe nẹ̌tiněna, ’Mawu makěndagẹ̌ su anạu sěmbaụku, katewe si siạ tala.’ Paulus něgělị laingatẹ̌ su tau Roma, ”Kristus nate gunang i kitẹ těntal᷊ang i kitẹ bědang měkẹ̌koạ dosa.” (Rm. 5:8) Tawẹ apa makasahaghe kakěndagu Mawu gunang i kitẹ.

10. Apa kaěndungang i kitẹ bọu Roma 8:38, 39?

¹⁰ Basa Roma 8:38, 39. Paulus masingkạ kerea katoghase kakěndagu Mawu. Paulus němohẹ tawẹ apa ”makapětal᷊eing i kitẹ bọu kakěndagu Mawu”. Paulus masingkạ Yehuwa sěbạe masabarẹ̌ su tau Israel. Paulus lai masingkạ kerea Yehuwa něnodẹ tatal᷊ěntụ si sie. I kitẹ botonge mẹ̌bera tiněnang i Paulus kere ini: Yehuwa seng něndolohẹ̌ Ahus’E nate gunang iạ, apa iạ bědang ragu i Sie makěndagẹ̌ si siạ?​—Rm. 8:32.

11. Maning i Paulus seng někoạ dosa kere niwohẹ su 1 Timotius 1:12-15, kawe nụe i sie mangimang Mawu makěndagẹ̌ si sie?

 ¹¹ Basa 1 Timotius 1:12-15. Paulus tantu nasusah naung ual᷊ingu nakatahěndung apa nikoạe su tempong tamai. Tawe makaherang i sie nẹ̌sěbạ watangenge taumata ”kal᷊awokange” někoạ dosa. Těntal᷊ang i Paulus bědang tawe něngěndung katěngadẹ̌, i sie měnděndariha tau Kristen bọu sěmbaụ soa sarang soa wal᷊inẹ, něnuẹ̌ si sire sarang penjara, kụ setuju dingangu putusang pengadilan gunang měmate tau Kristen wal᷊inẹ. (Kis. 26:10, 11) Pẹ̌tiněna kerea pěndang i Paulus su tempong i sie nẹ̌sombang dingangu sěngkatau anạ mangudạ Kristen kụ matimade nipate ual᷊ingu i sie? Paulus sěbạe nẹ̌sasěsilẹ̌ ual᷊ingu apa nikoạe, katewe i sie tawe makawal᷊ui apa seng nariadi su tempong tamai. Paulus mangimang i Yesus nate gunang i sie, kụ i sie němohẹ, ”Iạ botonge makoạ kere orasẹ̌ ini ual᷊ingu kapiang naungu Mawu makạlaherang.” (1 Kor. 15:3, 10) Apa kaěndungang i kitẹ? I kau lai botonge mangimang Yesus nate gunang i kau kụ ene makakoạ i kau botonge piạ pẹ̌dal᷊ahapị mapia dingangu Mawu. (Kis. 3:19) Su Mawu sěbạe penting apa koateng i kitẹ orasẹ̌ ini dingangu su tempo mahi, bal᷊inẹ pẹ̌sasal᷊a nikoạ i kitẹ kangerẹ, tawẹ soale su tempo ene i kitẹ seng nakoạ Sahiding Yehuwa arau bědang tala.​—Yes. 1:18.

12. Kerea bawera su 1 Yohanes 3:19, 20 makatul᷊ung si kitẹ su tempong i kitẹ nẹ̌pěndang tawe maarěga arau tawe layak makaěbạ kakěndagẹ̌?

¹² Su tempong nẹ̌tiněna i Yesus seng něněbusẹ̌ dosang i kitẹ, i kitẹ ěndịu mẹ̌bera, ’Iạ tawe layak makatarimạ gaghělị maarěga ini.’ Aramanung kawe nụe i kau nẹ̌pěndang kerene? Naung i kitẹ měngẹ̌ngakal᷊ẹ̌ si kitẹ, kụ makakoạ i kitẹ mẹ̌pěndang tawe maarěga arau tawe layak makaěbạ kakěndagẹ̌. (Basa 1 Yohanes 3:19, 20.) Su tempong i kitẹ měnětạ mẹ̌tiněna kerene, i kitẹ  mẹ̌tahěndung ”Mawu limembong gěguwạ bọu naung i kitẹ”. Kakěndagi Amang i kitẹ su sorga dingangu tatal᷊ěntụ’E limembong matoghasẹ̌ sul᷊ungu pěndang negatif ěndịu piạ su naung i kitẹ. I kitẹ perlu mangimang Yehuwa makěndagẹ̌ si kitẹ. Gunang měkoạ ene, i kitẹ harusẹ̌ masau měngěndung Hengetang’E, masau mẹ̌doa si Sie, lai mědal᷊ahapị dingangu anạu sěmbaụ apang masatia. Kawe nụe sěbạe penting měkoạ manga hal᷊ẹ̌ ene?

13. Kerea měngěndung Hengetangu Mawu makatul᷊ung si kitẹ? (Pěmanda lai kotak ” Kerea Hengetangu Mawu Nakatul᷊ung si Sire”.)

¹³ Pěngěndung Hengetangu Mawu ěllo-ěllo, kụ i kau sarung makasilo manga sipati Yehuwa mapaelẹ̌. I kau sarung makaěna kerea kaguwạe kakěndag’E si kau. Mẹ̌tiněna Hengetangu Mawu ěllo-ěllo makatul᷊ung si kitẹ piạ tiněna limembong mapia, ”měnul᷊idẹ̌ haghing hal᷊ẹ̌” su tiněna dingangu naung i kitẹ. (2 Tim. 3:16, catatan kaki) Sěngkatau penatua arenge Kevin kụ mětẹ̌tawakal᷊i lumawang pěndang tawẹ arěgane nẹ̌bera, ”Mẹ̌basa dingangu mẹ̌tiněna Mazmur 103 nakatul᷊ung si siạ měmarikěsa tiněnaku lai nakaěna kerea sěběnarẹ̌e pěndang i Yehuwa soal u iạ.” Eva, seng nisěbạ kanini, nẹ̌bera, ”Su pěngěngsuengu ěllo, iạ něnadia tempo gunang mẹ̌tiněna soal u kerea pěndang i Yehuwa. Ene nakakoạ naungku natěnang dingangu nakatoghasẹ̌ pangangimangku.”

14. Kerea daroa makatul᷊ung si kau?

¹⁴ Turusẹ̌e pẹ̌doa. (1 Tes. 5:17) Su tempong i kau měnětạ mědal᷊ahapị dingangu sěngkatau, i kau harusẹ̌ mẹ̌bawěke dingange kụ mẹ̌běke kerea pěndangu. Kerene lai pẹ̌dal᷊ahapị i kitẹ dingangi Yehuwa. Su tempong mẹ̌doa mẹ̌běke kaghaghěnggang i kitẹ, apa tẹ̌tiněnang, dingangu apa nikapěndangeng ene něnodẹ i kitẹ mangimang si Sie lai masingkạ i Sie makěndagẹ̌ si kitẹ. (Mz. 94:17-19; 1 Yoh. 5:14, 15) Yua, seng nisěbạ kanini, nẹ̌bera, ”Su tempong mẹ̌doa iạ nẹ̌běke limembong mal᷊awọ sul᷊ungu apa takụ nikoạ sahěllo ini. Iạ nẹ̌běke si Sie apa sěběnarẹ̌e takụ tẹ̌tiněnang dingangu nikapěndangeng. Kakạrěngụe iạ nakasilo Yehuwa bal᷊inẹ kere bosẹ̌ su sěmbaụ perusahaan gěguwạ, katewe kere Papạ sěbạe makěndagẹ̌ su anạ’E.”​—Pěmanda kotak ” Apa i Kau bọu Nẹ̌basa?”

15. Kerea Yehuwa něnodẹ i Sie mapadul᷊i si kitẹ?

¹⁵ Mědal᷊ahapị dingangu hapị tutune. I sire kai hadiah bọu i Yehuwa. (Yak. 1:17) Amang i kitẹ su sorga něnodẹ i Sie mapadul᷊i si kitẹ carane něgělị si kitẹ anạu sěmbaụ su sidang kụ ”makěndagẹ̌ sabang  tempo”. (Amsal 17:17) Su surate gunang tau Kolose, Paulus nẹ̌sěbạ pirang katau tau Kristen apang nẹ̌tul᷊ung si sie. Kụ i sie nẹ̌sěbạ i sire ”simbul᷊u pělahiborẹ̌”. (Kol. 4:10, 11) Yesus Kristus lai membutuhkan hapị kụ i sie měngẹ̌ngarěga tul᷊umang bọu manga hapịe, bọu manga malaekatẹ̌ dingangu taumata.​—Luk. 22:28, 43.

16. Kerea hapị tutune makatul᷊ung si kitẹ limembong mědal᷊ahapị mapia dingangi Yehuwa?

¹⁶ Apa i kau nakaěbạ gunane bọu hapị tutune hadiah bọu i Yehuwa? Mẹ̌běke kaghaghěnggang su hapị matělang su rohani ene bal᷊inẹ mangal᷊ene i kitẹ lome. Ene sěběnarẹ̌e makariagạ si kitẹ. Pěmanda apa niul᷊ị i James seng nisěbạ kanini, i sie nẹ̌bera, ”Pẹ̌dal᷊ahapị mapia dingangu tau Kristen matělang su rohani sěbạe nakatul᷊ung si siạ. Su tempong tiněna negatif siměpụ, manga hapị maarěga ene masabarẹ̌ dimaringihẹ̌ dingangu naul᷊ị i sire makěndagẹ̌ si siạ. Bọu i sire iạ nakasilo Yehuwa mapadul᷊i dingangu makěndagẹ̌ si siạ.” Sěbạe penting mědal᷊ahapị mapia dingangu anạu sěmbaụ.

17-18. Si sai i kitẹ harusẹ̌ dumaringihẹ̌, kụ kawe nụe?

¹⁷ Setang mapulu i kitẹ měngědo měkoạ barang mapia. Setang mapulu i kitẹ mangimang Yehuwa tawe makěndagẹ̌ si kitẹ, kụ i kitẹ tawe layak ipakasal᷊amatẹ̌. Katewe, kere seng niěndungang i kitẹ ene kai konti.

¹⁸ Yehuwa makěndagẹ̌ si kau. I kau kai arětạ maarěga si Sie. Mạeng i kau matuhụ si Sie, i kau sarung ”tatapẹ̌ su ral᷊ungu kakěndag’E” sarang karěngụe, kere i Yesus. (Yoh. 15:10) Hakị u ene, abe daringihẹ̌ Setang arau naungu su tempong i kau nẹ̌pěndang Yehuwa tawe makěndagẹ̌ si kau. Katewe, daringihẹ̌ si Yehuwa, i Sie měmẹ̌manda hal᷊ẹ̌ mapia si kitẹ. Pangimangke i Sie ”mal᷊uasẹ̌ su ělang’E”, dingangu si kau lai.