1. Kawe nụe i kitẹ botonge maul᷊ị Yehuwa kai masanạ naung?

APA wotonge ikawera Yehuwa ene masanạ naung? Iya, botonge. Daud bọu nẹ̌bera, ”I Kau něgělị si siạ perisai kasasal᷊amatẹ̌’U kụ kasasanạu naung’U nakakoạ si siạ mawantugẹ̌.” (2 Sam. 22:36; Mz. 18:35) Aramanung i Daud nakatahěndung tempong Nabi Samuel diměnta su wal᷊eng i sire gunang měhengkẹ datung Israel tuhụe. Daud kai katuariange bọu wal᷊u anạ esẹ i Isai, katewe Yehuwa němile si sie gunang mengganti si Datu Saul.​—1 Sam. 16:1, 10-13.

2. Apa sarung ěndungang i kitẹ su pěngangěndungang ini?

² Daud tantu setuju dingangu bawerang sěngkatau pemazmur soal i Yehuwa: ”I Sie kimakurung gunang měmanda langị dingangu dunia, něhengkẹ taumata kadodọ bọu awul᷊ẹ̌. I sie něhengkẹ taumata masusah . . . tadeạu kumaiang sěngkasio dingangu bangsawan.” (Mz. 113:6-8) Su pěngangěndungang ini, humotong i kitẹ sarung měngěndung piram baụ tatěntiro penting soal u kasasanạu naung bọu Mawu Yehuwa. Bọu ene, i kitẹ sarung měmanda apa wotonge kaěndungang i kitẹ bọu i Datu Saul, Nabi Daniel, dingangi Yesus soal u sipatẹ̌ bersahaja.

3. Kerea Yehuwa měkoạ si kitẹ, kụ ene něnodẹ apa?

³ Yehuwa něnodẹ kasasanạu naung’E bọu cara i Sie měkoạ manga ělang’E tawe nasukụ. I Sie tawe kětạeng něnarimạ ibadang i sire, katewe lai někoạ si sire kere hapị. (Mz. 25:14) Tadeạu taumata botonge mědal᷊ahapị dingang’E, Yehuwa něgělị Ahus’E gunang měněbusẹ̌ dosang i kitẹ. Ene něnodẹ Yehuwa sěbạe matal᷊ěntụ si kitẹ.

4. Apa seng nighělị i Yehuwa si kitẹ, kụ kawe nụe?

 ⁴ Pẹ̌tiněna contoh wal᷊inẹ něnodẹ Yehuwa masanạ naung. Yehuwa kai Měndariadi, kụ sěběnarẹ̌e i Sie tawe harusẹ̌ měgělị si kitẹ kawawebasẹ̌ gunang měmile. Katewe, i Sie něndiadi si kitẹ mẹ̌papangawẹ i Sie kụ něgělị si kitẹ kawawebasẹ̌ gunang měmile. Apa nipileng i kitẹ ene penting si Yehuwa, maning i kitẹ kai sěbạe kadodọ dingangu lome mạeng isul᷊ung dingang’E. I Sie mapulu i kitẹ měmile mẹ̌tahamawu si Sie ual᷊ingu i kitẹ makěndagẹ̌ si Sie dingangu mengakui gunane mạeng tumuhụ si Sie. (Ul. 10:12; Yes. 48:17, 18) I kitẹ tantu sěbạe makitarimakasẹ ual᷊ingu Yehuwa masanạ naung!

5. Kerea Yehuwa něněntiro si kitẹ gunang masanạ naung? (Pěmanda gambarẹ̌ sampul.)

⁵ Yehuwa něněntiro si kitẹ gunang masanạ naung bọu cara i Sie měkoạ si kitẹ. Yehuwa kai Pribadi paling mapelesa. Maning kerene, i Sie mapulu měnarimạ těgu bọu pribadi wal᷊inẹ. Contone, Yehuwa němala Ahus’E gunang mẹ̌tul᷊ung si Sie měndiadi kěbị haghi. (Amsal 8:27-30; Kol. 1:15, 16) Kụ maning makawasa, Yehuwa něgělị piram baụ tanggung jawab su pribadi wal᷊inẹ. Contone, i Sie něhengkẹ si Yesus nakoạ Datung Kararatuang, kụ i Sie lai něgělị wewenang su 144.000 taumata gunang mẹ̌parenta dingangi Yesus. (Luk. 12:32) Yehuwa tantu nělatih si Yesus gunang makoạ Datu dingangu Imang Mawantugẹ̌. (Ibr. 5:8, 9) I Sie lai nělatih manga hapị i Yesus. Katewe, i Sie tawe něgělị tugasẹ̌ kụ měngkate měngẹ̌ngatorẹ̌ kěbị perincian soal u cara i sire měkoạ tugasẹ̌ ene. I Sie mangimang i sire sarung měkoạ apa ikẹ̌kapulu-Ne.​—Why. 5:10.

6-7. Kerea těmbonangu keluarga, manga penatua, dingangu matatimadẹ̌ botonge mẹ̌těno si Yehuwa?

⁶ Mạeng i Amang i kitẹ su sorga, Pribadi tawe membutuhkan tul᷊umang pribadi wal᷊inẹ, mapulu měmahiạ wewenang, i kitẹ lai tantu mapulu měkoạ kerene! Contone,  apa i kau sěngkatau těmbonangu keluarga arau penatua su sidang? Pẹ̌těnọe si Yehuwa kụ pěmahiạ tugasẹ̌ su taumata wal᷊inẹ. Bọu ene, abe měngkate měngatorẹ̌ cara i sie měkoạ hal᷊ẹ̌ ene. Su tempong i kau nẹ̌těno si Yehuwa, hal᷊ẹ̌ sarung makoạ, kụ i kau lai nělatih taumata wal᷊inẹ dingangu nakatul᷊ung si sire tadeạu limembong percaya diri. (Yes. 41:10) Bọu Mawu Yehuwa, apa lai wotonge kaěndungang i sire apang piạ wewenang?

⁷ Alkitapẹ̌ něnodẹ Yehuwa puluang dụdaringihẹ̌ pendapat manga malaekatẹ̌. (1 Raj. 22:19-22) Matatimadẹ̌, kerea i kamene botonge mẹ̌těno si Yehuwa? Mạeng nẹ̌tatahino, kěnang pẹ̌kiwal᷊o su anạ tumuhụ si sire kerea sěmbaụ tugasẹ̌ su wal᷊e botonge koateng. Kụ mạeng nẹ̌tatahino, tol᷊e pendapat i sire.

8. Kerea Yehuwa masabarẹ̌ si Abraham dingangi Sara?

⁸ Kasasanạu naung i Yehuwa lai nal᷊ahẹ bọu kasasabar’E. Contone, Yehuwa masabarẹ̌ su manga ělang’E apang měkẹ̌kiwal᷊o soal u putusang’E. I Sie dimaringihẹ̌ su tempong i Abraham naul᷊ị kaghaghěnggange soal u putusang i Yehuwa gunang měminasa Sodom dingangu Gomora. (Kej. 18:22-33) Kụ pẹ̌tahěndung kerea Yehuwa někoạ si Sara, kawing i Abraham. Yehuwa tawe tersinggung arau nẹ̌pědu su tempong Sara liměge nakaringihẹ̌ diandi-Ne soal u i Sara sarung matiang su tempong seng maghurang. (Kej. 18:10-14) Yehuwa kai měngẹ̌ngarěga si Sara.

9. Kerea matatimadẹ̌ dingangu penatua botonge mẹ̌těno si Yehuwa?

⁹ Matatimadẹ̌ dingangu penatua, apa wotonge kaěndungangu bọu i Yehuwa? Pẹ̌tiněna kerea reaksinu su tempong piạ u ragu soal u putusang nikoạu. Apa i kau langsung maul᷊ị i sire nẹ̌sal᷊a? Arau, apa i kau mẹ̌tawakal᷊i makaěna sudut pandang i sire? Keluarga dingangu sidang sarung makaěbạ gunane mạeng i sire apang piạ wewenang mẹ̌těno si Yehuwa. Su bageang dasị, i kitẹ seng němanda kerea i kitẹ botonge mẹ̌těno kasasanạu naung i Yehuwa. Tuhụe, i kitẹ sarung měngěndung soal u sipatẹ̌ bersahaja bọu manga contoh su Alkitapẹ̌.

10. Kerea Yehuwa něpakẹ contoh taumata wal᷊inẹ gunang měněntiro si kitẹ?

¹⁰ Yehuwa kai ’Měnaněntiro Mawantugẹ̌’, kụ i Sie něnadia lawọ contoh su Alkitapẹ̌ gunang měněntiro si kitẹ. (Yes. 30:20, 21) Bọu běke su Alkitapẹ̌, i kitẹ makaěndung soal u taumata apang něnodẹ sipatẹ̌ makal᷊uasẹ̌ Mawu, kere sipatẹ̌ bersahaja. I kitẹ lai měngěndung bọu i sire apang tawe nakakoạ něnodẹ manga sipatẹ̌ ene.​—Mz. 37:37; 1 Kor. 10:11.

11. Apa wotonge kaěndungang i kitẹ bọu contoh ral᷊akị i Saul?

¹¹ Pẹ̌tiněna apa nariadi si Datu Saul. Humotong, i sie kai sěngkatau umbaseng piạ sipatẹ̌ bersahaja. I sie masingkạ kurange, kụ i sie lai ragu měnarimạ limembong lawọ tanggung jawab. (1 Sam. 9:21; 10:20-22) Katewe, su sěngkatempo i sie nakoạ lancang. I sie něnodẹ sipatẹ̌ dal᷊akị ene tawe nararěna su apang nakoạ datu. Su sěngkatempo, i sie nikailangengu kasasabarẹ̌ su tempong něngampal᷊ẹ̌ si Nabi Samuel. Sul᷊ungu mangimang Yehuwa sarung mẹ̌tul᷊ung manga ělang’E, Saul něnutung sasěmbah tẹ̌tongkateng maning i sie tawẹ apa hakẹ̌ měkoạ ene. Suwụe, Yehuwa seng tawe mal᷊uasẹ̌ si Saul, kụ madiri i sie makoạ datu. (1 Sam. 13:8-14) I kitẹ matahuěna mạeng měngěndung bọu contoh ral᷊akị ini dingangu tawe makoạ lancang.

12. Kerea Daniel něnodẹ i sie bersahaja?

¹² Nẹ̌tatěntang dingangi Saul, pẹ̌tiněna contoh mapaelẹ̌ bọu Nabi Daniel. Su kanandụu  wiahe, Daniel tatapẹ̌ masanạ naung dingangu bersahaja, kụ sěntiniạ mědẹ̌deạ laahạ bọu Mawu Yehuwa. Contone, su tempong Yehuwa něpakẹ si sie gunang maul᷊ị apa mangal᷊ene iping i Nebukadnezar, Daniel tawe naul᷊ị i sie nakakoạ ene ual᷊ingu kemampuan i sie hala. Katewe, i sie bersahaja, kụ něgělị daralo dingangu kawawantugẹ̌ si Yehuwa. (Dan. 2:26-28) Apa těntirone si kitẹ? Mạeng anạu sěmbaụ mal᷊uasẹ̌ nakaringihẹ̌ nasẹ̌ i kitẹ, arau mạeng i kitẹ berhasil su pelayanan, i kitẹ harusẹ̌ měgělị kěbị daralo si Yehuwa. I kitẹ harusẹ̌ mengakui i kitẹ tawe makakoạ manga hal᷊ẹ̌ ene mạeng tawẹ apa tul᷊umang i Yehuwa. (Flp. 4:13) Mạeng i kitẹ měkoạ ene, i kitẹ lai nẹ̌těno si Yesus.

13. Apa wotonge kaěndungang i kitẹ soal u sipatẹ̌ bersahaja bọu bawerang i Yesus su Yohanes 5:19, 30?

¹³ Maning Yesus kai Ahusu Mawu masukụ, i sie tatapẹ̌ měngẹ̌ngumbala si Yehuwa. (Basa Yohanes 5:19, 30.) I sie tawe nẹ̌tawakal᷊i gunang měmul᷊aho wewenang i Amange su sorga. Filipi 2:6 naul᷊ị i Yesus ”tawe pernah nẹ̌tiněna gunang měmul᷊aho kedudukan Mawu arau makoạ mẹ̌sul᷊ung dingangu Mawu”. Yesus masingkạ batase dingangu měngẹ̌ngadatẹ̌ wewenang i Amange.

14. Su tempong nirorongang gunang měkoạ sěmbaụ hal᷊ẹ̌, kụ bal᷊inẹ hakẹ̌e gunang měgělị ene, kerea reaksing i Yesus?

¹⁴ Kěnang pẹ̌tiněna reaksing i Yesus su tempong i Yakobus, Yohanes, dingangi mamạ i rẹ̌dua nẹ̌dorong sěmbaụ hak istimewa, kụ bal᷊inẹ hakẹ̌ i Yesus gunang měgělị ene. Yesus langsung nẹ̌bera kětạeng i Amange su sorga botonge měmutusẹ̌ i sai sarung kumaiang su sěmběka koaneng dingangu sěmběka kaihing i Yesus su Kararatuang. (Mat. 20:20-23) Yesus něnodẹ i sie měngẹ̌ngarěga batase. I sie kai bersahaja. I sie tawe pernah někoạ haghing hal᷊ẹ̌ něngělembo wọu wewenang seng nighělị i Yehuwa si sie. (Yoh. 12:49) Kerea i kitẹ botonge mẹ̌těno si Yesus?

15-16. Kerea i kitẹ botonge tumol᷊e sasasa su 1 Korintus 4:6?

¹⁵ I kitẹ mẹ̌těno sipatẹ̌ bersahaja bọu i Yesus mạeng i kitẹ tumol᷊e sasasa su 1 Korintus 4:6. Sene niul᷊ị, ”Abe lumampa apa seng kạbawohẹ.” Hakị u ene, mạeng piạ u mẹ̌dorong sasasa si kitẹ, abe měgělị sasasa tumuhụ tiněnang i kitẹ hala arau lai masahawụ měgělị sasasa. Katewe, i kitẹ harusẹ̌ měngahạ sarang sasasa su Alkitapẹ̌ arau  su publikasi dasare Alkitapẹ̌. Mạeng měkoạ ene, i kitẹ něngakui batasi kitẹ. Kụ, ene něnodẹ i kitẹ bersahaja ual᷊ingu nakaěna sasasang Yehuwa kai sěntiniạ limembong kapaelange wọu sasasang i kitẹ.​—Why. 15:3, 4.

¹⁶ Selain měngadatẹ̌ si Yehuwa, si kitẹ lai piạ alasang wal᷊inẹ gunang měnodẹ sipatẹ̌ bersahaja. Mahịe měmanda kerea kasasanạu naung dingangu sipatẹ̌ bersahaja makakoạ si kitẹ mal᷊uasẹ̌ lai makatul᷊ung si kitẹ mědal᷊ahapị dingangu taumata wal᷊inẹ.

17. Kawe nụe taumata masanạ naung dingangu bersahaja limembong mal᷊uasẹ̌?

¹⁷ Mạeng masanạ naung dingangu bersahaja, i kitẹ sarung limembong mal᷊uasẹ̌. Kawe nụe kerene? Mạeng i kitẹ mẹ̌tahěndung kurangi kitẹ, i kitẹ sarung limembong puluang makitarimakasẹ ual᷊ingu tul᷊umang seng nitarimạ i kitẹ bọu taumata wal᷊inẹ. Contone, pẹ̌tiněna apa nariadi su tempong Yesus napakapia mapul᷊ong katau esẹ masakị kusta. Su tempo ene, kětạeng sěngkatau nẹ̌bal᷊ị kụ nakitarimakasẹ si Yesus ual᷊ingu seng napakapia sakị makạtatakụ nikahombangenge. Tau esẹ ene masingkạ i sie hala tawe makapia sakị ene. Ual᷊ingu masanạ naung dingangu bersahaja, i sie nakitarimakasẹ ual᷊ingu tul᷊umang seng nitarimạe, kụ i sie nẹ̌dalo Mawu ual᷊ingu hal᷊ẹ̌ ene.​—Luk. 17:11-19.

18. Kerea kasasanạu naung dingangu sipatẹ̌ bersahaja makatul᷊ung si kitẹ mědal᷊ahapị dingangu taumata wal᷊inẹ? (Roma 12:10)

¹⁸ Taumata masanạ naung dingangu bersahaja piạ pẹ̌dal᷊ahapị matahang marěngụ, kụ i sire lai limembong gampang makaěbạ hapị mapia. Kawe nụe? Ual᷊ingu i sire mal᷊uasẹ̌ mengakui sipatẹ̌ mapia bọu taumata wal᷊inẹ dingangu lai mangimang si sire. Taumata masanạ naung dingangu bersahaja mal᷊uasẹ̌ su tempong taumata wal᷊inẹ  nakakoạ tugasi sire, kụ taumata kerene lai masahawụ mẹ̌dalo taumata wal᷊inẹ.​—Basa Roma 12:10.

19. Apa piram baụ alasang i kitẹ harusẹ̌ měnděmẹ kal᷊aobotẹ̌?

¹⁹ Katewe, taumata maobotẹ̌ kai masigěsạ mẹ̌dalo taumata wal᷊inẹ, ual᷊ingu i sire limembong mapulu taumata wal᷊inẹ mẹ̌dalo si sire. I sire puluang mapẹ̌sul᷊ung watangeng i sire dingangu taumata wal᷊inẹ kụ puluang bersaing. Sul᷊ungu melatih taumata wal᷊inẹ dingangu měmahiạ wewenang, i sire mẹ̌sul᷊ungu maul᷊ị, ”Mạeng i kau mapulu měkoạ sěmbaụ hal᷊ẹ̌, pěkoạe sẹ̌sanu.” Taumata maobotẹ̌ biasane ambisius dingangu iri. (Gal. 5:26) Taumata kerene mahal᷊i piạ pẹ̌dal᷊ahapị matahang marěngụ. Mạeng i kitẹ nakasingkạ piạ kal᷊aobotẹ̌ su naung i kitẹ, i kitẹ harusẹ̌ pakasahawụ mẹ̌doa makitul᷊ung si Yehuwa gunang ”měmal᷊ui cara [i kitẹ] mẹ̌tiněna” tadeạu kal᷊aobotẹ̌ tawe makoạ sipati kitẹ.​—Rm. 12:2.

20. Kawe nụe i kitẹ harusẹ̌ masanạ naung dingangu bersahaja?

²⁰ I kitẹ tantu sěbạe makitarimakasẹ ual᷊ingu Yehuwa seng nakoạ pẹ̌tatěnoěng gunang i kitẹ. I kitẹ nakasilo i Sie masanạ naung měkoạ manga ělang’E, kụ i kitẹ mapulu mẹ̌těno si Sie. Bọu ene lai, i kitẹ mapulu mẹ̌těno si sire apang nakoạ contoh mapaelẹ̌ su Alkitapẹ̌ soal u sipatẹ̌ bersahaja. Karimạko i kitẹ turusẹ̌ měngadatẹ̌ dingangu měmantugẹ̌ si Yehuwa ual᷊ingu i Sie layak makatarimạ ene. (Why. 4:11) Mạeng měkoạ manga hal᷊ẹ̌ ene, i kitẹ sarung mědal᷊ahapị dingangi Yehuwa sarang karěngụe, ual᷊ingu i Sie makěndagẹ̌ su taumata masanạ naung dingangu bersahaja.