SU KANANDỤU iạ měsẹ̌sikol᷊ah, situasine tawe mal᷊awọ nẹ̌bal᷊ui. Iạ sěngkělasẹ̌ dingangu hapị mẹ̌sul᷊ung sarang nalulusẹ̌. Su soang kami, maraning kěbị taumata masingkạ sěmbaụ su wal᷊inẹ.

Soa Liberty nilikutangu lantang dararodọ, kụ kal᷊awokange nisuangengu tuhigu. Su tempong iạ nalahirẹ̌, i papạku mělẹ̌hal᷊ẹ̌ su lantangu sěngkatau mẹ̌sasinuang. Su tempong remaja, iạ něngěndung mẹ̌bawa traktor dingangu mẹ̌sinuang.

Su tempong iạ nalahirẹ̌, papạku umure 56 su taunge, kụ i mamạku 35 su taunge. Katewe, i papạku bědang matoghasẹ̌ dingangu masehatẹ̌. I sie puluang měhal᷊ẹ̌ kụ i sie něněntiro manga anạe tadeạu puluang lai měhal᷊ẹ̌. Gajine mahal᷊i, katewe i sie něnadia si kami tampạ pẹ̌tanạkeng, pakeang, dingangu kaěng. Kụ i sie lai měnẹ̌nadia tempo gunang i kami. I papạku nate umure 93 su taunge, mạeng i mamạku nate umure 86 su taunge. I rẹ̌dua bal᷊inẹ Sahiding Yehuwa. Katewe, sěngkatau tuariku nakoạ penatua dongkeng taung 1972.

I mamạku puluang su hal᷊ẹ̌ rohani. Sabang Misa, i sie měbẹ̌bawa si kami sarang Gereja Baptis. Su tempong umurẹ̌ku 12 su taunge, iạ buhudeng nakaringihẹ̌ soal u Tritunggal. Hakị u ene, iạ nẹ̌kiwal᷊o si  mamạku, ”Kerea i Yesus su tempo mẹ̌sul᷊ung nakoạ Anạ dingangu nakoạ i Amang?” Iạ nakatahěndung i mamạ simimbahẹ̌, ”Ungkẹ, ene misteri. I kitẹ tawe makaěna soal u ene.” Tumuhụ si siạ, ene tawe masuẹ̌ su akal᷊ẹ̌. Maning kerene, su tempong umurẹ̌ku 14 su taunge, iạ nisahani su sěmbaụ sal᷊ụ kadodọ. Iạ niurung tělung sul᷊ẹ, sěnsul᷊ẹ gunang i Amang, sěnsul᷊ẹ gunang Ahuse, dingangu sěnsul᷊ẹ gunang rohkẹ̌ masusi!

Su tempong SMA, iạ nědal᷊ahapị dingangu petinju, kụ i sie němaringang si siạ tumol᷊e tinju. Iạ něnětạ timol᷊e latihan tinju, kụ nakoạ anggota organisasi petinju isẹ̌sěbạ Golden Gloves. Iạ tawe tumanịu jago mẹ̌tinju, hakị u ene su apang bou nẹ̌tanding pirang sul᷊ẹ, iạ něngědo. Bọu ene, iạ nakoạ tentara AS kụ niroho sarang Jerman. Paị sene, manga těmbonangku něnuẹ̌ si siạ su sikol᷊ah tentara ual᷊ingu i sire nẹ̌pěndang iạ makoạ těmbonang mapaelẹ̌. I sire mapulu militer makoạ karirku. Katewe iạ madiri, hakị u ene su taung 1956, su apang dua taung tugasẹ̌ku seng nasue, iạ něngědo nakoạ tentara. Tawe nararěna bọu ene, iạ saụ nakoạ tentara, katewe, nẹ̌tatěntang bọu kal᷊imona.

Těntal᷊ang bědang tawe něngěndung Alkitapẹ̌, tiněnaku soal u esẹ tutune kai nẹ̌sal᷊a. Iạ natol᷊e film dingangu taumata su tampạ pẹ̌tanạkengku. Su pěndangku, manga esẹ apang měbẹ̌bisara soal u Alkitapẹ̌ ene bal᷊inẹ esẹ tutune. Katewe, iạ něnětạ něngěndung barang nakawal᷊ui pěbawiahẹ̌ku. Piạ su sahěllo, su tempong kạpẹ̌bawane otoku mahamụ, piạ duang katau mahuala měkẹ̌kui si siạ. I rẹ̌dua kai tuaring ipagẹ̌ku. I rẹ̌dua Sahiding Yehuwa. Iạ bọu něnarimạ majalah Menara Pengawal dingangu Sadarlah! bọu i rẹ̌dua, katewe tumuhụ si siạ Menara Pengawal ene masigěsạ kaěnang. Su tempo ene, i rẹ̌dua němaringang si siạ tumol᷊e Pelajaran Buku Sidang, ene kai pěngangěndungang Alkitapẹ̌ kụ koateng su wal᷊eng i sire. Iạ naul᷊ị, iạ mẹ̌pikirẹ̌ kal᷊imona. I rẹ̌dua himěming kụ nẹ̌kiwal᷊o, ”I kau mẹ̌diandi?” Iạ simimbahẹ̌, ”Iya. Iạ mẹ̌diandi.”

Iạ nẹ̌sasěsilẹ̌ ual᷊ingu seng nẹ̌diandi. Katewe, iạ madiri tawe měkoạ diandiku, hakị u ene hěbine iạ simongo su pěngangibadang ene. Iạ naherang nakasilo manga rariọ sene. I sire masingkạ mal᷊awọ soal u Alkitapẹ̌! Kangerẹ, sabang Misa iạ makoạ sarang Gaheda dingangi mamạku, katewe iạ kětạeng masingkạ mahal᷊i soal u Alkitapẹ̌. Něnětạ bọu ene, iạ mapulu měngěndung mal᷊awọ, hakị u ene iạ něngěndung Alkitapẹ̌. Humotong iạ něngěndung arengu Mawu Kasělahenge ute kai Yehuwa. Pira taung tamai, su tempong iạ nẹ̌kiwal᷊o si mamạku soal u Sahiding Yehuwa, i sie kětạeng simimbahẹ̌, ”Oh, i sire měnẹ̌němbah tau esẹ maghurang arenge Yehuwa.” Katewe orasẹ̌ ini, mataku kere seng nawuka!

Iạ apidu někoạ kemajuan rohani, ual᷊ingu iạ masingkạ ini těntiro nihino. Kụ iạ nisahani su wul᷊ang Maret 1957, kětạeng sio wul᷊ang bọu tempo humotong iạ diměnta su pěngangibadang. Tiněnakụ seng nẹ̌bal᷊ui. Iạ sěbạe mal᷊uasẹ̌ ual᷊ingu seng masingkạ apa niul᷊ị u Alkitapẹ̌ soal u esẹ tutune. I Yesus kai taumata masukụ. I sie limembong matoghasẹ̌ bọu manga esẹ bal᷊inẹ. Katewe i sie tawe měkẹ̌kakoka. I sie měmẹ̌mala watangenge ”tẹ̌tingkaitang”, kere seng nitěbal᷊ẹ̌. (Yes. 53:2, 7) Iạ něngěndung muriti Yesus tutune ”harusẹ̌be mahimumu su kěbị taumata”.​—2 Tim. 2:24.

 Su taung tuhụe, 1958, iạ něnětạ nakoạ perintis. Katewe tawe nararěna, iạ něngědo kadodọ. Kawe nụe? Ual᷊ingu iạ němutusẹ̌ gunang mẹ̌kawing dingangi Gloria, sěngkatau bọu darua mahuala němaringang si siạ sarang Pelajaran Buku Sidang! Iạ tawe nẹ̌sasěsilẹ̌ seng někoạ putusang ene. Si siạ i Gloria kai permata mal᷊ěnggihẹ̌, kụ sarang orasẹ̌ ini i sie bědang kerene. I sie limembong maarěgạ bọu berlian kal᷊ěgadenge, kụ iạ sěbạe mal᷊uasẹ̌ seng nẹ̌kawing dingange! I Gloria mẹ̌běke kadodọ soal i sie:

”Iạ piạ tuhang dingangu tuariku kal᷊awọe 16 su kataune. I mamạku kai Sahidi masatia. I sie nate su tempong umurẹ̌ku 14 su taunge. Bọu ene, i papạku něnětạ něngěndung Alkitapẹ̌. Ual᷊ingu i mamạku seng tawe dịe, i papạku nẹ̌dorong izin su kepala sekolah tadeạu iạ dingangu tuhangku wawine botonge mẹ̌darol᷊osẹ̌ mẹ̌sikol᷊ah. Su ěllo tuhangku mẹ̌sikol᷊ah, iạ měndiagạ manga tuariku dingangu měnadia kaěng gunang kanengang hěbi, těntal᷊ang i papạ tawe nawal᷊ị bọu něhal᷊ẹ̌. Ene lai koatengu tuhangku. Kụ kerene turusẹ̌ sarang tuhangkụ nalulusẹ̌ bọu SMA, tawe nakaěbạ sěntaung bọu ene. I kami něngěndung Alkitapẹ̌ dingangu darua keluarga Sahiding Yehuwa, kụ 11 su kataune bọu i kami nakoạ Sahiding Yehuwa. Iạ mal᷊uasẹ̌ měnginjilẹ̌ maning iạ taumatane meaěng. Kawingku, i Sam, turusẹ̌ mětẹ̌tul᷊ung si siạ.”

Iạ dingangi Gloria nẹ̌kawing su wul᷊ang Februari taung 1959. I kami mal᷊uasẹ̌ merintis sěngkasio. Su wul᷊ang Juli taung ene, i kami něloho formulir gunang měhal᷊ẹ̌ su Betel. I kami sěbạe mapulu měhal᷊ẹ̌ su Kantor Pusat. I kami nikiwal᷊ong sěngkatau saudara mapia arenge Simon Kraker. I sie naul᷊ị, su tempo ene Betel tawe měnarimạ sěngkawingang. I kami tatapẹ̌ mapulu měhal᷊ẹ̌ su Betel, katewe i kami hědo nitarimạ pul᷊one su taunge bọu ene.

I kami němohẹ suratẹ̌ sarang Kantor Pusat kụ nẹ̌dorong tadeạu gělịkangu tugasẹ̌ su tampạ mahal᷊i penyiar. I kami kětạeng nighělịkang sěmbaụ pile: Pine Bluff, Arkansas. Su tempo ene, kětạeng piạ darua sidang sene. Sěmbaụ gunang penyiar pisine mawira, kụ sěmbaụ gunang penyiar pisine maitung. I kami nakaěbạ tugasẹ̌ su sidang penyiar pisine maitung. Kụ su tempo ene penyiar sene kětạeng 14 su kataune.

I kau aramanung maherang kawe nụe Sahiding Yehuwa něhae penyiar pisine mawira dingangu maitung. Sěběnarẹ̌e, su tempo ene i kami tawe apa pile wal᷊inẹ, ual᷊ingu tumuhụ hukung, taumata bọu ras nẹ̌tatěntang tawe wotonge mẹ̌komol᷊ẹ̌ sěngkasio. Piạ lai taumata měngẹ̌ngindorẹ. Su lawọ tampạ, anạu sěmbaụ matakụ Banalang Kararatuang i sire dusaěng mạeng i sire mẹ̌komol᷊ẹ̌ sěngkasio. Kụ ene bọu nariadi. Bọu ene lai, mạeng penyiar pisine maitung měnginjilẹ̌ su tampạu taumata pisine mawira, i sire sarung samẹkang, kụ piạ lai běbẹ̌baheng. Hakị u ene, tadeạu tatapẹ̌ botonge měnginjilẹ̌, i kami tụtuhụ hukung dingangu mělẹ̌harapẹ̌ sarung piạ pẹ̌bawal᷊ui.

Su tempo ene, měnginjilẹ̌ diọ masigěsạ. Su tempong i kami měnginjilẹ̌ su tampạ u taumata pisine maitung, pẹ̌sěnsul᷊ẹ tawe sangaja i kami nakatětụ tukadu wal᷊eng taumata pisine mawira. Hakị u ene i kami harusẹ̌ masahawu měmutusẹ̌ měnginjilẹ̌ kadodọ si sie arau mẹ̌dorong ampung kụ lighạ měngal᷊ing.

Tantu i kami bal᷊inẹ kětạeng merintis, i kami lai harusẹ̌ mědeạ doitẹ̌. Gajing kami kětạeng mahal᷊i. Gloria měmẹ̌murěsi wal᷊eng piram baụ keluarga. Su sěmbaụ bal᷊e, iạ botonge mẹ̌tul᷊ung si sie, tadeạu hal᷊ẹ̌e malighạ masue. Keluarga ene lai něgělị kaěng. Sabang misa, i Gloria měnẹ̌nistrikẹ̌ pakeang keluarga wal᷊inẹ, mạeng iạ měmurěsi rělahẹ̌, janela, dingangu hal᷊ẹ̌ bal᷊inẹ. Su wal᷊eng sěmbaụ keluarga pisine mawira, i kami sěngkasio měmurěsi janela. I Gloria měmurěsi wọu ral᷊unge, iạ bọu likude. Sahěllo i kami němurěsi, hakị u ene i kami nighělịkangu kaěng. I Gloria kimaěng su ral᷊ungu wal᷊e, katewe nahae wọu keluarga ene, kụ iạ kimaěng su rělahẹ̌, su garasi. Katewe iạ tawe apa-apa. Kaěnge sěbạe matemang. Keluarga ene mapia, katewe i sire natol᷊e su taumata su tampạ ene. Sěnsul᷊ẹ tempo, su apang i kami bọu něloho bensin u otong i kami, iạ nẹ̌kiwal᷊o su měndariagạ pompa bensin pisine mawira, apa i Gloria botonge měpakẹ WC su tampạ  ene. I sie němanda si siạ apidu nẹ̌pědu kụ naul᷊ị, ”Kakakunsị.”

Su tempo ene, i kami lai mal᷊uasẹ̌ nědal᷊ahapị dingangu anạu sěmbaụ, kụ i kami lai sěbạe puluang měnginjilẹ̌! Su tempong buhudeng nahumpạ su Pine Bluff, i kami nẹ̌tanạ dingangu saudara hamba sidang sene. Kawinge bědang tawe nakoạ Sahiding Yehuwa, hakị u ene i Gloria nẹ̌tul᷊ung si sie něngěndung Alkitapẹ̌. Iạ lai něněta něněntiro Alkitapẹ̌ su anạe wawine dingangu kawinge. Samurine, kawingu saudara ene dingangu anạe mapulu makoạ ělang i Yehuwa kụ nisahani.

I kami piạ hapị mapia su sidang penyiar pisine mawira. I sire hanesẹ̌ měmaringang si kami kumaěng su wal᷊eng i sire, katewe i kami matamai harusẹ̌ seng marěndung tadeạu tawẹ apa taumata makasilo. Sěmbaụ organisasi matingkaị kụ pendukung rasisme, isẹ̌sěbạ Ku Klux Klan (KKK), sěbạe aktif su tempo ene. Piạ su sahěllo, su hěbing Halloween, iạ nakasilo sěngkatau esẹ kụkaiang su mukang bal᷊ene, kụ dingangu obote něpakẹ pakeang mawira manandụ dingangu sapeọ biasa pẹ̌paketangu anggota KKK. Maning nakahombang lawọ kakanoạ dal᷊akị, anạu sěmbaụ tatapẹ̌ něnodẹ kapiang naung. Sěnsul᷊ẹ tempo, i kami nikasuengu roitẹ̌ gunang kebaktian, hakị u ene i kami nẹ̌bal᷊ụ otong i kami, Ford taung 1950, su sěngkatau saudara. Sěmbul᷊ang bọu ene, su ěllo sěbạe matětị, i kami napul᷊e bọu něnginjilẹ̌ kụ sěbạe nal᷊owe ual᷊ingu dimal᷊eng bọu wal᷊e sarang bal᷊e dingangu něněntiro Alkitapẹ̌. Nahumpạu wal᷊e, i kami sěbạe himěkosẹ̌. Otong i kami seng ene su mukang bal᷊e! Su kaca mukane piạ karětasẹ̌, kụ kạbawohẹ: ”Oto ini takụ nisul᷊e nakoạ hadiah wọu iạ. Salam bọu anạu sěmbaụu.”

Piạ lai kapiang naung tawe kawul᷊enangku. Su taung 1962, iạ nakaěbạ undangan tumol᷊e Sekolah Pelayanan Kerajaan su South Lansing, New York. Sikol᷊ah ini nikoạ karěngụe sěmbul᷊ang gunang melatih manga pengawas sidang, wilayah, dingangu distrik. Su tempo ene iạ tawẹ apa hal᷊ẹ̌ku, kụ doiti kami kate mahal᷊i. Katewe, perusahaan telepon su Pine Bluff seng nẹ̌kui si siạ gunang wawancara kerja. Mạeng iạ nitarimạ, iạ makoạ taumata pisi maitung humotong měhal᷊ẹ̌ sene. I sire naul᷊ị iạ nitarimạ. Apa harusẹ̌ koatengku? Iạ tawẹ apa roitẹ̌ makoạ sarang New York. Hakị u ene, iạ nẹ̌pikirẹ̌ měnarimạ hal᷊ẹ̌ ene, kụ tawe měnarimạ undangan sikol᷊ah. Katewe, su tempong iạ seng měmohẹ suratẹ̌ sarang Betel, sěmbaụ hal᷊ẹ̌ tawe kawul᷊enang nariadi.

Bědang mal᷊ukadẹ̌, sěngkatau saudari su sidang i kami, kụ kawinge bal᷊inẹ Sahiding Yehuwa, něnětụ tukadu wal᷊eng i kami dingangu něgělị amplopẹ̌. Su ral᷊unge piạ lawọ doitẹ̌. I sie dingangu manga anạe bědang dararodọ měbẹ̌bangung mal᷊uka-l᷊ukadẹ̌ gunang měngěbụ onasẹ̌ su kěbongu kapesẹ̌. I sire někoạ ene tadeạu botonge makaghělị doitẹ̌ si siạ gunang makoạ sarang New York. Saudari ene naul᷊ị, ”Tamaịe pẹ̌sikol᷊ah, pěngěndung pakal᷊awọ, bọu ene pẹ̌bal᷊ị kụ těntiroi i kami!” Bọu ene, iạ nẹ̌kiwal᷊o su perusahaan telepon apa botonge iạ měhal᷊ẹ̌ hědo limang  kamisa bọu jadwalẹ̌ seng nitantu. I sire apidu simimbahẹ̌, ”Tawe wotonge!” Katewe ene tawe nakoạ soalẹ̌ si siạ. Iạ seng někoạ putusang. Iạ mal᷊uasẹ̌ tawe něngal᷊ạ hal᷊ẹ̌ ene!

I Gloria lai mapulu mẹ̌běke pengalaman i kami su Pine Bluff: ”Iạ sěbạe puluang su tampạ ene! Piạ 15 sarang 20 su kataune něngěndung Alkitapẹ̌ dingangku. Hakị u ene, biasane i kami měnginjilẹ̌ bọu wal᷊e sarang bal᷊e mal᷊ukadẹ̌, bọu ene měněntiro Alkitapẹ̌ sarang hěbi, pẹ̌sěnsul᷊ẹ sarang pukul᷊ẹ̌ 11. Měnginjilẹ̌ paị sene sěbạe mapaelẹ̌! Iạ mapulu turusẹ̌ mẹ̌tanạ sene. Sěběnarẹ̌e, iạ madiri tugasẹ̌ku mẹ̌bal᷊ui kụ tumol᷊e pekerjaan keliling. Katewe Yehuwa něnadia tugasẹ̌ bal᷊inẹ gunang i kami.” Kụ i Sie něgělị ene.

Su tempong i kami merintis su Pine Bluff, i kami něloho formulir gunang makoạ perintis istimewa. I kami mangimang sarung makaěbạ tugasẹ̌ ene, ual᷊ingu pengawas distrik mapulu i kami mẹ̌tul᷊ung sěmbaụ sidang su Texas kụ makoạ perintis istimewa paị sene. Kụ i kami mapulu ene. I kami měngẹ̌ngampal᷊ẹ̌ sasimbahe, katewe sabang i kami měmarikěsa tampạu suratẹ̌, tampạ ene tawẹ apa lohone. Samurine, suratẹ̌ ene nasongo su wul᷊ang Januari 1965. Iạ nakaěbạ tugasẹ̌ nakoạ pengawas wilayah! Saudara Leon Weaver, orasẹ̌ ini nakoạ koordinator Panitia Cabang Amerika Serikat, lai nihengkẹ nakoạ pengawas wilayah su tempo mẹ̌sul᷊ung dingangku.

Iạ sěbạe gụgěnggang nakoạ pengawas wilayah. Ěndịu sěntaung kal᷊imona, pengawas distrik, Saudara James A. Thompson, Jr., němarikěsa apa iạ memenuhi syarat. Dingangu kapiang naunge i sie nělahẹ apa bědang harusẹ̌ koatengku tadeạu makoạ pengawas wilayah mapaelẹ̌. Tawe nararěna bọu ene, su apang nakoạ pengawas wilayah, iạ buhudeng nakasingkạ iạ memang harusẹ̌ makaěbạ sasasa ene. I Saudara Thompson kai pengawas distrik humotong něndingang si siạ su tugasẹ̌ ini. Iạ něngěndung mal᷊awọ bọu saudara masatia ini.

Su tempo ene, pengawas wilayah kětạeng nakatarimạ mahal᷊i pelatihan. Iạ měmanda kerea pengawas wilayah wal᷊inẹ nẹ̌tiwo sěmbaụ sidang su ral᷊ungu sěngkamisa, bọu ene misa tuhụe i sie měmanda si siạ mẹ̌tiwo sidang tuhụe. I sie měgělị těntiro dingangu těgu, katewe bọu ene, iạ seng měhal᷊ẹ̌ hala. Iạ nakatahěndung iạ bọu naul᷊ị si Gloria, ”Apa i sie seng harusẹ̌ matamai?” Katewe, iạ něnětạ nakaěna sěmbaụ hal᷊ẹ̌ penting: Mang piạ saudara-saudara makatul᷊ung si kitẹ asal᷊ẹ̌ i kitẹ měmala i sire mẹ̌tul᷊ung si kitẹ. Iạ bědang měngẹ̌ngarěga tul᷊umang bọu saudara-saudara piạ pengalaman mal᷊awọ kere i J. R. Brown, i sie su tempo ene nakoạ pengawas wilayah, dingangi Fred Rusk, sěngkatau anggota Betel.

 Su tempo ene, kawawěnsingu ras piạ su lawọ tampạ. Su sěngkatempo, su tempong i kami nẹ̌tiwo Tennessee, manga anggota KKK měkẹ̌kampanye su soa ene. Su ěllo wal᷊inẹ, su apang bọu něnginjilẹ̌, i kami něngirul᷊e su sěmbaụ restoran. Bọu ene, su tempong iạ nakoạ sarang WC, iạ nitol᷊engu sěngkatau esẹ piạ tatọe rasis kụ gatine makạtatakụ. Katewe, sěngkatau saudara pisine mawira dingangu badange gěguwạ, simuẹ̌ su WC kụ nẹ̌kiwal᷊o, ”Aman wue, Brur Herd?” Tau esẹ ene apidu siměbang kụ tawe nisěhụ něpakẹ WC. Taunge bọu ene, iạ nakahěngang kawawěnsingu ras nariadi bal᷊inẹ ual᷊ingu awạu pisi katewe ual᷊ingu rosang kitẹ kěbị. Iạ lai něngěndung taumata apang pisine nẹ̌tatěntang dingangi kitẹ botonge makoạ anạu sěmbaụ i kitẹ, kụ lai mapulu mate gunang i kitẹ.

Iạ nakoạ pengawas wilayah karěngụe 12 su taunge, kụ nakoạ pengawas distrik 21 su taunge. Tempo ene kai makạl᷊uasẹ̌ dingangu napenẹu pengalaman makatoghasẹ̌ pangangimang. Katewe, al᷊amatẹ̌ bal᷊inẹ měngẹ̌ngampal᷊ẹ̌ si kami. Su wul᷊ang Agustus 1997, iping i kami nariadi. I kami nakaěbạ undangan měhal᷊ẹ̌ su Betel Amerika Serikat, ene 38 su taunge bọu tempong i kami něloho formulir Betel. Bul᷊ang tuhụe, i kami něnětạ něhal᷊ẹ̌ su Betel. Iạ nẹ̌pikirẹ̌ pengawas su Betel mapulu iạ měhal᷊ẹ̌ sene kětạeng mal᷊ighạ, katewe tala.

Humotong, iạ nakaěbạ tugasẹ̌ su Departemen Dinas. Iạ něngěndung mal᷊awọ paị sene! Saudara-saudara su departemen ene nakatarimạ lawọ kakiwal᷊o masigěsạ bọu badan penatua dingangu pengawas wilayah su patikụ negeri. Iạ mal᷊uasẹ̌ ual᷊ingu saudara-saudara sene masabarẹ̌ měněntiro si siạ. Manga iạ saụ makaěbạ tugasẹ̌ su departemen ene, iạ bědang harusẹ̌ měngěndung mal᷊awọ bọu i sire.

Iạ dingangi Gloria sěbạe mal᷊uasẹ̌ něhal᷊ẹ̌ su Betel. I kami nawiasa mẹ̌bangung mal᷊ukadẹ̌, kụ kebiasaan ini sěbạe nakatul᷊ung si kami su Betel. Aramanung nal᷊iu wọu sěntaung, iạ něnětạ nakoạ asisten Panitia Dinas bọu Badan Pimpinan Sahiding Yehuwa. Bọu ene, su taung 1999, iạ nihengkẹ nakoạ anggota Badan Pimpinan. Iạ něngěndung mal᷊awọ su tugasẹ̌ buhu ini. Katewe tatěntiro paling penting niěndungangku ute: Těmbonangu sidang kai i Yesus Kristus, bal᷊inẹbe taumata, maning i sai i sie.

Mạeng mẹ̌tiněna soal u pěbawiahẹ̌ku, pẹ̌sěnsul᷊ẹ iạ nẹ̌pěndang kere i Nabi Amos. I sie měngangahạ domba sederhana, kụ hal᷊ẹ̌e měnẹ̌nusụ buang arang kěhu, ene kětạeng kẹ̌kanengangu taumata masusah. Katewe, Yehuwa měmẹ̌manda si Amos. Mawu něhengkẹ si sie nakoạ nabi dingangu něgělị lawọ al᷊amatẹ̌ si sie. (Ams. 7:14, 15) Kerene lai, Yehuwa měmẹ̌manda si siạ, anạu mělahěnsinuang su Liberty, Indiana. Kụ, Yehuwa seng něgělị lawọ al᷊amatẹ̌ si siạ. Al᷊amatẹ̌ nighělị’E tumanịu mal᷊awọ gunang takụ běkeěng! (Baw. 10:22) Kangerẹ, biahẹ̌ku masusah, katewe orasẹ̌ ini, iạ sěbạe kalạ su rohani, nal᷊iu marau wọu apa tẹ̌tiněnaěngku!