Su tempong sidang Roma nakaringihẹ̌ i Paulus masongo, pirang katau saudara dimal᷊eng karaune 60 kilometer gunang mẹ̌sombang dingange. Kerea pěndang i Paulus su tempong nakasilo kakěndagẹ̌ dingangu pengorbanan saudara-saudara ini? ”Su tempong nakasilo si sire, Paulus nakitarimakasẹ su Mawu dingangu natoghasẹ̌.” (Kis 28:15) Lawọ masingkạ i Paulus hanesẹ̌ měnoghasẹ̌ sidang-sidang apang nitiwonge. Katewe, su tempong nakoạ tahanan, i Paulus harusẹ̌ toghasengu anạu sěmbaụe.​—2Kor 13:10.

Orasẹ̌ ini pengawas wilayah mětẹ̌tiwo manga sidang gunang měnoghasẹ̌ anạu sěmbaụ. Kere umatu Mawu wal᷊inẹ, i sire lai aramanung nal᷊owe, gụgěnggang, dingangu makadodọ naung. Su tempong pengawas wilayah dingangu kawinge mẹ̌tiwo sidangu, apa botonge koatengu gunang měnoghasẹ̌ si sire?​—Rm 1:11, 12.

• Děnta su pertemuan dinas lapangan. Pengawas wilayah sarung matoghasẹ̌ mạeng penyiar měkoạ pengorbanan gunang duměnta su PDL. (1Tes 1:2, 3; 2:20) Aramanung i kau botonge merintis ekstra su wul᷊ang ene. Apa i kau botonge měndaftarẹ̌ gunang měnginjilẹ̌ dingangu pengawas wilayah arau kawinge? I kau lai botonge měmaringang pengawas wilayah arau kawinge sarang PAR i kitẹ. I sire mal᷊uasẹ̌ botonge měnginjilẹ̌ dingangu penyiar nẹ̌tatěntang, i sire apang buhu arau tawe tumanịu pande měnginjilẹ̌.

• Todẹko sipatẹ̌ puluang měnarimạ sake. Apa i kau botonge měnadia pẹ̌tatikilang dingangu kaěng? Mạeng i kitẹ měkoạ ene, pengawas wilayah dingangu kawinge sarung makapěndang i kitẹ makěndagẹ̌ si sire. Pẹ̌tahěndung i sire tawe měharapẹ̌ piạ lawọ harusẹ̌ sadiang i kitẹ.​—Luk 10:38-42.

• Daringihẹ̌ kụ tol᷊e laahạ dingangu sasasa seng nighělị. Pengawas wilayah mapulu mẹ̌tul᷊ung si kitẹ gunang turusẹ̌ měkoạ kemajuan su pelayanan si Yehuwa. Pẹ̌sěnsul᷊ẹ, aramanung i sie harusẹ̌ měgělị sasasa těgasẹ̌. (1Kor 5:1-5) I sie sarung mal᷊uasẹ̌ mạeng i kitẹ matuhụ dingangu tunduk.​—Ibr 13:17.

• Todẹko pěngangarěga. Paul᷊ị su pengawas wilayah dingangu kawinge apa nikoạ i rẹ̌dua piạ gunane si kau. I kau botonge maul᷊ị langsung arau měmohẹ su catatan arau kartu—Kol 3:15.