PĚNGANGĚNDUNGANG 16

Apa Nikoạ i Yesus su Tempong i Sie su Dunia?

MAINKAN

Lawọ taumata nẹ̌tiněna i Yesus kai anạ buhudeng nalahirẹ̌, sěngkatau nabi matahuěna, arau tau maraning mate. Katewe, apa i kitẹ botonge makasingkạ mal᷊awọ soal i sie mạeng měmarikěsa soal u pěbawiahe su dunia? Su pěngangěndungang ini, i kitẹ sarung měmanda piram baụ hal᷊ẹ̌ sěbạe penting nikoạ i Yesus kụ kerea ene piạ pěngarune si kau.

1. Apa hal᷊ẹ̌ i Yesus kahumotongange?

Hal᷊ẹ̌ i Yesus kahumotongange ene kai ”měhabarẹ̌ habarẹ̌ mapia soal u Kararatuangu Mawu”. (Basa Lukas 4:43.) I sie něhabarẹ̌ Mawu sarung mapakarěntang sěmbaụ kararatuang arau pěmamarenta kụ ene sarung makailang kěbị masalang taumata. * Su kanandụu tělu taung stengah Yesus něhal᷊ẹ̌ masěghadẹ̌ gunang měhabarẹ̌ habarẹ̌ makal᷊uasẹ̌ ini.—Matius 9:35.

2. Kawe nụe Yesus někoạ mukjizat?

Alkitapẹ̌ nẹ̌běke piạ lawọ ”kakanoạ napenẹu kawasa, keajaiban, dingangu mukjizat seng nikoạ u Mawu limiung i [Yesus]”. (Kis. 2:22) Mawu něgělị kawasa si Yesus. Hakị u ene, i Yesus botonge makaatorẹ̌ keadaan alam, něgělị kaěng su hiwune taumata, napakapia taumata masakị, dingangu saụ napakawiahẹ̌ taumata nate. (Matius 8:23-27; 14:15-21; Markus 6:56; Lukas 7:11-17) Mukjizat i Yesus napakal᷊ahẹ i sie kai nirol᷊ohu Mawu. Manga mukjizat ene lai něnodẹ Yehuwa piạ kawasa gunang mapakailang kěbị masalang i kitẹ.

3. Apa wotonge kaěndungang i kitẹ bọu dal᷊engu wiahi Yesus?

Yesus timuhụ si Yehuwa su haghing situasi. (Basa Yohanes 8:29.) Maning dẹ̌darihang, Yesus masatia někoạ apa nirorongang i Amange sarang i sie nate. I sie něnodẹ taumata botonge mẹ̌tahamawu su Mawu maning piạ situasi masigěsạ. Hakị u ene, i Yesus ”nakoạ pẹ̌tatěnoěng tadeạu [i kitẹ] tumol᷊e pakapia manga ěnạu laede”.—1 Petrus 2:21.

BANGKA PAKARAL᷊UNG

Mahịe měngěndung kerea i Yesus němahiạ habarẹ̌ mapia dingangu někoạ mukjizat.

4. Yesus něhabarẹ̌ habarẹ̌ mapia

Yesus liměngang karaune hasụe su kilone gunang měhabarẹ̌ habarẹ̌ mapia su lawọ taumata. Basa Lukas 8:1, bọu ene bisarai manga kakiwal᷊o ini:

Apa i Yesus něnginjilẹ̌ kětạeng su taumata apang diměnta gunang dumaringihẹ̌ si sie?
Apa seng nikoạ i Yesus tadeạu botonge mẹ̌sombang dingangu taumata?

Mawu seng naul᷊ị Mesias sarung měhabarẹ̌ habarẹ̌ mapia. Basa Yesaya 61:1, 2, bọu ene bisarai manga kakiwal᷊o ini:

Kerea i Yesus něngganapẹ̌ manga těbal᷊ẹ̌ ini?
Tumuhụ si kau apa taumata orasẹ̌ ini perlu makaringihẹ̌ habarẹ̌ mapia?

5. Yesus něněntiro hal᷊ẹ̌ maarěga

Yesus tawe kětạeng něhabarẹ̌ habarẹ̌ mapia soal u Kararatuangu Mawu. I sie lai něněntiro hal᷊ẹ̌ maarěga. Pěmanda piram baụ contone su Nasẹ̌ su Wul᷊udẹ̌. Basa Matius 6:14, 34 dingangu 7:12, bọu ene bisarai manga kakiwal᷊o ini:

Su manga ayatẹ̌ ini, sasasa maarěga apa nighělị i Yesus?
Tumuhụ si kau, apa manga sasasa ene bědang piạ gunane sarang orasẹ̌ ini?

6. Yesus někoạ mukjizat

Yehuwa seng něgělị si Yesus kawasa gunang měkoạ lawọ mukjizat. Gunang měmanda sěmbaụ contone, basa Markus 5:25-34 arau putarẹ̌ VIDEONE. Bọu ene bisarai manga kakiwal᷊o ini.

VIDEO: Sěngkatau Wawine Masakị Nipakapia (5:10)

Su video ene, sěngkatau wawine masakị mangimang apa?
Bọu mukjizat ene apa nakaherang si kau?

Basa Yohanes 5:36, bọu ene bisarai kakiwal᷊o ini:

Mukjizat nikoạ i Yesus ”nakoạ sahidi” arau něgělị bukti apa soal i Yesus?

Apa i kau masingkạ?

I kitẹ nakasingkạ lawọ hal᷊ẹ̌ soal i Yesus bọu ěpạ bukẹ̌ nisěbạ Injilẹ̌. Ene kai Matius, Markus, Lukas, dingangu Yohanes. I sire apang němohẹ Injilẹ̌ ene němohẹ manga hal᷊ẹ̌ nẹ̌tatěntang soal i Yesus. Manga hal᷊ẹ̌ ene nẹ̌tatahino sěmbaụ su wal᷊inẹ, kụ nakakoạ si kitẹ nakasingkạ hal᷊ẹ̌ sěbạe mapaelẹ̌ soal u pěbawiahi Yesus.

MATIUS

němohẹ Injilẹ̌ kahumotongange. I sie nělahẹ soal u manga těntirong i Yesus, kụ kahumotongange soal u Kararatuangu Mawu.
MARKUS

němohẹ Injilẹ̌ kanibụkange. I sie nẹ̌běke lawọ soal u peristiwa makạlaherang.
LUKAS

nẹ̌běke soal u mẹ̌doa ene penting si Yesus. I sie lai němohẹ i Yesus mapia měkoạ manga wawine.
YOHANES

němohẹ lawọ hal᷊ẹ̌ soal u apa niul᷊ị i Yesus su manga hapịe dingangu su taumata wal᷊inẹ. Ini makatul᷊ung si kitẹ makasingkạ sipati Yesus.