PĚNGANGĚNDUNGANG 07

Yehuwa Ene Kerea?

MAINKAN

Yehuwa Ene Kerea?

Su tiněnanu, Yehuwa ene kerea? Apa i Sie sěbạe makạlaherang katewe lai sěbạe marau bọu i kau, kere bituing su galaksi wal᷊inẹ? Arau, apa i kau nẹ̌tiněna Yehuwa ene bal᷊inẹ sěmbaụ pribadi, katewe sěmbaụ katatoghasẹ̌, kere badai petir? Sěběnarẹ̌e, Yehuwa ene kerea? Su Hengetang’E, Alkitapẹ̌, Yehuwa nělahẹ manga sipat’E. Bọu ene lai i Sie naul᷊ị i Sie mapadul᷊i si kau.

1. Kawe nụe i kitẹ tawe makasilo Mawu?

”Mawu kai Rohkẹ̌.” (Yohanes 4:24) Yehuwa tawẹ apa badang kere i kitẹ. I Sie kai Pribadi roh, kụ mětẹ̌tanạ su sorga, tampạ tawe kẹ̌kasilong i kitẹ.

2. Kerea sipati Yehuwa?

Maning Yehuwa tawe kẹ̌kasilong, i Sie kai Pribadi kahěngang-hěngang ene, kụ piạ sipatẹ̌ makakoạ si kitẹ mapulu kuměndagẹ̌ si Sie. Alkitapẹ̌ naul᷊ị, ”Yehuwa makěndagẹ̌ su kal᷊aadilẹ̌, kụ i Sie tawe měněntang manga ělang’E apang masatia.” (Mazmur 37:28) I Sie lai ”napenẹu kakěndagẹ̌ dingangu tatal᷊ěntụ”, něngělembo su taumata apang nasigěsạ. (Yakobus 5:11) ”Yehuwa marani dingangi sire apang nasusah naunge; i Sie měngambang taumata apang nakadodọ naung.” (Mazmur 34:18, catatan kaki) Kụ, apa i kau masingkạ kakanoạ i kitẹ piạ pěngarune si Yehuwa? Taumata apang někoạ barang dal᷊akị makakoạ si Sie masusah naung. (Mazmur 78:40, 41) Katewe taumata apang měkoạ barang nihino, makakoạ si Sie mal᷊uasẹ̌.—Basa Amsal 27:11.

3. Kerea Yehuwa něnodẹ i Sie makěndagẹ̌ si kitẹ?

Sipati Yehuwa kahumotongange ene kai kakěndagẹ̌. Sěběnarẹ̌e, ”Mawu kai kakěndagẹ̌”. (1 Yohanes 4:8) Yehuwa něnodẹ kakěndag’E bal᷊inẹ kětạeng limiung Alkitapẹ̌, katewe lai limiung diadikang’E. (Basa Kisah 14:17.) Contone, kěnang pẹ̌tiněna kerea i Sie něndiadi si kitẹ. I Sie něgělị si kitẹ kemampuan gunang měmanda manga warna masadadạ, dumaringihẹ̌ musik mapaelẹ̌, dingangu kumaěng kaěng matemang. I Sie mapulu i kitẹ měbiahẹ̌ mal᷊uasẹ̌.

BANGKA PAKARAL᷊UNG

Mahịe měngěndung apa nipakẹ i Yehuwa gunang měkoạ manga hal᷊ẹ̌ makạlaherang. Bọu ene, mahịe měmanda kerea Yehuwa něnodẹ manga sipat’E makạlaherang.

4. Rohkẹ̌ masusi ene kai katatoghasu Mawu

Kere i kitẹ měpakẹ lima gunang měhal᷊ẹ̌, Yehuwa něpakẹ rohkẹ̌ masusi gunang měkoạ apa ikẹ̌kapulu-Ne. Alkitapẹ̌ něnodẹ rohkẹ̌ masusi ene bal᷊inẹ sěmbaụ pribadi, katewe katatoghasẹ̌ nipakẹ u Mawu gunang měkoạ haghing hal᷊ẹ̌. Basa Lukas 11:13 dingangu Kisah 2:17, bọu ene bisarai kakiwal᷊o ini:

I kitẹ botonge mẹ̌dorong rohkẹ̌ masusi, kụ Mawu sarung ”měgělị” ene si kitẹ. Mạeng kerene, tumuhụ si kau apa rohkẹ̌ masusi ene sěmbaụ pribadi, arau apa ene katatoghasu Mawu? Kawe nụe i kau simimbahẹ̌ kerene?

Yehuwa něpakẹ rohkẹ̌ masusi gunang měkoạ manga hal᷊ẹ̌ makạlaherang. Basa Mazmur 33:6 dingangu 2 Petrus 1:20, 21, bọu ene bisarai kakiwal᷊o ini:

Yehuwa něpakẹ rohkẹ̌ masusi gunang měkoạ manga hal᷊ẹ̌ apa?

5. Sipati Yehuwa sěbạe makạlaherang

Musa seng taunge masatia měnẹ̌němbah Mawu, katewe i Sie mapulu makasingkạ limembong mal᷊awọ soal u Měndariadine. Hakị u ene, i Musa naul᷊ị su Mawu, ”Tul᷊ungko iạ makasingkạ dal᷊eng’U, tadeạu iạ makasingkạ si Kau.” (Keluaran 33:13) Hakị u ene, Yehuwa naul᷊ị manga sipat’E si Musa. Basa Keluaran 34:4-6, bọu ene bisarai manga kakiwal᷊o ini:

Apa sipati Yehuwa seng niul᷊ị’E si Musa?
Sipati Yehuwa sude limembong ikẹ̌kapuluangu?

6. Yehuwa mapadul᷊i su taumata

Kangerẹ, tau Ibrani kai umatu Mawu, kụ i sire nakoạ ělang su Misirẹ̌. Kerea pěndang i Yehuwa su tempong umat’E nasigěsạ? Putarẹ̌ rekaman AUDIO kụ tol᷊e pẹ̌bawasang su rekaman ene, arau basa Keluaran 3:1-10. Bọu ene, bisarai manga kakiwal᷊o ini.

AUDIO: Yehuwa Mapadul᷊i su Kasasigěsạ i Sire (2:45)

Tumuhụ manga ayatẹ̌ kanini, kerea pěndang i Yehuwa su tempong nakasilo taumata nasigěsạ?—Pěmanda ayatẹ̌ 7 dingangu 8.
Tumuhụ si kau, apa Yehuwa kahěngang-hěngang mapulu mẹ̌tul᷊ung taumata, kụ apa i Sie kahěngang-hěngang botonge makatul᷊ung? Kawe nụe i kau simimbahẹ̌ kerene?