Mawu tutune kai Měndariadi kěbị haghi. I Sie tawẹ apa pěnẹ̌takenge arau pěngěngsuenge. (Mazmur 90:2) I Sie Simbul᷊u habarẹ̌ mapia su Alkitapẹ̌. (1 Timotius 1:11) Ual᷊ingu pěbawiahi kitẹ asal᷊e bọu Mawu, i kitẹ maněmbah kětạeng si Sie.​—Basa Wahyu 4:11.

Tawẹ apa taumata bọu nakasilo Mawu, ual᷊ingu i Sie kai Rohkẹ̌, ene mangal᷊ene pěbawiah’E nẹ̌tatěntang dingangu kěbị apang měbẹ̌biahẹ̌ su dunia. (Yohanes 1:18; 4:24) Katewe, i kitẹ botonge makasingkạ kerea sipatu Mawu bọu diadikang’E. Contone, haghing bua dingangu bungang něnodẹ i Sie makěndagẹ̌ dingangu mapelesa. Kaguwạu kawasa-Ne kẹ̌kasilong mal᷊ahẹ bọu diadikang’E su langị dingangu su dunia.​—Basa Roma 1:20.

I kitẹ makasingkạ mal᷊awọ sipatu Mawu mạeng mẹ̌basa Alkitapẹ̌. Contone, Alkitapẹ̌ nělahẹ apa ikẹ̌kapulu-Ne, apa tawẹ ikẹ̌kapulu-Ne, kerea i Sie měkoạ taumata, dingangu apa koateng’E su haghing situasi.​—Basa Mazmur 103:7-10.

Yesus naul᷊ị, ”I Amang i kami su sorga, apakasusiko areng’U.” (Matius 6:9) Maning titelu Mawu mal᷊awọ, areng’E kětạeng sěmbaụ. Cara taumata mẹ̌sěbạ arengu Mawu nẹ̌tatěntang bọu bawera sěmbaụ dingangu bawera wal᷊inẹ. Su werang Sangihẹ̌, arengu Mawu nisěbạ ”Yehuwa”. Katewe piạ lai mẹ̌sěbạ ”Yahweh”.​—Basa Mazmur 83:18.

Su lawọ Alkitapẹ̌ arengu Mawu seng niěmụ, kụ nịgaghanti dingangu titelẹ̌ Mawu arau Duata. Katewe, su tempong Alkitapẹ̌ niwohẹ, arengu Mawu nisẹ̌bạ nal᷊iu wọu 7.000 su  sul᷊ẹe. Su tempong i Yesus něněntiro taumata soal u Mawu, i sie nělahẹ arengu Mawu si sire.​—Basa Yohanes 17:26.

Pẹ̌biala video Apa Mawu Piạ Arenge?

Ual᷊ingu piạ lawọ kasasusah, apa ene mangal᷊ene Yehuwa tawe měpẹ̌padul᷊i si kitẹ? Lawọ taumata maul᷊ị mạeng i kitẹ masigěsạ, ene kai sasal᷊ukạ bọu Mawu. Katewe, ene konti.​—Basa Yakobus 1:13.

Mawu měngẹ̌ngarěga si kitẹ, hakị u ene i Sie něgělị hakẹ̌ měmile si kitẹ. Apa i kitẹ měngẹ̌ngarěga hakẹ̌ ene? (Yosua 24:15) Katewe, kal᷊awokange taumata němile měkoạ barang dal᷊akị su taumata wal᷊inẹ, kụ ene nakarěntang kasasigěsạ. Naung i Yehuwa nasusah nakasilo hal᷊ẹ̌ tawẹ adil kerene.​—Basa Kejadian 6:5, 6.

Yehuwa kai Mawu makěndagẹ̌ si kitẹ. I Sie mapulu i kitẹ mẹ̌biahẹ̌ mal᷊uasẹ̌. Seng mal᷊ighạ i Sie mapakailang kasasigěsạ dingangu kěbị apang nakasusah si kitẹ. Katewe orasẹ̌ ini, piạ alasange i Sie němala kasasigěsạ nariadi. I kitẹ sarung měngěndung ene su Pěngangěndungang 8.​—Basa 2 Petrus 2:9; 3:7, 13.

Yehuwa něgausẹ̌ si kitẹ gunang mẹ̌těngkarani si Sie bọu daroa. I Sie měpẹ̌paduli si kitẹ pẹ̌sěngkatau. (Mazmur 65:2; 145:18) Yehuwa mapulu měgělị ampung si kitẹ. I Sie měngẹ̌ngarěga apa nikoạ i kitẹ gunang makal᷊uasẹ̌ si Sie, maning pẹ̌sěngsul᷊ẹ i kitẹ tawe nakakoạ ene. Hakị u ene, maning tawe nasukụ, i kitẹ tatapẹ̌ botonge mědal᷊ahapị dingangu Mawu.​—Basa Mazmur 103:12-14; Yakobus 4:8.

Ual᷊ingu Yehuwa něgělị pěbawiahẹ̌ si kitẹ, kakěndagi kitẹ si Yehuwa harusẹ̌ limembong gěguwạ sul᷊ungu kakěndagi kitẹ su taumata wal᷊inẹ. (Markus 12:30) Su tempong něngěndung soal u Mawu dingangu někoạ kěbị kapulu-Ne, i kau něnodẹ kakěndagẹ̌ si Yehuwa. Kụ hasile, pẹ̌dal᷊ahapịu dingangi Yehuwa sarung limembong matoghasẹ̌.​—Basa 1 Timotius 2:4; 1 Yohanes 5:3.