Yesus nẹ̌sombang dingangu manga tumatol᷊ene su Galilea. I sie něgělị si sire parenta sěbạe penting: ’Dakọe tamai kụ koạko taumata bọu haghing bangsa mariadi muritẹ̌ku. Těntiroko si sire kěbị apa seng takụ nitěntiro si kamene, kụ sahaniko i sire.’ Bọu ene i sie nẹ̌diandi, ’Pẹ̌tahěndungke, iạ sarung turusẹ̌ duměndingang si kamene.’

Su kanandụu 40 su ěllone dongkeng i sie saụ nipěbiahẹ̌, Yesus nẹ̌sombang dingangu hasụe tumatol᷊ene su Galilea dingangu Yerusalem. I sie něněntiro manga hal᷊ẹ̌ penting si sire dingangu někoạ lawọ mukjizat. Bọu ene, Yesus nẹ̌sombang dingangu manga rasule su Wul᷊udu Zaitun. I sie nẹ̌bera, ’Abe pěněntang soa ini. Pěngampal᷊e apa seng nikědong i Amang.’

Manga rasulẹ̌ tawe nakaěna apa mangal᷊ene bawerane ene. I sire nẹ̌kiwal᷊o, ’Apa orasẹ̌ ini i Tuang makoạ Datung Israel?’ Yesus nẹ̌bera, ’Yehuwa seng něnantu kange iạ makoạ Datu, kụ orasẹ̌ ini bědang bal᷊inẹ tempone. Seng mal᷊ighạ i kamene gělịkangu rohkẹ̌ masusi, kụ i kamene sarung makoạ sahidiku. Pěhabarẹ̌e habarẹ̌ mapia su Yerusalem, Yudea, Samaria, dingangu sarang tampạ marau su dunia.’

Bọu ene i Yesus nahengkẹ sarang langị, kụ i sie natutu dingangu binawa. Manga murite turusẹ̌ měmẹ̌manda sarang langị, katewe i sie seng tawe dịe.

Bọu ene, manga murite něněntang Wul᷊udu Zaitun kụ nakoạ sarang Yerusalem. I sire hanesẹ̌ měkẹ̌komol᷊ẹ̌ su sěmbaụ ruangan bageang dasị su sěmbaụ bal᷊e gunang mẹ̌doa. I sire měngẹ̌ngampal᷊ẹ̌ i Yesus měgělị laahạ tuhụe.