Yesus bal᷊inẹ kětạeng botonge mapakapia taumata masakị dingangu mapakawiahẹ̌ taumata nate. I sie lai botonge měngatorẹ̌ anging dingangu tahiti. Su apang bọu nẹ̌doa su wul᷊udẹ̌, Yesus němanda sarang Laudẹ̌ Galilea, kụ laudẹ̌ ene sěbạe maihạ. Manga rasule měsẹ̌sakaeng lụlawang anging maihạ su laudẹ̌ ene. Yesus diměsung bọu wul᷊udẹ̌ kụ něnětạ dimal᷊eng su wowong akẹ sarang sakaengu manga rasule. Su tempong i sire nakasilo piạ taumata dụdal᷊eng su wowong akẹ, i sire natakụ. Katewe i Yesus nẹ̌bera, ’Abe katakụ. Ini iạ.’

I Petrus nẹ̌bera, ’Tuang, mạeng ene kahěngang-hěngang i kau, oroko iạ makoạ sarang i kau.’ Yesus nẹ̌bera, ’Ramahịe.’ Hakị u ene, maning laudẹ̌ maihạ i Petrus limintụ bọu sakaeng kụ dimal᷊eng su wowong akẹ nakoạ sarang i Yesus. Katewe su tempong seng marani, Petrus němanda luạ gěguwạ kụ i sie natakụ. I Petrus něnětạ nawul᷊usẹ̌. I sie nẹ̌kui dingangu tingihẹ̌ maihạ, ’Tuang, ambangeko iạ!’ Yesus něněngal᷊ẹ̌ limane kụ nẹ̌bera, ’Kawe i kau natakụ? Su apa pangangimangu?’

Yesus dingangi Petrus simake su sakaeng kụ laudẹ̌ ene nal᷊enehẹ̌. Kěnang pẹ̌tiněna pěndangu manga rasulẹ̌ su tempo ene. I sire nẹ̌bera, ”I kau kahěngang-hěngang Ahusu Mawu.”

Yesus něngatorẹ̌ cuaca bal᷊inẹ kětạeng su tempo ene. Su tempo wal᷊inẹ, i Yesus dingangu rasule simake sakaeng nakoạ sarang sěmběkang laudẹ̌. Su tempo ene, Yesus nẹ̌tikị su pětone. Su tempong i sie mětẹ̌tikị, anging maihạ timiụ. Akẹ něnětạ simuẹ̌ sarang sakaeng. Manga rasulẹ̌ němuko si Yesus. I sire nẹ̌kui, ’Guru, i kitẹ seng maraning mate! Tul᷊ungko i kami!’ Yesus nẹ̌bangung kụ nẹ̌bera su laudẹ̌ ene, ”Kal᷊enehẹ̌ko!” Laudẹ̌ ene sěngkělěndịu nal᷊enehẹ̌. Yesus nẹ̌kiwal᷊o su manga rasule, ’Su apa pangangimang i kamene?’ Bọu ene i sire nẹ̌bisara sěmbaụ su wal᷊inẹ, ”Sarang anging dingangu laudẹ̌ lai timuhụ si sie.” Manga rasulẹ̌ něngěndung mạeng i sire kahěngang-hěngang mangimang si Yesus, i sire tawẹ harusẹ̌ matakụ apa-apa.