Kaisar Agustus, měngangawasa su Kararatuangu Romawi, nẹ̌parenta su kěbị tau Yahudi gunang měndaftarẹ̌ areng i sire su soa asal᷊i sire. Hakị u ene, i Yusuf dingangi Maria nakoạ sarang Betlehem, soa asal᷊i Yusuf. I Maria seng maraning melahirkan.

Su tempong nahumpạ su Betlehem, kěbị tampạ penginapan seng napenẹ hakị u ene i sire nẹ̌tanạ su kandang. Su tampạ ene, i Maria nělahirkan si Yesus. I Maria němikung si Yesus dingangu hekạ al᷊usẹ̌ kụ nẹ̌taho si Yesus su tampạu kaěngu binatang.

Su hěbi ene, maraning Betlehem, pirang katau esẹ měnděndiagạ domba su padang. Sěngkělěndịu, sěmbaụ malaekatẹ̌ siměpụ su těngong i sire, kụ tualagu kawawantugi Yehuwa něnualagẹ̌ si sire. I sire natakụ, katewe malaekatẹ̌ ene nẹ̌bera, ’Abe katakụ. Piạ habarẹ̌ makal᷊uasẹ̌. Sahěllo ini, i Mesias seng nalahirẹ̌ su Betlehem.’  Su tempo ene lai, piạ lawọ malaekatẹ̌ siměpụ su langị apidu nẹ̌bera, ’Dalo su Mawu su sorga, dingangu pẹ̌darame su dunia.’ Bọu ene, kěbị malaekatẹ̌ ene nailang. Apa nikoạ u manga měngangahạ domba ene?

I sire nẹ̌bera, ’Bọete i kitẹ sarang Betlehem.’ I sire apidu natamai, kụ nẹ̌sombang dingangi Yusuf, Maria, lai i Yesus kadodọ su kandang.

Kěbị apang dimaringihẹ̌ běkeng manga měngangahạ ene naherang. Maria nẹ̌tiněna pakapia bawerang malaekatẹ̌ ene, kụ i sie tawe niwul᷊e manga bawera ene. Manga měngangahạ ene saụ nẹ̌bal᷊ị sarang tampạ u dombang i sire nipělọ. I sire sěbạe nakitarimakasẹ si Yehuwa ual᷊ingu apa seng nikaringihẹ̌ dingangu nikasilong i sire.