Tau Yehuda masau tawe masatia si Yehuwa kụ saụ něněmbah manga berhala. Taunge, Yehuwa turusẹ̌ mětẹ̌tul᷊ung si sire. I Sie něndolohẹ̌ lawọ nabi gunang měgělị laingatẹ̌ si sire, katewe i sire tawe dimaringihẹ̌. I sire mělẹ̌heghesẹ̌ manga nabi ene. Apa nikoạ i Yehuwa tadeạu i sire seng tawe maněmbah berhala?

Datung Babelẹ̌, i Nebukhadnezar, měngẹ̌ngawasa lawọ bangsa. Su tempong i sie němatạ Yerusalem, kahumotongange i sie něnamẹ si Datu Yehoyakhin, manga pejabat, prajurit, dingangu tahapěkoạ barang kụ i sie nẹ̌bawa si sire sarang Babelẹ̌. I sie lai něngal᷊ạ kěbị barang maarěga bọu bait i Yehuwa. Bọu ene, i sie němile si Zedekia nakoạ datung Yehuda.

Humotong i Zedekia matuhụ si Nebukhadnezar. Katewe, manga wangsa maraning i sire dingangu manga nabi palsu naul᷊ị si Zedekia tadeạu lumawang Babelẹ̌. Yeremia něgělị laingatẹ̌ si Zedekia, ’Mạeng i Tuang tawe satia, su Yehuda sarung piạ taumata pateng, piạ karal᷊unusẹ̌, dingangu piạ sakị.’

Su tempong seng taunge nẹ̌parenta, Zedekia limawang su Babelẹ̌. I sie nẹ̌dorong tul᷊ung su pasukan Misirẹ̌. Nebukhadnezar lai něndolohẹ̌ prajurite gunang lumawang tau Yerusalem, kụ i sire nẹ̌kema něliwung soa ene. Yeremia naul᷊ị si Zedekia, ’Yehuwa nẹ̌bera mạeng i Tuang mětěngkakala su Babelẹ̌, Tuang dingangu soa ini sarung masal᷊amatẹ̌.  Katewe mạeng tala, tau Babelẹ̌ sarung měnutung Yerusalem dingangu mẹ̌taho si Tuang su penjara.’ Zedekia naul᷊ị, ’Iạ tawe mětěngkakala!’

Sěntaung stengah tuhụe, pasukan Babelẹ̌ něndusa těndạu Yerusalem kụ simuẹ̌ dingangu něnutung soa ene. I sire něnutung bait, němate lawọ taumata, dingangu něnamẹ hiwune taumata.

Zedekia timal᷊ang bọu Yerusalem, katewe tau Babelẹ̌ něnahusu si sie. I sire něnamẹ si sie maraning Yerikho kụ nẹ̌bawa si sie sarang i Nebukhadnezar. Manga anạe nipate su těngone. Bọu ene, Nebukhadnezar napakawuta si Zedekia kụ nẹ̌taho si sie su penjara. Samurine i Zedekia nate sene. Katewe, Yehuwa nẹ̌diandi su tau Yehuda, ’Mal᷊iu wọu 70 taung, Iạ sarung mẹ̌bawa si kamene mẹ̌bal᷊ị sarang Yerusalem.’

Piạ lai mangangudạ niwawa sarang Babelẹ̌. Apa nariadi si sire? Apa i sire sarung tatapẹ̌ masatia si Yehuwa?