Maelfu ya wageni waliofika kwenye Maonyesho ya Kimataifa ya Rouen ya 2014 kaskazini mwa Ufaransa walijionea kibanda chenye kuvutia sana kilichokuwa na kichwa “Biblia—Jana, Leo, na Kesho.”

Skrini nje ya kibanda hicho zilionyesha video fupi kuhusu hati za kale za Biblia na kuwavutia wageni wengi. Ndani ya kibanda hicho, wageni walijifunza kuhusu mashauri ya Biblia yanayofaa, usahihi wake wa kihistoria na wa kisayansi, na jinsi Biblia imesambazwa kwa wingi.

Pia, maonyesho hayo yalionyesha jinsi Biblia imeokoka mashambulizi ya muda mrefu na sasa mabilioni ya watu wanaweza kuisoma ikiwa imechapishwa na katika mifumo mbalimbali ya kielektroni. Wageni walipata nakala ya Tafsiri ya Ulimwengu Mpya bila malipo. Hiyo ni tafsiri ya Biblia ambayo imetolewa na Mashahidi wa Yehova katika zaidi ya lugha 120.

Wageni wengi waliwashukuru sana Mashahidi kwa jitihada yao ya kuifanya Biblia ipatikane kwa watu wote. Mwanamke mmoja anayeshughulikia masuala ya vijana alisema hivi alipokuwa akitazama maonyesho hayo pamoja na kikundi cha vijana: “Biblia ni sehemu ya urithi wetu sisi sote. Ni kitabu kilicho hai. Kila mara ninapoisoma, ninapata suluhisho la matatizo yangu.”

Mama mmoja mwenye umri wa miaka 60 alishangaa kujua kwamba angeweza kupata nakala ya Biblia bila malipo. Alisema, “Sisi sote tunapaswa kuanza kuisoma tena kwa sababu tunaihitaji sana!”