MNAMO Mei 7 na 8, 2016, watu walikuwa na hamu kuona jinsi ambavyo mambo yangekuwa katika ukumbi wa jengo la makao makuu la 25 Columbia Heights, Brooklyn, New York. Haikuwa kawaida kwa ukumbi huo kufunguliwa, na maonyesho kuwepo siku za mwisho juma. Hata hivyo, majirani wanaoishi karibu na Betheli walikuwa wamealikwa kwa ajili ya tukio rasmi la maonyesho yetu ya Biblia ya kihistoria.

Kampeni ya kuwaalika majirani ilitoa ushahidi mzuri sana katika jamii na kuwapa uradhi wa kiroho wale wote walioshiriki. Tulitiwa moyo kusikia mambo mazuri kutoka kwa majirani zetu wa muda mrefu.

 Mwanaume mmoja alisema hivi: “Nimeishi katika nyumba mbalimbali [kwenye ujirani wa Betheli] tangu miaka ya 1960, na ninyi mmekuwa majirani bora zaidi. Tutawakosa sana, na tunatamani msiondoke.”

Mwanamke mmoja alisema hivi: “Eneo hili lisingekuwa kama lilivyo leo ikiwa hamngekuwapo. Tunashukuru sana kuwa nanyi kama majirani zetu kwa miaka yote hii.”

Mapainia wengi walioshiriki kuhubiri katika eneo hilo walifurahi kuona jinsi ambavyo majirani hao walikuwa wenye urafiki na wakarimu. Jirani mmoja alishukuru sana tengenezo letu na kusema kwamba amehuzunika sana kukosa maonyesho hayo ya wazi kwa kuwa atakuwa amesafiri.

Matokeo mazuri ya mpango huo yalikuwa yenye kutia moyo sana. Kwa siku mbili, watu 48 ambao si Mashahidi walikuja kuona maonyesho ya Biblia. Kulikuwa na washiriki wa familia ya Betheli ukumbini ambao waliwakaribisha na kuzungumza na majirani waliotembelea maonyesho hayo.

Sally, binti mwenye umri wa miaka 20 hivi, alitumia karibu nusu saa katika eneo la maonyesho. Alipofika ukumbini alikutana na mapainia ambao walimpatia mwaliko. Sally alisema hakujua kwamba huwa kuna maonyesho ya Biblia. Mapainia hao walimwambia kwamba walifurahi sana kukutana na binti mwenye elimu lakini anayethamini Biblia. Sally akajibu hivi: “Ni muhimu sana. Biblia ndio njia pekee ya kujua ujumbe wa Mungu. Ni ujumbe ulio hai kwa ajili ya uhai wetu.”

 Sally alieleza kuwa tamaa yake ya kutaka kujua mengi kuhusu Biblia ilimchochea kujifunza Kilatini na Kigiriki na kwamba anapendezwa sana na kazi ya kutafsiri. Alisema tafsiri sahihi ni muhimu ili ujumbe usichanganywe na maoni ya kibinafsi. Mapainia walipomjulisha kuwa tovuti yetu ya jw.org ina machapisho yanayotegemea Biblia yaliyotafsiriwa katika lugha zaidi ya 800, Sally alishangaa sana na kuvutiwa na jambo hilo. Dada hao walipomweleza jinsi ambavyo watafsiri wamefanya kuhusu jina la Yehova, alishtuka na kuuliza, “Kwa nini jina la Yehova limeondolewa katika Biblia?” Alipokuwa akiondoka, Sally alisema hivi, “Hili ndilo eneo pekee ambalo nimeishi, na ninyi ni majirani bora zaidi.”

Siku ya Jumatatu baada ya maonyesho hayo, kiongozi fulani wa kidini alimwendea John, mshiriki wa familia ya Betheli aliyekuwa akifanya utumishi wa kigari karibu na Betheli. Alimweleza John kwamba alifurahia kutembelea maonyesho hayo na pia anavutiwa kuona tunashikamana sana na Biblia. Baada kuzungumza naye kwa muda, ghafla alisema hivi, “Mashahidi wamenikasirisha!” John hakuelewa, akamuuliza ni kwa nini alihisi hivyo. Alijibu hivi: “Kwa sababu mnahama! BAKINI HAPA! Nunueni majengo makubwa zaidi, au jengeni chochote mnachotaka, lakini msihame. Ninyi ni watu mnaofanya ujirani wetu uwe mzuri. Ninahisi vibaya kuwaona mnahama!”

Kwa ujumla, kampeni ya kuwaalika watu na tukio lenyewe la maonyesho ya Biblia vimetoa ushahidi mzuri sana kwa jamii, na jina la Mungu limejulikana zaidi kwa majirani kuliko ilivyokuwa awali.