Mfalme Ben-hadadi wa Siria alikuwa akivamia Israeli mara kwa mara. Lakini kila mara nabii Elisha alikuwa akimwonya mfalme wa Israeli, hivyo aliweza kuponyoka. Kwa hiyo, Ben-hadadi akaamua kumteka Elisha. Alijulishwa kwamba Elisha alikuwa katika jiji la Dothani, basi akalituma jeshi la Siria ili kumkamata.

Wasiria walifika Dothani usiku. Asubuhi iliyofuata, mtumishi wa Elisha akaenda nje naye akaona kwamba jiji lilikuwa limezingirwa na jeshi kubwa. Akaogopa sana naye akapaaza sauti akisema: ‘Elisha, tutafanya nini?’ Elisha akamwambia hivi: ‘Wale walio pamoja nasi ni wengi kuliko wale walio pamoja nao.’ Mara moja Yehova akamfanya mtumishi wa Elisha aone kwamba milima yote kuzunguka jiji hilo ilikuwa imejaa farasi na magari ya vita ya moto.

Wanajeshi Wasiria walipojaribu kumkamata, Elisha alisali hivi: ‘Yehova, tafadhali wapige kwa upofu.’ Ghafla, ingawa bado wangeweza kuona, wanajeshi hao hawakujua mahali walipokuwa.  Elisha akawaambia wanajeshi hao: ‘Mmekuja kwenye jiji tofauti. Nifuateni, nitawapeleka kwa mwanamume mnayemtafuta.’ Walimfuata Elisha hadi Samaria, ambako mfalme wa Israeli aliishi.

Wasiria walichelewa sana kugundua mahali walipokuwa. Mfalme wa Israeli akamuuliza Elisha: ‘Je, niwaue?’ Je, Elisha alitumia nafasi hiyo ili kulipiza kisasi kwa watu waliokuwa wamejaribu kumuumiza? Hapana. Elisha alisema hivi: ‘Usiwaue. Wape chakula na uwaache waondoke.’ Kwa hiyo, mfalme akawaandalia karamu kubwa na kuwaruhusu waende nyumbani.