SOMO LA 15
Yehova Hakumsahau Yosefu Kamwe
Yosefu alipokuwa gerezani, Farao mfalme wa Misri aliota ndoto ambazo hakuna mtu aliyeweza kueleza maana yake. Mtumishi mmoja alimwambia Farao kwamba Yosefu angeweza kumweleza maana ya ndoto zake. Mara moja, Farao akaagiza Yosefu aletwe.
Farao akamwuliza hivi: ‘Unaweza kunieleza maana ya ndoto zangu?’ Yosefu akamwambia Farao hivi: ‘Nchi ya Misri itakuwa na chakula kingi kwa miaka saba, lakini miaka saba itakayofuata kutakuwa na njaa. Chagua mtu mwenye hekima ahifadhi chakula ili watu wako wasife njaa.’ Farao akajibu hivi: ‘Ninakuchagua wewe! Utakuwa mtu wa pili kwa mamlaka nchini Misri!’ Yosefu alijuaje maana ya ndoto za Farao? Yehova alimsaidia Yosefu.
Kwa miaka saba iliyofuata, Yosefu alihifadhi chakula. Na kama ambavyo Yosefu alikuwa amesema, kukawa na njaa duniani pote. Watu walitoka maeneo mbalimbali kuja kununua chakula kutoka kwa Yosefu. Yakobo, baba ya Yosefu, alisikia kwamba kuna chakula nchini Misri, kwa hiyo akawatuma wana wake kumi waende huko kununua chakula.
Wana wa Yakobo walienda kwa Yosefu, naye akawatambua mara moja. Lakini wao hawakumtambua Yosefu. Wakamwinamia kama alivyokuwa ameota akiwa mdogo. Yosefu alitaka kujua ikiwa kaka zake bado walikuwa na chuki. Kwa hiyo, akawaambia hivi: ‘Ninyi ni wapelelezi. Mnataka kuchunguza udhaifu wa nchi yetu.’ Wakasema, ‘Hapana! Tulizaliwa kaka 12 nchini Kanaani. Ndugu yetu mmoja amekufa, na yule mdogo zaidi yuko na baba yetu.’ Kisha Yosefu akawaambia hivi: ‘Nileteeni ndugu yenu mdogo, nami nitawaamini.’ Kwa hiyo wakarudi nyumbani kwao.
Chakula kilipoisha, Yakobo aliwatuma tena wana wake waende Misri. Pindi hii, walisafiri pamoja na Benjamini, ndugu yao mdogo. Ili kuwajaribu ndugu zake, Yosefu alificha kikombe cha fedha kwenye mfuko wa Benjamini na kusema kwamba walikuwa wamekiiba. Watumishi wa Yosefu walipopata kikombe hicho kwenye mfuko wa Benjamini, ndugu zake walishtuka. Wakamwomba Yosefu awaadhibu wao badala ya Benjamini.
Sasa Yosefu akatambua kwamba ndugu zake walikuwa wamebadilika. Yosefu akashindwa kujizuia. Akabubujikwa na machozi na kusema hivi: ‘Mimi ni ndugu yenu, Yosefu. Je, baba yangu yuko hai?’ Ndugu zake walishangaa sana. Akawaambia hivi: ‘Msihuzunike kwa sababu ya kile mlichonifanyia. Mungu alinituma huku ili niwaokoe. Sasa harakisheni mwende mkamlete baba yangu.’
Wakarudi nyumbani kumwambia baba yao habari hizo njema, na baadaye wakamleta Misri. Sasa Yosefu na baba yake wakakutana tena baada ya miaka mingi.
“Msipowasamehe watu makosa yao, naye Baba yenu hatawasamehe makosa yenu.”—Mathayo 6:15
Huenda Ukapenda Pia
HADITHI ZA BIBLIA ZILIZOCHORWA
Yosefu Aokoa Uhai
Pakua hadithi hii na usome kuhusu Yosefu ambaye Mungu alimtumia kuokoa uhai wa taifa zima.
HADITHI ZA BIBLIA ZILIZOCHORWA
Yosefu Katika Nchi ya Misri
Unaweza kumfurahisha Mungu jinsi gani hata wakati hakuna mtu anayekuona? Soma hadithi hii ya Biblia na ujifunze kutoka kwa mfano wa Yosefu.
KADI ZA WAHUSIKA KATIKA BIBLIA
Kadi ya Biblia ya Yosefu
Pata kujua ni kwa nini Farao alimtawaza Yosefu kuwa mtawala wa pili nchini Misri.
MAZOEZI YA PICHA
Farao Amtukuza Yosefu
Kamilisha zoezi hili la picha na ujue ni kwa nini ilikuwa vigumu kwa ndugu za Yosefu kumtambua.
MAZOEZI YA KUJIFUNZA YA WATOTO
Wahusika Katika Biblia Walio Kama Yosefu
Pakua na uchapishe zoezi hili, na orodhesha mambo yanayofanana kati ya Yosefu na wahusika wengine watano katika Biblia.
MAZOEZI YA KUJIFUNZA YA WATOTO
Zoezi: Ni Nani Aliyesema Maneno Hayo?( Mwanzo 41-50)
Pakua zoezi hili na uone ikiwa unaweza kupatanisha majina ya watu na maneno waliyosema.
