SURA YA 18

Nitapata Pesa Wapi?

“Nataka pesa za kununua gari.”—Sergio.

“Napenda kununua vitu.”—Laurie-Ann.

“Kuna vitu fulani vizuri sana, nami ningependa sana kuwa navyo; lakini wazazi wangu hawana pesa.”—Mike.

HUENDA wewe pia una sababu zako za kutaka pesa. Au labda ungependa kuchuma pesa ili utegemeze familia yenu. Hata ikiwa huchangii moja kwa moja gharama fulani za nyumbani, kujinunulia nguo zako mwenyewe na vitu vingine unavyohitaji kunaweza kuwapunguzia wazazi wako mzigo wa kifedha.

Vyovyote vile, unahitaji pesa ili kununua vitu vyako mwenyewe au kwa ajili ya familia yenu. Ijapokuwa Yesu aliahidi  kwamba Mungu atawaandalia wale ‘wanaotafuta kwanza Ufalme wa Mungu,’ Mkristo hapaswi kuketi kitako tu. (Mathayo 6:33; Matendo 18:1-3; 2 Wathesalonike 3:10) Hivyo basi, utapata pesa wapi? Na ni nini kinachoweza kukusaidia kuwa na maoni yanayofaa kuhusu pesa?

Kutafuta Kazi

Ikiwa kwa kweli unahitaji kitu fulani, na wazazi wako hawana pesa, unaweza kutafuta kazi itakayokuwezesha kuchuma pesa za kukinunua. Zungumza na wazazi wako kuhusu hilo. Huenda wakapendezwa na wazo lako. Wakikubali, nawe una umri wa kutosha kufanya kazi, mapendekezo manne yanayofuata yanaweza kukusaidia unapotafuta kazi:

Sambaza habari. Waambie majirani, walimu, na watu wa ukoo kwamba unatafuta kazi. Ikiwa unaona haya kuwauliza moja kwa moja, unaweza kuwauliza ni kazi gani walizofanya walipokuwa na umri kama wako. Kadiri watu wengi zaidi wanavyojua kwamba unatafuta kazi, ndivyo utakavyopata maelekezo na madokezo mengi.

Jaribu kila kitu. Jibu matangazo ya biashara kwenye magazeti au Intaneti na kazi zinazotangazwa kwenye ubao wa matangazo madukani, shuleni, na sehemu nyingine za watu wote. “Hivyo ndivyo nilivyopata kazi,” anasema kijana anayeitwa Dave. “Nilisoma gazeti, nikatuma tawasifu, na kupiga simu.” Usipofaulu, labda  unaweza kumsadikisha mwajiri kwamba anahitaji huduma fulani unazoweza kutoa.

Tayarisha na usambaze nakala za tawasifu yako. Andika kwenye karatasi jinsi unavyoweza kupatikana na kuorodhesha ujuzi na uzoefu wa kazi ulio nao. Huenda ukadhani kwamba huna chochote cha kuandika. Umekosea. Je, umewahi kumtunza mdogo wako wakati ambapo wazazi wako hawakuwako, au kumtunzia mtu mwingine watoto? Hilo linaonyesha kwamba unategemeka. Umewahi kumsaidia baba yako kurekebisha gari? Huenda hilo likaonyesha kwamba una akili ya kurekebisha vitu. Je, unajua kupiga chapa au kutumia kompyuta? Au je, ulipata alama za juu shuleni katika mradi fulani? Hayo ni mambo mazuri yanayoweza kuwavutia waajiri fulani. Yaorodheshe katika tawasifu yako. Wape waajiri mbalimbali tawasifu yako na kuwaomba marafiki na watu wa ukoo wampe mtu yeyote anayetafuta wafanyakazi.

Jiajiri. Fikiria mahali unapokaa. Je, kuna uhitaji wa huduma au bidhaa fulani? Kwa mfano, unaweza kufanya kazi ya kufyeka, kulima, kuchunga mifugo, kuteka maji, na kadhalika. Au labda unajua kupiga chombo fulani cha muziki. Je, unaweza kuwafundisha wengine? Au huenda kuna kazi ambayo wengi hawapendi kuifanya kama vile kuosha madirisha au kazi nyingine ya usafi. Mkristo haoni aibu kufanya kazi za mikono. (Waefeso 4:28) Bila shaka, ili ujiajiri unahitaji kuwa mwenye bidii, nidhamu, na tayari kuchukua hatua.

Tahadhari: usikimbilie kazi fulani kabla ya kuhesabu gharama na kufikiria mambo yote yanayohusika. (Luka 14:28-30) Kwanza, zungumza na wazazi wako. Pia zungumza na wengine ambao wamefanya  kazi hiyo. Je, utahitajika kulipa kodi? Je, utahitaji leseni au kibali fulani? Unaweza kupata habari katika ofisi za serikali.—Waroma 13:1.

Uwe na Usawaziko

Umewahi kujaribu kuendesha baiskeli ukiwa umebeba vitu kadhaa kama vile mfuko wa shule, mpira, na labda mifuko mingine iliyo na vyakula? Vitu vinapokuwa vingi, inakuwa vigumu zaidi kudumisha usawaziko! Ndivyo inavyoweza kuwa pia na kazi inayodai mengi. Ukitumia akili, muda, na wakati mwingi sana katika kazi hiyo, huenda afya yako na masomo yako yakaathiriwa. Mbali na hayo, kazi ngumu inayochukua muda mwingi inaweza kufanya iwe vigumu kwako kuhudhuria mikutano, kujifunza Biblia, na kushiriki katika huduma ya Kikristo. Kijana anayeitwa Michèle anasema: “Kuna nyakati ambazo nimekosa mikutano kutokana na uchovu wa kufanya kazi baada ya shule.”

Usipoteze usawaziko kwa kuwa na maoni yasiyofaa kuhusu pesa.  Yesu alisema kwamba wenye furaha ya kweli ni wale “wanaotambua uhitaji wao wa kiroho.” (Mathayo 5:3) Pia alisema: “Hata wakati mtu ana vitu vingi uzima wake hautokani na vitu alivyo navyo.” (Luka 12:15) Kijana Mkristo anayeitwa Maureen, anatii shauri hilo. Anasema: “Sitaki kunaswa na miradi ya kufuatia vitu vya kimwili. Ninajua hali yangu ya kiroho itaathirika nikinaswa na mtego wa kutafuta pesa tu.”

Ni kweli kwamba katika sehemu fulani za ulimwengu, vijana wanalazimika kufanya kazi kwa saa nyingi ili kusaidia familia zao. Hata hivyo, ikiwa hali yako ni tofauti, mbona upoteze usawaziko wako? Kulingana na wataalamu wengi, kufanya kazi kwa zaidi ya saa 20 kwa juma huku ukiendelea na masomo kunaweza kusababisha madhara. Wataalamu wengine wanapendekeza wanafunzi wasifanye kazi kwa zaidi ya saa nane hadi kumi kwa juma. Mfalme Sulemani mwenye hekima alisema: “Konzi moja ya pumziko ni afadhali kuliko konzi mbili za kazi ngumu na kufuatilia upepo.”—Mhubiri 4:6.

Kumbuka, “nguvu za udanganyifu za utajiri,” zinaweza kusonga upendezi wako wa mambo ya kiroho. (Marko 4:19)  Kwa hiyo, ukiamua kufanya kazi baada ya shule ili upate pesa, panga ratiba yako ili utangulize mambo ya kiroho. Mwombe Yehova akusaidie. Anaweza kukupa nguvu za kukabili hali hiyo na kukusaidia kuendelea kuwa na usawaziko wa kiroho.

PATA HABARI ZAIDI KATIKA BUKU LA 1, SURA YA 21

KATIKA SURA INAYOFUATA

Unajua kutumia pesa vizuri au zinakutawala? Pata kujua jinsi unavyoweza kuepuka kuwa mtumwa wa pesa.

MAANDIKO MUHIMU

“Hata mtu mvivu atake kitu namna gani, hatakipata kamwe. Mwenye bidii atapata kila kitu anachotaka.”—Methali 13:4, Today’s English Version.

PENDEKEZO

Tuma vyeti vyako kwa kampuni mbalimbali badala ya kungoja watangaze nafasi za kazi zilizopo.

JE, WAJUA . . .?

Katika sehemu fulani, karibu asilimia 85 ya nafasi za kazi hazitangazwi.

HATUA ZA KUCHUKUA!

Nitaongeza uwezekano wangu wa kupata kazi kwa ․․․․․

Nitafanya kazi kwa saa ․․․․․ tu kila juma.

Mambo ambayo ningependa kuuliza mzazi (wazazi) wangu kuhusu habari hii ni ․․․․․

UNA MAONI GANI?

● Kwa nini unahitaji kuchuma pesa?

● Ni magumu gani utakayokabili ukipata kazi?

● Ni nini kinachoweza kukusaidia kuwa na maoni yenye usawaziko kuhusu pesa?

[Blabu katika ukurasa wa 153]

Ikiwa sikuzote furaha yako inategemea kuwa na vitu, basi hutawai kupata furaha. Kila wakati kutakuwa na kitu kipya utakachohitaji. Unahitaji kujifunza kupata furaha kutokana na vitu ulivyo navyo.’’—Jonathan

[Sanduku katika ukurasa wa 155]

Heshimu Pesa—Usizipende

Kwa mpishi, kisu chenye makali ni kifaa muhimu. Lakini kisu hichohicho mikononi mwa mtu asiye na ujuzi au asiye makini kinaweza kutokeza madhara makubwa. Pesa ni kama kisu chenye makali. Ukijua jinsi ya kuzitumia, zitakuwa na faida kwako. Lakini usipokuwa mwangalifu, unaweza kuumia! Kwa mfano, mtume Paulo aliwaonya Wakristo wasipende pesa. Watu fulani wameazimia kuwa matajiri, na katika harakati hizo wamepoteza marafiki, wamevunja mahusiano ya kifamilia, na kuharibu uhusiano wao na Mungu. Kwa sababu hiyo, “wamejichoma wenyewe kila mahali kwa maumivu mengi.” (1 Timotheo 6:9, 10) Hilo linatufundisha nini? Jifunze kutumia pesa inavyofaa. Ziheshimu, lakini usizipende!

[Picha katika ukurasa wa 153]

Kujaribu kufanya mambo mengi wakati mmoja kunaweza kukufanya upoteze usawaziko