DIBAJI

Ninaweza Kupata Wapi  Mashauri Bora?

Wasichana

Unashindwa kujizuia kumfikiria yule mwanafunzi mpya katika darasa lenu mwenye sura ya kuvutia kwelikweli. ‘Hata hanijui’ wasema moyoni, ‘basi, kuna ubaya gani kumwazia?’ Isitoshe, si wewe tu. Wasichana wengine wote wanammezea mate. Unajua hilo kwa kuwa unawasikia wakizungumza juu yake kila wakati. Ghafula anakutazama.

Bila kutazamia, anakupa tabasamu ya mwaka. Wewe pia unatabasamu. Anaanza kuja mahali ulipo.

“Vipi?” asema kwa haya.

“Safi,” wamjibu.

“Naitwa Brett.”

 “Wewe ni mgeni hapa,” wauliza.

“Tumehamia hapa majuma machache yaliyopita.”

Kufikia sasa huamini kwamba Brett mwenyewe anazungumza na wewe!

“S’kiza,” Brett aendelea kusema, “kutakuwa na sherehe kwetu leo baada ya shule. Ungependa kuja?”

Kisha ainama na kukukonyezea jicho.

“Wajua,” asema, “wazazi wangu hawatakuwako, tena kutakuwa na vinywaji. Wasemaje?”

Brett anasubiri umjibu. Msichana mwingine yeyote angekubali mara moja!

Utamjibuje?

Wavulana

Wanafunzi wawili wanakuja mahali ulipo. Unaingiwa na wasiwasi mwingi kwa sababu tayari juma hili wamejaribu mara mbili kukufanya uvute sigara. Hii ni mara ya tatu.

Mvulana wa kwanza anasema: “Ala! Uko peke yako tena? Basi acha nikupe rafiki.” Anakazia neno “rafiki” kwa kukukonyezea jicho huku akichomoa kitu mfukoni mwake na kukunyooshea mkono ukichukue.

Unaona kitu kinachofanana na sigara katikati ya vidole vya mvulana huyo. Unajua ni nini anachokupa, nao wasiwasi wako unaongezeka.

“Samahani,” unamwambia. “Nimewaambia mara nyingi kwamba mimi si .  .  .”

Mvulana wa pili anakukatiza na kusema: “Ni ile dini yenu, sivyo? Huwezi kufurahia chochote!”

“Kwani wewe ni mwoga kama kuku?” mvulana wa kwanza asema.

“Mimi si kuku!” wajipa ujasiri wa kusema.

Kisha yule mvulana wa pili akuzungushia mkono mabegani. “Chukua tu,” ajaribu kukushawishi.

Yule mvulana wa kwanza aleta kile kitu cheupe karibu na macho yako na kusema kwa sauti ya chini: “Hatutamwambia yeyote. Hakuna atakayejua.”

Utafanya nini?

 HALI kama hizo hutokea kila siku karibu kila mahali ulimwenguni. Hata hivyo, ukweli ni kwamba vijana fulani wako tayari zaidi kukabiliana na hali hizo kuliko wengine. Kwa sababu ya mkazo, huenda mvulana anayeshawishiwa kuvuta sigara akawaza: ‘Sitaki kulegeza msimamo wangu, hata hivyo, sina nguvu za kuendelea kustahimili. Mbona nisiwaonyeshe wanafunzi wenzangu kwamba mimi pia ni mtu kama wengine?’ Au msichana ambaye mvulana fulani amemwomba waende matembezi anaweza kuanza kufikiri: ‘Si mvulana mbaya. Mbona nisiseme ndiyo mara hii moja—mara moja tu?’

Kwa upande mwingine, vijana wengi wamezoezwa kusimama imara na kutetea imani yao. Ajabu ni kwamba—amini usiamini—mkazo wanaohisi wa kufanya jambo lisilofaa ni mdogo. Ungependa kuwa kama vijana hao? Jambo lenye kutia moyo ni kwamba unaweza kuwa hivyo! Jinsi gani?

Biblia inaweza kukusaidia kukabili maisha ya ujana ukiwa na uhakika. Ina mashauri bora zaidi kwa sababu ni Neno la Mungu lililoongozwa na roho yake. (2 Timotheo 3:16, 17) Biblia inaweza kukusaidia katika nyanja gani? Tazama orodha inayofuata, na utie alama ya ✔ kando ya habari zinazokupendeza wewe binafsi.

□ Kushughulika na watu wa jinsia tofauti

□ Kuelewa mabadiliko ya mwili wangu

□ Kupata marafiki

□ Kushughulika na mkazo shuleni

□ Matumizi ya pesa

□ Kushughulika na wazazi wangu

□ Kutotawaliwa na hisia zangu

□ Kuchagua burudani zinazofaa

□ Kuboresha hali yangu ya kiroho

Ukitazama ukurasa wa 4 na wa 5, utaona kwamba habari zinazotajwa hapa juu zinalingana na sehemu tisa za  kitabu hiki. Ni zipi ulizotia alama? Unaweza kuanza kwa kusoma sehemu hizo kwanza. Kanuni za Biblia zinaweza kukusaidia katika kila mojawapo ya mambo hayo. Kitabu unachosoma sasa kitakuonyesha jinsi ya kufanya hivyo. *

Pia, kitabu hiki kitakupa nafasi za kueleza maoni yako. Kwa mfano, karibu na mwisho wa kila sura, utaona sanduku lenye kichwa “Hatua za Kuchukua!” Katika sanduku hilo utahitajika kuandika maoni yako kuhusu jinsi unavyoweza kutumia habari ambayo umesoma. Sehemu—kama vile “Kukabiliana na Mkazo” katika ukurasa wa 132 na 133—zitakusaidia kufikiria magumu unayokabili na kutafuta utatuzi unaofaa. Isitoshe, kila sehemu kuu ya kitabu hiki inamalizia kwa ukurasa wenye kichwa “Daftari,” ambapo unaweza kuandika kuhusu jambo fulani linalokuhusu kutokana na habari ambayo umesoma. Pia, kitabu hiki kina makala tisa zenye kichwa “Mfano wa Kuigwa.” Makala hizo zinazungumzia watu fulani wa nyakati za Biblia ambao ni mifano inayostahili kuigwa.

Biblia inakuhimiza hivi: “Jipatie hekima, jipatie uelewaji.” (Methali 4:5) Maneno “hekima” na “uelewaji” hayamaanishi tu kujua kwamba jambo fulani ni jema au baya. Mengi zaidi yanahusika. Kwa mfano, kujua matokeo mabaya ya kufanya jambo fulani na pia faida za kufanya jambo fulani zuri kutakusaidia kushinda mkazo kutoka kwa vijana wenzako kwa uhakika na ujasiri.

Usisahau hili kamwe: Matatizo yako—hata yaonekane kuwa makubwa kadiri gani—si mapya. Wengine wameyakabili matatizo kama yako kwa mafanikio. Wewe pia unaweza! Kitumie vizuri kitabu Maswali Ambayo Vijana Huuliza—Majibu Yafanyayo Kazi, Buku la 2. Kitakusadikisha kwamba Biblia ndicho kitabu chenye mashauri bora zaidi!

[Maelezo ya Chini]