SURA YA 24

Je, Ngono Itafanya Urafiki Wetu Uwe Mzuri Zaidi?

Heather amekuwa na urafiki na Mike kwa miezi miwili tu, lakini anahisi ni kama amemfahamu maisha yake yote. Wao huandikiana ujumbe mfupi nyakati zote, huzungumza kwa saa nyingi kwenye simu, na hata mmoja wao akianza sentensi mwenzake anaweza kuimalizia! Lakini sasa, wakiwa wameketi katika gari lililoegeshwa, kukiwa na mbalamwezi, Mike anataka mengi zaidi ya mazungumzo tu.

Katika kipindi cha miezi miwili ambayo imepita, Mike na Heather hawajafanya lolote ila kushikana mikono na kubusiana tu. Heather hataki kupita hapo. Lakini pia hataki kumpoteza Mike. Mike tu ndiye anayemfanya ajihisi kuwa mrembo sana na wa pekee sana. ‘Isitoshe,’ anawaza, ‘tunapendana . . .’

 UNAWEZA kukisia kule mambo yanakoelekea. Hata hivyo, huenda usitambue jinsi kufanya ngono kunaweza kubadili kabisa urafiki kati ya Mike na Heather. Fikiria yafuatayo:

Ukipuuza sheria za asili, kama vile sheria ya uvutano, utapatwa na madhara. Ndivyo ilivyo pia ukipuuza sheria za maadili, kama ile inayosema: “Mjiepushe na uasherati.” (1 Wathesalonike 4:3) Kutotii amri hiyo kuna madhara gani? Biblia inasema: “Aliye na mazoea ya kufanya uasherati anautendea dhambi mwili wake mwenyewe.”  (1 Wakorintho 6:18) Kwa njia gani? Jaribu kuorodhesha madhara matatu yanayoweza kuwapata wale wanaofanya ngono kabla ya ndoa.

1 ․․․․․

2 ․․․․․

3 ․․․․․

Sasa tazama mambo uliyoandika. Ulitia ndani mambo kama vile ugonjwa wa zinaa, mimba haramu, au kupoteza kibali cha Mungu? Bila shaka, hayo ni matokeo mabaya yanayoweza kumpata mtu yeyote anayepuuza sheria ya Mungu ya maadili kuhusu uasherati.

Hata hivyo, huenda bado ukashawishika. Huenda ukasema, ‘Sitapata madhara yoyote.’ Kwani, si kila mtu anafanya ngono? Vijana wenzako shuleni wanajigamba kuhusu mambo ambayo wamefanya, na hawaonekani wakiwa na madhara yoyote. Huenda, kama Heather aliyetajwa mwanzoni, unahisi kwamba ngono itafanya urafiki wenu uwe mzuri zaidi. Tena, ni nani angependa kuchekwa kwa sababu angali bikira? Si afadhali tu kukubali kufanya ngono?

Tua kidogo, usiwe na haraka hivyo! Kwanza kabisa, si kila mtu anayefanya ngono. Ni kweli, huenda ukasoma takwimu zinazoonyesha kwamba hesabu kubwa ya vijana wanafanya ngono. Kwa mfano, uchunguzi uliofanywa nchini Marekani ulionyesha kwamba, kufikia wakati wanapomaliza shule, vijana 2 kati ya 3 nchini humo huwa wamefanya ngono. Lakini kumbuka, hilo linamaanisha kwamba 1 kati ya 3 hawajafanya, na hiyo ni hesabu kubwa. Lakini, namna gani wale wanaofanya? Wachunguzi wamegundua kwamba vijana wengi kati ya hao hupata angalau moja kati ya mambo yafuatayo yenye kushangaza.

 MSHANGAO WA 1 DHIKI. Vijana wengi ambao wamefanya ngono kabla ya ndoa wanasema kwamba walijuta baadaye.

MSHANGAO WA 2 KUTOAMINIANA. Baada ya kufanya ngono kila mmoja huanza kujiuliza, ‘Amefanya ngono na nani mwingine?’

MSHANGAO WA 3 KUCHANGANYIKIWA KIMAWAZO. Tamaa ya moyoni ya wasichana wengi ni kuwa na mtu atakayewalinda, si kuwatumia. Nao wavulana wengi hawavutiwi tena na msichana baada ya kufanya ngono naye.

Pamoja na hayo, wavulana wengi husema kwamba hawawezi kumwoa msichana ambaye wamefanya ngono naye. Kwa nini? Kwa sababu wangependa mtu aliye safi!

Ikiwa wewe ni msichana, je hilo linakushangaza, labda hata kukukasirisha? Basi kumbuka jambo hili: Katika maisha halisi, kufanya ngono kabla ya ndoa ni tofauti kabisa na jinsi inavyoonyeshwa kwenye sinema na televisheni. Vyombo vya habari hutukuza ngono kati ya vijana na kuifanya ionekane kuwa burudani isiyodhuru au hata njia ya kuonyeshana upendo wa kweli. Lakini, usidanganyike! Wale wanaojaribu kukuchochea ufanye ngono kabla ya ndoa wanatafuta faida zao wenyewe tu. (1 Wakorintho 13:4, 5) Je, kweli mtu anayekupenda kikweli anaweza kuhatarisha hali yako ya kimwili na ya kihisia? (Methali 5:3, 4) Na je, mtu anayekujali kikweli anaweza kukushawishi uhatarishe uhusiano wako pamoja na Mungu?—Waebrania 13:4.

 Ikiwa wewe ni kijana, na una urafiki pamoja na kijana mwenzako ambaye unafikiria kufunga ndoa pamoja naye siku moja, mambo ambayo yamezungumziwa katika sura hii yanapaswa kukusaidia ufikirie kwa uzito uhusiano huo. Jiulize, ‘Je, kweli ninamjali mwenzangu?’ Ikiwa jibu lako ni ndiyo, unaweza kuthibitisha jambo hilo kwa njia gani? Kwa kuwa na nguvu za kushikamana na sheria za Mungu, hekima ya kuepuka hali zenye kushawishi, na upendo utakaokusaidia kuhangaikia faida zake. Ikiwa una sifa kama hizo, basi yaelekea mwenzako atahisi kama alivyohisi msichana Mshulami mwenye maadili mazuri aliyesema: “Mpenzi wangu ni wangu nami ni wake.” (Wimbo wa Sulemani 2:16) Kwa ufupi, utakuwa mwandani wake!

 Iwe wewe ni mvulana au msichana, ukijihusisha katika ngono kabla ya ndoa, utajishushia heshima kwa kupoteza kitu chenye thamani sana. (Waroma 1:24) Haishangazi kwamba baadaye wengi hujiona kuwa hawafai, kana kwamba wameruhusu sehemu yenye thamani ya mwili wao iibiwe! Usiruhusu hilo likupate kamwe. Mtu akijaribu kukushurutisha ufanye ngono kwa kukuambia, “Ikiwa unanipenda, mbona ukatae,” mjibu hivi kwa uthabiti, “Ikiwa kwa kweli unanipenda, huwezi kuniomba nifanye hivyo!”

Mwili wako ni wenye thamani sana, hupaswi kuutumia ovyoovyo. Onyesha kwamba una msimamo thabiti wa kutii amri ya Mungu ya kujiepusha na uasherati. Kisha, ikiwa utafunga ndoa siku moja, unaweza kufanya ngono. Nawe utaifurahia kabisa, bila wasiwasi, majuto, wala mahangaiko ambayo mara nyingi watu hupata wanapojihusisha katika ngono kabla ya ndoa.—Methali 7:22, 23; 1 Wakorintho 7:3.

PATA HABARI ZAIDI KATIKA BUKU LA 2, SURA YA 4 NA YA 5

KATIKA SURA INAYOFUATA

Zoea la kupiga punyeto ni zito kadiri gani?

ANDIKO MUHIMU

“Ukimbieni uasherati. . . . Yeye aliye na mazoea ya kufanya uasherati anautendea dhambi mwili wake mwenyewe.”—1 Wakorintho 6:18.

PENDEKEZO

Inapohusu mwenendo wako pamoja na watu wa jinsia tofauti, sheria nzuri ya kufuata ni hii: Ikiwa ni jambo ambalo hungependa wazazi wako waone ukifanya, basi hupaswi kulifanya.

JE, WAJUA . . . ?

Baada ya kufanya ngono, kuna uwezekano mkubwa kwamba mvulana atamwacha msichana ambaye amefanya ngono naye na kutafuta mwingine.

HATUA ZA KUCHUKUA!

Ninapokuwa na mtu wa jinsia tofauti, ninahitaji kuepuka hali hizi ․․․․․

Mtu wa jinsia tofauti akitaka tukutane katika mahali pa faragha, nitamwambia ․․․․․

Mambo ambayo ningependa kuuliza mzazi (wazazi) wangu kuhusu habari hii ni ․․․․․

UNA MAONI GANI?

● Ijapokuwa huenda kufanya ngono kabla ya ndoa kukavutia mwili usio mkamilifu, kwa nini ni kosa?

● Utafanya nini mtu fulani akikuomba mfanye ngono?

[Blabu katika ukurasa wa 176]

“kiwa Mkristo, una sifa zinazowavutia wengine. Kwa hiyo, unapaswa kuwa macho na kukataa unapoombwa ujihusishe katika ukosefu wa maadili. Thamini sifa hizo. Usitende kipumbavu!”—Joshua

[Picha katika ukurasa wa 176, 177]

Kufanya ngono kabla ya ndoa ni sawa na kuchukua mchoro mzuri na kuutumia kama mkeka wa mlangoni