Wakati wa marufuku, makutaniko mengi yaliendelea kufanya mikutano katika nyumba za watu. Hata hivyo, makutaniko mengi hayakuimba nyimbo za Ufalme ili yasitambuliwe. Katika maeneo mengine wenye mamlaka walivamia ibada. Lakini, akina ndugu waliendelea kuwa watulivu.

Mara nyingi, ndugu walitumia sherehe za familia au harusi kufanya makusanyiko. Tagor Hutasoit anasimulia: “Wanaotaka kufunga ndoa wangejiandikisha, kisha waombe kibali cha polisi ili kufanya karamu kubwa ya harusi. Katika karamu hiyo, wenzi hao wangeketi jukwaani huku akina ndugu wakitoa hotuba mbalimbali za Biblia.”

Katika kusanyiko fulani, polisi alimwita Tagor faraghani.

Alimuuliza hivi: “Mara nyingi harusi hufanywa kwa saa mbili au tatu. Kwa nini harusi zenu huanzia asubuhi mpaka jioni?”

Tagor akamjibu: “Baadhi ya wenzi wana matatizo mengi, hivyo wanahitaji mashauri mengi ya Neno la Mungu.”

 Huku akitikisa kichwa, polisi akasema: “Kweli kabisa.”

Ndugu waliunganisha harusi kadhaa ili wafanye sehemu ya programu ya Kusanyiko la Wilaya la mwaka 1983, “Umoja wa Ufalme” katika uwanja wa michezo wa Jakarta. Watu 4,000 hivi, miongoni mwao wakiwa wapendezwa walihudhuria kusanyiko hilo, na 125 walibatizwa mahali palipojificha kabla ya programu. Baadaye, marufuku ilipopungua, makusanyiko  makubwa yalifanywa, kutia ndani moja ambalo lilikuwa na wahudhuriaji zaidi ya 15,000.

Kati ya miaka ya 1980 na 1990, ofisi ya tawi iliiomba tena na tena serikali iwaondolee marufuku Mashahidi wa Yehova. Pia, ndugu katika nchi mbalimbali waliiandikia serikali ya Indonesia na mabalozi wake ili kujua sababu iliyofanya Mashahidi wa Yehova wapigwe marufuku. Maofisa wengi walikubali kuondoa marufuku, hata hivyo mara nyingi jitihada zao zilipingwa na Mkurugenzi Mkuu wa Dini za Kikristo.

Mwaka wa 1990, ndugu waliamua kujenga ofisi ya tawi katika eneo lililojificha. Mwaka huohuo, Baraza Linaloongoza liliidhinisha ununuzi wa kiwanja kilicho karibu na Bogor, mji mdogo ulio kilomita 40 kusini mwa Jakarta. Hata hivyo, watu wachache walikuwa na ujuzi wa kujenga. Ni nani ambao wangejenga majengo hayo mapya?

Ndugu kutoka nchi mbalimbali walisaidia kazi hiyo. Ofisi ya Ujenzi ya Brooklyn na Ofisi ya Uhandisi ya Kimkoa nchini Australia ziliandaa ramani ya ujenzi. Wajitoleaji 100 hivi wa kimataifa walitoa msaada wa kiufundi katika mradi huo uliochukua miaka miwili.

Hosea Mansur, ndugu Mwindonesia aliyewasiliana na maofisa wa mji huo anakumbuka hivi: “Maofisa wa Kiislamu walipoona herufi za kwanza za majina yangu, yaani, H. M. kwenye kofia yangu, walifikiri kwamba herufi H inamaanisha ‘Hājjī’, jina la cheo analopewa hujaji anayekwenda Maka. Hivyo, waliniheshimu sana. Jambo hilo lilinisaidia kupanga kazi kwa urahisi.”

 Ofisi mpya ya tawi iliwekwa wakfu Julai 19, 1996. Hotuba ya kuweka wakfu ilitolewa na John Barr, mshiriki wa Baraza Linaloongoza. Watu 285 kutia ndani wawakilishi wa ofisi za tawi na wamishonari wa zamani 118 kutoka nchi mbalimbali, na Wanabetheli 59 wa Betheli ya Indonesia walihudhuria tukio hilo. Siku mbili zilizofuata programu ya wakfu, wajumbe 8,793 walihudhuria Kusanyiko la Wilaya huko Jakarta lenye kichwa “Wajumbe wa Amani ya Kimungu.”

Mwaka wa 1998, Rais Soeharto (Suharto) wa Indonesia aliyetawala kwa muda mrefu alijiuzulu, na serikali  mpya ikaingia madarakani. Wakati huohuo, ndugu waliongeza juhudi za kuomba marufuku iondolewe.

Alipokuwa jijini New York mwaka wa 2001, Waziri wa Mambo ya Nje wa Indonesia Bwana Djohan Effendi alitembelea Betheli ya Brooklyn na kukutana na washiriki watatu wa Baraza Linaloongoza. Alifurahishwa na mambo aliyoona, na akakubali kwamba Mashahidi wa Yehova wana sifa nzuri duniani pote. Bwana Effendi alikubali kufutilia mbali marufuku, lakini akasema kwamba uamuzi wa mwisho utategemea mwanasheria mkuu wa Indonesia, Bwana Marzuki Darusman.

Mwanasheria mkuu pia alikubali kuondoa marufuku, lakini maofisa wengine wenye chuki katika idara yake walisita kuchukua hatua wakidhani kwamba cheo chake kingechukuliwa na mtu mwingine. Mwishowe, Juni 1, 2001, Tagor Hutasoit aliitwa katika ofisi ya mwanasheria mkuu. Tagor anakumbuka hivi: “Nilipewa barua ya kuwapiga marufuku Mashahidi wa Yehova katika ofisi hiyo miaka 25 iliyopita. Hata hivyo, siku ya mwisho ya Marzuki Darusman kuwa mwanasheria mkuu, alinipa barua ya kuondoa marufuku.”

Machi 22, 2002, shirika la Mashahidi wa Yehova nchini Indonesia liliandikishwa rasmi na Idara ya Mambo ya Kidini. Mkurugenzi mkuu wa idara hiyo aliwaambia wawakilishi wa ofisi ya tawi hivi: “Barua hii ya kuwaandikisha haiwapatii uhuru wa ibada. Uhuru unatoka kwa Mungu. Barua hii inathibitisha kwamba dini yenu inatambuliwa rasmi na serikali. Sasa mna haki sawa na dini nyingine, na serikali iko tayari kuwasaidia.”