Kwa zaidi ya miaka 130, Mashahidi wa Yehova wa siku za kisasa wamekutana kwa ajili ya makusanyiko ya eneo kila mwaka. Siku hizi programu hizo zinatia ndani zaidi ya hotuba 40 pamoja na muziki, mahojiano, na video. Ili programu hizo ziwanufaishe na kuwachochea wanaohudhuria, wote wanapaswa ‘kusikia na kuona’ kila kitu waziwazi. (Luka 2:20) Michango yako inatumiwaje kuhakikisha kwamba wote wanaweza kunufaika kutokana na makusanyiko hayo, popote pale wanapoishi?

 Siku hizi, viwanja vya michezo na kumbi nyingi katika nchi zilizoendelea hujengwa zikiwa na mifumo ya sauti na video. Kwa hiyo, kwa nini mara nyingi tunaweka vifaa vyetu wenyewe tunapokodi maeneo hayo kwa ajili ya kusanyiko la eneo? David, anayefanya kazi katika Idara ya Utangazaji ya Makao Makuu anaeleza hivi: “Ni majengo machache sana tunayokodi ambayo yamekusudiwa kukidhi mahitaji ya wahudhuriaji wanaosikiliza kwa makini programu ya mazungumzo ya zaidi ya saa sita. Kwa mfano, majengo ya michezo, huwa na mfumo wa sauti uliokusudiwa kutoa matangazo mafupi na kucheza muziki mfupi. Skrini za video zimekusudiwa kuonyesha mabao yanapofungwa, matangazo ya kibiashara, na marudio mafupi ya mchezo. Tofauti na hilo, tungependa wahudhuriaji wetu watazame video ndefu zaidi na waweze kusikia na kuelewa waziwazi kila neno linalotoka jukwaani.”

 Kila eneo la kusanyiko ni tofauti, kwa hiyo, mifumo ya sauti na video inapaswa kufaa eneo hususa. Mara tu eneo linapoteuliwa, Idara za Utangazaji katika ofisi zetu za tawi huamua mahali ambapo wahudhuriaji wataketi. Uamuzi wao unategemea idadi ya watu wanaotarajiwa kuhudhuria na idadi ya watu wanaoweza kuenea katika jengo hususa. Kisha ndugu hao huhesabu ni spika na skrini ngapi zinazohitaji kuwekwa, wanachora ramani ya jinsi zitakavyounganishwa, na kuorodhesha vifaa vyote vitakavyohitajika ili kila mtu aweze kuona na kusikiliza programu vizuri.

 Makusanyiko ya eneo ambako programu itatolewa katika lugha kadhaa huhitaji mifumo tata zaidi ya sauti na video. Ikiwa kutakuwa na wakalimani, lazima kwanza kuwe na mfumo wa kuwapitishia sauti na video. Kisha sauti ya wakalimani inapaswa kupitishwa kwenye mfumo mwingine tofauti kwa ajili ya wote wanaosikiliza lugha yao. Mifumo hiyo ya pekee hufanya iwezekane kwa video kuchezwa wakati uleule kwa ajili ya wahudhuriaji wote, kisha sauti iwasilishwe katika lugha nane tofauti wakati uleule. David anasema: “Mifumo hiyo ni tata sana na wajitoleaji wanaoishughulikia wanahitaji kuzoezwa vizuri kabisa.”

 Ofisi nyingi za tawi zina vifaa vinavyotumiwa kila mwaka. Inapokuwa hivyo, akina ndugu hupanga jinsi vifaa hivyo vitakavyosafirishwa kutoka kusanyiko moja hadi lingine. Ofisi ya tawi ya Marekani hutumia dola 200,000 a kila mwaka kusafirisha vifaa ya kusanyiko la eneo tu. Hata hivyo, kufanya hivyo ni gharama ndogo sana kwa kulinganisha na gharama ya kununua na kudumisha vifaa vya ziada. Steven, ambaye amesaidia kusimamia idara ya sauti na video katika kusanyiko la eneo nchini Kanada anasema hivi: “Kikundi chetu cha wajitoleaji kilifanya yote kilichoweza kuhakikisha kwamba kila nati, bolti, waya, na vitu vingine vyote vimehesabiwa, vimetunzwa, na kupakiwa vizuri, na pia wakahakikisha kwamba kila kitu kipo tayari kusafirishwa kwa ajili ya kusanyiko linalofuata.”

 Kukodi vifaa vya sauti na video ni gharama kubwa sana, na mara nyingi vifaa hivyo huwa vyenye ubora wa hali ya chini au havidumishwi vizuri. Kwa sababu hiyo, mara nyingi tunanunua vifaa tunavyohitaji. Kwa sasa bei ya skrini ya LED iliyo na ukubwa wa mita tano kwa mita tatu ni dola 24,000 hivi, na waya mmoja wa maikrofoni wenye urefu wa mita 15 ni dola 20 hivi. Hivyo, Idara ya Utangazaji hushirikiana na Idara ya Ununuzi ili “kuhesabu gharama” kabla ya kununua vifaa vyovyote. (Luka 14:28) Kwa mfano, wao hujiuliza, ni watu wangapi watakaonufaika kutokana na vifaa hivyo? Je, kununua vifaa vipya ndiyo njia bora ya kushughulikia uhitaji uliopo? Je, kuna nafasi ya kutosha kuhifadhi vifaa hivyo, na je, tuna vifaa na wajitoleaji waliozoezwa ili kuvidumisha?

 Ili kuhakikisha vifaa vya sauti na video vinafanya kazi kwa muda mrefu na hivyo kuokoa michango, tunavifanyia ukarabati kwa ukawaida. Pia tunasafirisha vifaa hivyo katika makasha yenye uwezo mkubwa wa kuhimili mtikisiko ili kupunguza uharibifu, na makasha hayo hurekebishwa kadiri inavyohitajika.

 Watu ambao si Mashahidi wamevutiwa sana na ubora wa sauti na video katika makusanyiko yetu. Kwa mfano, katika kusanyiko moja, mfanyakazi wa kituo kimoja kikubwa zaidi ulimwenguni alisifu ubora wa video zetu na habari zilizomo. Jonathan, ambaye husaidia kusimamisha na kuendesha vifaa vya sauti na video katika makusanyiko yetu ya eneo alisema hivi: “Mtu huyo alishangaa sana alipoambiwa kwamba wote waliofanya kazi hiyo walikuwa wajitoleaji na si wataalamu. Alisema kwamba kampuni yake ingehitaji siku tano kusimamisha vifaa vyote ambavyo sisi tulisimamisha kwa siku moja na nusu.” Katika kusanyiko lingine meneja alisema hivi, “Wataalamu wengi wa muziki na video wamekuja hapa, hata hivyo sijawahi kuona watu wakifanya kazi kwa ustadi na utaalamu wa kiwango hiki!”

 Wewe umenufaishwaje na mifumo ya sauti na video katika kusanyiko la eneo? Huenda unahisi kama David, anayeishi nchini Uingereza. Anasema hivi: “Nina umri wa miaka 88 na nimehudhuria makusanyiko maisha yangu yote. Hata hivyo, siku hizi ni rahisi zaidi kukazia fikira habari inayotolewa. Kwa sababu ya video zenye kupendeza, ni kana kwamba programu inakwisha upesi zaidi na ujumbe unawasilishwa waziwazi na kwa upatano.” Micheal anayeishi nchini Nigeria anasema hivi, “Kwa kuwa siku hizi akina ndugu hawapati matatizo ya kumsikia msemaji au kuona video, wanafaulu kukaza fikira zaidi na upendezi wao haupotei wakati wa programu.”

 Mwaka huu, unapohudhuria Makusanyiko ya Eneo na ya Pekee ya ‘Tangaza Habari Njema!’ tua ufikirie kuhusu kazi yote iliyofanywa ili kukusaidia uone na kusikiliza programu hiyo. Tunashukuru sana kwa michango yako ambayo imefanya kazi yote hiyo iwezekane, kutia ndani michango unayotoa kupitia donate.jw.org. Asante sana.