HABARI KUU | JE, SHETANI NI KIUMBE HALISI?
Je, Tunapaswa Kumwogopa Shetani?
Kaboni monoksaidi ni hatari na haionekani kama tu Shetani
Ni vigumu kuigundua. Haina rangi wala harufu, inaweza kukudhuru bila wewe kutambua. Zaidi ya nusu ya vifo vinavyotokana na sumu husababishwa na kaboni monoksaidi. Hata hivyo, usiwe na wasiwasi. Kuna njia za kuigundua gesi hiyo hatari na kujilinda. Kwa busara watu wengi huweka vifaa vya kuonya nao hutii ving’ora vinapolia.
Kama ilivyo kaboni monoksaidi, Shetani haonekani, ni vigumu kwa wanadamu kumgundua, naye ni hatari sana! Hata hivyo, Mungu ametuandalia msaada. Ukitumia zawadi zifuatazo hutahitaji kumwogopa Shetani.
Uhuru wa kuchagua. Andiko la Yakobo 4:7 linatuambia hivi: “Mpingeni Ibilisi, naye atawakimbia ninyi.” Ingawa Shetani ana nguvu, hawezi kukulazimisha ufanye mambo ambayo hupendi. Una hiari! Andiko la 1 Petro 5:9 linasema hivi: “Chukueni msimamo mkampinge yeye [Ibilisi], mkiwa imara katika imani.” Kumbuka, ni baada tu ya Yesu kumpinga Shetani mara tatu ndipo alipomwacha. (Mathayo 4:11) Wewe pia unaweza kuamua kumpinga Shetani.
Urafiki na Mungu. Andiko la Yakobo 4:8 linatutia moyo ‘kumkaribia Mungu.’ Yehova anakualika uwe na urafiki wa karibu pamoja naye. Unawezaje kuwa rafiki ya Mungu? Njia bora ya kuanza ni kujifunza mengi kumhusu katika Biblia. (Yohana 17:3) Unapozidi kujifunza kumhusu Yehova utachochewa kumpenda, na upendo huo utakuchochea kufanya mapenzi yake. (1 Yohana 5:3) Kuendelea kumkaribia Mungu kutakuwa na matokeo gani? Yakobo anaendelea kusema: “Naye [Mungu] atawakaribia ninyi.”
Yehova hutoa maandalizi ya kiroho ili kutulinda
Ahadi ya ulinzi. Andiko la Methali 18:10 linasema hivi: “Jina la Yehova ni mnara wenye nguvu. Mwadilifu hukimbilia humo na kupewa ulinzi.” Bila shaka, hilo halimaanishi kwamba unapaswa kutumia jina la Mungu kama hirizi. Badala yake, inamaanisha kwamba wale wanaomwabudu Mungu wanaweza kumwomba msaada wakati wowote.
Mfano mzuri. Andiko la Matendo 19:19 linatuambia jambo zuri kuhusu Wakristo wapya huko Efeso: “Hesabu kubwa ya wale waliozoea kufanya ufundi wa uchawi wakaleta pamoja vitabu vyao wakaviteketeza mbele ya kila mtu. Nao wakapiga pamoja hesabu za bei zake na kupata vikiwa na thamani ya vipande 50,000 vya fedha.” * Wakristo hao waliteketeza vitu vyote vilivyohusiana na uchawi, bila kujali hasara ya kifedha waliyopata. Mfano wao unaweza kutufundisha mambo mengi. Leo watu wengi wanapenda ushirikina na uchawi. Hata vifaa au mazoea ya kuwasiliana na pepo ambayo hayaonekani kuwa na madhara, yanaweza kumfanya mtu avamiwe na roho waovu. Ni muhimu kuteketeza chochote kinachohusiana na roho waovu, hata kama kufanya hivyo kutasababisha hasara.—Kumbukumbu la Torati 18:10-12.
Kwa miaka 50, Rogelio aliyetajwa kwenye makala ya kwanza ya gazeti hili, hakuamini kwamba kuna Shetani. Lakini baadaye alibadili maoni yake. Kwa nini? Rogelio anasema hivi, “Kwa mara ya kwanza katika maisha yangu, nilipata Biblia. Kujifunza Biblia kulinisaidia kutambua kwamba Shetani yupo. Ujuzi huo unanisaidia nisinaswe na mitego yake.”
“Kujifunza Biblia kulinisaidia kutambua kwamba Shetani yupo. Ujuzi huo unanisaidia nisinaswe na mitego yake”
Je, ungependa kuishi wakati ambao Shetani hatakuwepo tena? Inawezekana! Maandiko yanatabiri kuhusu wakati ambao Shetani, anayewapotosha wengi, atatupwa “ndani ya lile ziwa la moto na kiberiti.” (Ufunuo 20:10) Kwa kweli, moto na kiberiti haviwezi kumdhuru kiumbe wa roho asiyeonekana. Kwa hiyo, ziwa la moto linamaanisha uharibifu wa milele. Shetani hatakuwepo tena. Huo utakuwa wakati wenye shangwe sana kwa wanaompenda Mungu!
Kwa wakati huu, endelea kujifunza mengi zaidi kumhusu Yehova na sheria zake. * Wazia kuishi wakati ambapo, hatimaye, tutaweza kusema, “Shetani hayupo!”
^ fu. 8 Ikiwa vipande vinavyozungumziwa ni dinari ya Roma, basi jumla ya thamani ya vipande vyote ingekuwa mshahara wa siku kwa wafanyakazi 50,000—pesa nyingi sana!
^ fu. 11 Kwa habari zaidi kuhusu Shetani na uchawi, ona sura ya 10 ya kitabu Biblia Inafundisha Nini Hasa? Mwombe Shahidi wa Yehova yeyote akupatie.
