Matatizo ya Kulea Watoto Leo

NI JIONI sana, na mwenye mkahawa anajitayarisha kufunga ili kwenda nyumbani. Ndipo wanawake wawili na mtoto wanapoingia na kuagiza chakula. Kwa kuwa amechoka sana, mwenye mkahawa huo anataka kuwaambia amefunga kazi, lakini anaamua kuwahudumia. Wanawake hao wawili wanapoendelea kula na kuzungumza, mtoto anakimbia huku na huku ndani ya mkahawa, akiangusha biskuti sakafuni kisha kuziponda-ponda kwa miguu. Badala ya kumkataza kufanya hivyo, mamake anatabasamu tu. Mwishowe, wateja hao wanapoondoka, mwenye mkahawa ambaye amechoka analazimika kusafisha sakafu hiyo.

Inaelekea unajua kwamba hali hii iliyo halisi huonyesha kuwa, katika familia nyingi watoto hawazoezwi vizuri. Kuna sababu mbalimbali za kutofanya hivyo. Wazazi fulani huacha watoto wao wafanye watakalo, wakifikiri kwamba watoto wanapaswa kulelewa katika mazingira yenye uhuru. Au huenda kwa sababu ya shughuli nyingi, wazazi wasiwe na wakati wa kuwatunza watoto wao kwa uangalifu na kuwapa mazoezi yanayohitajiwa. Wazazi wengine hufikiri kwamba jambo lililo muhimu zaidi ni elimu ya mtoto wao, hivyo wao humpa mtoto uhuru usio na mipaka mradi tu anafanya vizuri shuleni na anakubaliwa kujiunga na chuo maarufu.

Lakini, wengine husema kwamba maadili ya wazazi na jamii kwa ujumla yanahitaji kurekebishwa. Wanatoa hoja kwamba watoto wanafanya uhalifu wa kila aina, nayo jeuri shuleni inaendelea kuongezeka siku baada ya siku. Kwa hiyo, mkuu mmoja wa shule fulani ya sekondari huko Seoul, Jamhuri ya Korea, alikazia kwamba ni muhimu kuwazoeza watoto kuwa na tabia nzuri. Alisema: “Kusitawisha tabia nzuri hutangulia kupata ujuzi.”

Wazazi wengi wanaotaka watoto wao waende chuoni na wafanikiwe maishani, hupuuza maonyo. Ikiwa wewe ni mzazi, unataka mtoto wako awe mtu wa aina gani? Unataka awe mtu mzima mwenye maadili na mwenye kutegemeka? Je, unataka awe mtu ambaye huwajali wengine, hubadilikana na hali, na mwenye maoni yafaayo? Ikiwa ndivyo, tafadhali chunguza makala ifuatayo.