Wazee—Wazoezeni Wengine Kazi

KATIKA makutaniko ya Mashahidi wa Yehova ulimwenguni pote, wanaume wanahitajika sana kutumikia katika nyadhifa za usimamizi. Wanahitajika sana hasa kwa sababu tatu.

Kwanza, Yehova anatimiza ahadi yake ya kufanya ‘mudogo kuliko wote awe taifa hodari.’ (Isaya 60:22, Zaire Swahili Bible) Kwa sababu ya fadhili zake zisizostahiliwa, karibu wanafunzi milioni moja wamebatizwa na kuwa Mashahidi wa Yehova katika miaka mitatu iliyopita. Wanaume wenye kuchukua madaraka wanahitajiwa ili kusaidia wapya hao waliobatizwa hivi karibuni wafanye maendeleo na kufikia ukomavu wa Kikristo.—Waebrania 6:1.

Pili, baadhi ya ndugu ambao wametumikia wakiwa wazee kwa miaka mingi wamelazimika kupunguza kazi wanazofanya kutanikoni kwa sababu ya kuzeeka au afya mbaya.

Tatu, wazee fulani Wakristo wenye bidii sasa wanatumikia katika Halmashauri za Uhusiano na Hospitali, Halmashauri za Ujenzi za Mkoa, au Halmashauri za Majumba ya Kusanyiko. Ili kusawazisha majukumu yao mbalimbali, nyakati nyingine wamelazimika kuacha baadhi ya madaraka yao katika makutaniko.

Wanaume zaidi wanaostahili na ambao wanahitajika sana watatoka wapi? Watapatikana kwa kuzoeza wengine. Biblia huwatia moyo waangalizi Wakristo wawazoeze “watu waaminifu, ambao, nao, watakuwa na sifa za ustahili wa kutosha kufundisha wengine.” (2 Timotheo 2:2) Kitenzi “kuzoeza” chamaanisha kufundisha ili kufanya mtu afae, astahili, au awe stadi. Na tuone jinsi wazee wanavyoweza kuwazoeza wanaume wengine wanaostahili.

Igeni Kielelezo cha Yehova

Bila shaka haishangazi kwamba Yesu Kristo ‘alifaa, alistahili, na alikuwa stadi’ katika kazi yake! Alizoezwa na Yehova Mungu mwenyewe. Ni mambo gani yaliyofanya kuzoezwa kwake kuwe na matokeo? Yesu alitaja mambo matatu, kama tunavyosoma katika andiko la Yohana 5:20: “Baba [1] ana shauku na Mwana na [2] humwonyesha mambo yote afanyayo yeye mwenyewe, naye atamwonyesha [3] kazi zilizo kubwa zaidi kuliko hizi.” Tutafahamu vizuri zaidi jinsi ya kuwazoeza wengine tunapochunguza kila moja ya mambo hayo matatu.

Ona kwamba Yesu alianza kwa kusema: “Baba ana shauku na Mwana.” Tangu mwanzo wa uumbaji, Yehova na Mwana wake wamekuwa na uhusiano wa karibu sana. Andiko la Mithali 8:30 lafafanua uhusiano huo: “Ndipo [mimi Yesu] nilipokuwa pamoja naye [Yehova Mungu], kama stadi wa kazi; nikawa furaha yake kila siku; nikifurahi daima mbele zake.” (Italiki ni zetu.) Yesu hakuwa na shaka lolote kwamba Yehova ‘alikuwa na shauku’ naye. Naye Yesu alionyesha waziwazi jinsi alivyofurahia kufanya kazi pamoja na Baba yake. Inafaa kama nini wazee Wakristo wawe na uhusiano mchangamfu na wa karibu na wale wanaozoezwa!

Jambo la pili alilotaja Yesu ni kwamba Baba “humwonyesha mambo yote afanyayo yeye mwenyewe.” Maneno hayo yanathibitisha mambo yanayotajwa katika andiko la Mithali 8:30, kwamba Yesu ‘alikuwa pamoja na’ Yehova ulimwengu wote mzima ulipokuwa ukiumbwa. (Mwanzo 1:26) Wazee wanaweza kufuata mfano huo bora kwa kufanya kazi kwa ukaribu na watumishi wa huduma, wakiwaonyesha jinsi ya kutekeleza majukumu yao kwa njia bora. Hata hivyo, mbali na watumishi wa huduma waliowekwa rasmi hivi karibuni, kuna wengine pia wanaohitaji kuzoezwa hatua kwa hatua. Namna gani ndugu waaminifu ambao wamejitahidi kwa miaka mingi  kufikilia cheo cha mwangalizi, lakini bado hawajawekwa rasmi? (1 Timotheo 3:1) Wazee wanapaswa kutoa shauri hususa kwa wanaume hao ili wajue ni wapi wanapohitaji kufanya marekebisho.

Kwa mfano, huenda mtumishi wa huduma akawa mwenye kutegemeka, anayejali wakati, anayetekeleza wajibu wake kwa bidii. Huenda akawa mwalimu mzuri. Huenda akawa anafanya kazi nzuri sana kutanikoni. Hata hivyo, huenda asitambue kwamba huwa anawatendea Wakristo wenzake kwa ukali. Wazee wanahitaji kuonyesha “upole ulio wa hekima.” (Yakobo 3:13) Je, halingekuwa jambo la fadhili mzee fulani kuongea na mtumishi huyo wa huduma, akimwonyesha waziwazi tatizo lake, na kumpa mifano hususa, na kumwonyesha jinsi anavyoweza kufanya maendeleo? Ikiwa mzee ‘atakoleza chumvi shauri lake,’ yaelekea litafuatwa. (Wakolosai 4:6) Bila shaka, mtumishi wa huduma atarahisisha kazi ya mzee kwa kusema mambo waziwazi na kukubali shauri lolote analopewa.—Zaburi 141:5.

Katika makutaniko fulani, wazee wanaendelea kuwazoeza ifaavyo watumishi wa huduma. Kwa mfano, wao huandamana na watumishi wa huduma wanaostahili wanapoenda kuwatembelea wagonjwa au wazeewazee. Kwa kuandamana nao, watumishi wa huduma hupata ujuzi katika kazi ya uchungaji. Bila shaka, mtumishi wa huduma anaweza kufanya mengi ili kuboresha hali yake ya kiroho.—Ona sanduku lililo chini lenye kichwa “Mambo Ambayo Watumishi wa Huduma Wanaweza Kufanya.”

Jambo la tatu lililofanya mazoezi ya Yesu yawe na matokeo ni kwamba Yehova alimzoeza huku akifikiria maendeleo ambayo angefanya wakati ujao. Yesu alisema kwamba Baba angemwonyesha Mwana “kazi zilizo kubwa zaidi kuliko hizi.” Uzoefu ambao Yesu alipata akiwa duniani ulimwezesha kusitawisha sifa ambazo angehitaji ili kutekeleza migawo yake ya wakati ujao. (Waebrania 4:15; 5:8, 9) Kwa mfano, hivi karibuni Yesu atakuwa na mgawo mkubwa kama nini—kufufua na kuhukumu mabilioni ya watu ambao wamekufa!—Yohana 5:21, 22.

Wazee wanapowazoeza watumishi wa huduma leo, wanapaswa kukumbuka mahitaji ya wakati ujao. Hata ingawa huenda ikaonekana kwamba kuna wazee na watumishi wa huduma wa kutosha kushughulikia mahitaji ya sasa, je, hali itaendelea kuwa hivyo ikiwa kutaniko jipya litaanzishwa? Ikiwa makutaniko kadhaa yataanzishwa, je, kutakuwa na wazee na watumishi wa huduma wa kutosha? Katika miaka mitatu iliyopita, zaidi ya makutaniko 6,000 yalianzishwa ulimwenguni pote. Wazee na watumishi wa huduma wengi sana wanahitajiwa ili kutunza makutaniko hayo mapya.

Wazee, je, mnafuata kielelezo cha Yehova kwa kusitawisha uhusiano mchangamfu na wa karibu pamoja na ndugu mnaowazoeza? Je, mnawaonyesha jinsi ya kufanya kazi yao?  Je, mnafikiria mahitaji ya wakati ujao? Wengi watathawabishwa sana ikiwa wazee wataiga jinsi Yehova alivyomzoeza Yesu.

Msiogope Kuwapa Wengine Madaraka

Huenda wazee wenye uwezo ambao wamezoea kushughulikia migawo mingi mizito kwa wakati uleule wakasita kuwapa wengine madaraka. Labda walijaribu kuwapa wengine madaraka hapo awali lakini waliopewa madaraka hayo wakashindwa kuyatimiza vizuri. Kwa hiyo huenda wakawa na mtazamo wa kwamba, ‘Ikiwa unataka jambo lifanywe vizuri, ni lazima ulifanye wewe mwenyewe.’ Lakini je, mtazamo huo unapatana na mapenzi ya Yehova yanayoonyeshwa katika Maandiko, kwamba wanaume wasio na uzoefu mwingi wazoezwe na wanaume walio na uzoefu mkubwa zaidi?—2 Timotheo 2:2.

Mtume Paulo alitamauka wakati mmoja wa rafikize waliosafiri pamoja naye, Yohana Marko, alipoacha mgawo wake huko Pamfilia na kurudi nyumbani. (Matendo 15:38, 39) Hata hivyo, Paulo hakuruhusu jambo hilo limvunje moyo asiwazoeze wengine. Alimchagua ndugu mwingine mchanga, Timotheo, na kumzoeza katika kazi ya mishonari. * (Matendo 16:1-3) Huko Berea, mishonari hao walikabili upinzani mkali sana hivi kwamba Paulo hangeendelea kukaa huko. Kwa hiyo alimwagiza Timotheo pamoja na Sila, ndugu mkomavu na mwenye umri mkubwa zaidi walitunze kutaniko hilo jipya. (Matendo 17:13-15) Bila shaka, Timotheo alijifunza mambo mengi kutoka kwa Sila. Baadaye, Timotheo alipokuwa tayari kutwaa jukumu kubwa zaidi, Paulo alimtuma huko Thesalonike ili kulitia moyo kutaniko hilo.—1 Wathesalonike 3:1-3.

Paulo na Timotheo walikuwa na uhusiano mchangamfu. Walikuwa marafiki sana. Alipokuwa akiandikia kutaniko huko Korintho, Paulo alimtaja Timotheo, ambaye alikuwa akipanga kumtuma huko, akiwa ‘mwana wake mpendwa na mwaminifu katika Bwana.’ Aliongeza kusema: “[Timotheo] atawakumbusha nyinyi njia zangu kuhusiana na Kristo Yesu.” (1 Wakorintho 4:17) Timotheo alikubali kuzoezwa na Paulo na kustahili kutekeleza migawo yake. Ndugu wengi wachanga wamekuwa watumishi wa huduma wenye uwezo, wazee, au hata waangalizi wasafirio kwa sababu walinufaika na mazoezi waliyopata kutoka kwa wanaume wazee waliopendezwa nao, kama vile Paulo alivyopendezwa na Timotheo.

Wazee, Wazoezeni Wengine!

Bila shaka, unabii wa Isaya 60:22 unatimizwa leo. Yehova anafanya ‘mudogo kuliko wote awe taifa hodari.’ Ili taifa hilo lidumu likiwa “hodari,” lazima lipangwe vizuri. Wazee, kwa nini msifikirie njia ambazo mnaweza kuwazoeza zaidi wanaume waliojitoa ambao wanastahili? Hakikisheni kwamba kila mtumishi wa huduma anafahamu vizuri ni marekebisho gani anayohitaji kufanya ili afanye maendeleo. Nanyi akina ndugu mliobatizwa, tumieni kwa manufaa mazoezi yoyote mtakayopata. Tumieni fursa za kuzidisha uwezo, ujuzi, na uzoefu wenu. Bila shaka, Yehova atabariki programu hiyo ya upendo ya kusaidia wengine.—Isaya 61:5.

[Maelezo ya Chini]

[Sanduku katika ukurasa wa 30]

Mambo Ambayo Watumishi wa Huduma Wanaweza Kufanya

Ingawa wazee wanapaswa kuwazoeza watumishi wa huduma, watumishi wa huduma wanaweza kufanya mengi ili kuendelea kiroho.

—Watumishi wa huduma wanapaswa kuwa wenye bidii na wenye kutegemeka wanaposhughulikia migawo yao. Pia wanapaswa kuwa na mazoea mazuri ya kujifunza. Kwa kadiri kubwa, kufanya maendeleo kunategemea kujifunza na kutumia mambo unayojifunza.

—Mtumishi wa huduma anapojitayarisha kutoa hotuba kwenye mkutano wa Kikristo, hapaswi kusita kumfikia mzee mwenye uwezo ili kumwomba madokezo kuhusu jinsi ya kutoa hotuba hiyo.

—Mtumishi wa huduma anaweza kumwomba mzee fulani aangalie kwa makini jinsi anavyotoa hotuba hiyo ya Biblia na kumshauri ili afanye maendeleo.

Watumishi wa huduma wanapaswa kuomba, kukubali, na kutumia shauri linalotolewa na wazee. Kwa kufanya hivyo, maendeleo yao ‘yatakuwa dhahiri kwa watu wote.’—1 Timotheo 4:15.