Maoni ya Biblia

Je, Kuwa na Imani Kunapatana na Mambo Hakika?

“IMANI hupinga mambo ya hakika,” akaandika mwanafalsafa Mwingereza A. C. Grayling. Maneno yake yanapatana na maoni ya waandikaji na wanafalsafa wengi sana ambao kwa karne nyingi wamedai kwamba imani haipatani na mambo hakika.

Ni kweli kwamba imani fulani za kidini hazipatani na mambo hakika. Lakini fikiria hili: Imani nyingi za kisayansi zimethibitishwa kuwa za uwongo. Lakini je, hilo linamaanisha kwamba imani zote za kisayansi ni za uwongo au hazipatani na mambo hakika? Kwa nini basi mtu awe na maoni hayo kuhusu imani ya kidini? Kwa kweli, imani inayofafanuliwa katika Biblia haiwezi kuwapo bila ujuzi lakini inategemea hasa ujuzi na mambo hakika. Unapochunguza uthibitisho uliopo, hebu ona jinsi imani ya kweli inavyopatana na mambo hakika.

Imani Inayotegemea Hasa Mambo Hakika

Biblia inasema kwamba ili ibada yako iwe “yenye kukubalika kwa Mungu,” lazima iwe ‘utumishi mtakatifu pamoja na nguvu zako za kufikiri.’ Kwa maneno mengine, unapaswa kumwabudu Mungu “kwa njia inayowastahili viumbe wenye akili.” (Waroma 12:1; The Jerusalem Bible) Kwa hiyo, imani inayotajwa katika Biblia si kitu kisicho na msingi. Na si kitu kisichotegemea uthibitisho wowote. Bali ni kitu ambacho umefikiria kwa makini—kisha ukaamua kumtegemea Mungu na Neno lake, ambao msingi wake ni mambo hakika.

Bila shaka, ili ufikiri kwa njia inayofaa, unahitaji habari sahihi. Hata programu zenye nguvu zaidi za kompyuta ambazo zimebuniwa kwa kutegemea kanuni zinazopatana na akili zitatenda kwa njia ya ajabu ikiwa hazitatiwa habari sahihi. Vivyo hivyo, imani ya kweli itategemea sana mambo unayosikia au ikiwa habari unazoingiza akilini zinategemeka. Kwa kufaa, Biblia inasema kwamba “imani hufuata jambo lililosikiwa.”—Waroma 10:17.

Takwa la msingi la kuwa na imani ni “ujuzi sahihi wa kweli.” (1 Timotheo 2:4) Biblia inasema kwamba “kweli” tu ndiyo ‘itakayokuweka huru’ kutokana na imani inayopotosha, iwe ni ya kisayansi au ya kidini. (Yohana 8:32) Biblia inakuonya kwamba usiamini “kila neno.” (Methali 14:15) Badala yake, inasema kwamba unapaswa ‘kuhakikisha mambo yote’—au kupima mambo unayosikia kabla ya kuyaamini. (1 Wathesalonike 5:21) Kwa nini ufanye utafiti na kupima mambo unayoamini? Kwa sababu imani inayotegemea uwongo inapumbaza. Watu fulani wasikivu kutoka jiji la Beroya ni mfano mzuri wa jinsi ya kupata imani ya kweli. Hata ingawa watu hao walitaka sana kuamini mambo ambayo wamishonari Wakristo waliwafundisha, waliazimia ‘kuyachunguza Maandiko kwa uangalifu kila siku ili kuona kama mambo hayo ndivyo yalivyo.’—Matendo 17:11.

Kujenga Imani Katika Biblia

Namna gani ikiwa una shaka kwamba Biblia inaweza kutegemeka? Ni nini kinachoweza kukufanya uwe na hakika kwamba kitabu hicho kina ujuzi sahihi? Ni nini hukufanya uweze kuwaamini watu? Bila shaka ni kwa kupata kuwajua—kwa kutazama jinsi wanavyojiendesha kwa muda fulani na matokeo  ya mwenendo wao. Mbona usitumie njia hiyohiyo kuhusiana na Biblia? *

Biblia inafafanua imani ya kweli kuwa “tarajio lililohakikishwa la mambo yanayotumainiwa, uthibitisho ulio wazi wa mambo halisi ingawa hayaonekani.” (Waebrania 11:1) Ni wazi kwamba mtu aliye na imani ya kweli si mjinga kwa kuwa imani yake inategemea kuchunguza kwa makini habari zilizopo. Kufikiria habari hizo kunamsadikisha mtu kwamba hata ingawa kuna vitu ambavyo haviwezi kuonekana kwa macho, vitu hivyo ni halisi.

Hata hivyo, namna gani ikiwa mambo fulani unayojifunza yanapingana na mambo uliyokuwa ukiamini? Je, unapaswa kupuuza mambo unayojifunza? La hasha! Kuna wakati ambapo ingefaa kuchunguza uthibitisho wenye nguvu ambao huenda ukapingana na mambo unayoamini. Biblia inasema kwamba Mungu anaahidi kuwathawabisha watu wanyoofu wanaotafuta kweli kwa kuwapa ujuzi, utambuzi, na uwezo wa kufikiri.—Methali 2:1-12.

Imani inayotegemea mafundisho ya Biblia inapatana na mambo hakika. Wewe una imani ya aina gani? Watu wengi “wamerithi” imani yao ya kidini na hawajawahi kuchunguza kwa uzito ikiwa wana msingi imara wa imani hiyo. Hutakuwa ukiwavunjia heshima wazazi wako ikiwa utachunguza mambo unayoamini ili ‘ujihakikishie mwenyewe’ kwamba kufikiri kwako kunapatana na Neno la Mungu. (Waroma 12:2) Biblia inatuhimiza ‘tujaribu maneno yaliyoongozwa na roho ili kuona kama yanatokana na Mungu.’ (1 Yohana 4:1) Ukifanya hivyo, hata imani yako ikitiliwa shaka, utaweza ‘kujitetea mbele ya kila mtu ambaye hutaka kutoka kwako sababu ya tumaini lililo ndani yako.’—1 Petro 3:15.

[Maelezo ya Chini]

JE, UMEJIULIZA HIVI?

● Je, Biblia inawazuia watu wasitumie nguvu za kufikiri?—Waroma 12:1, 2.

● Ni muhimu kuwa na ujuzi wa aina gani ili uwe na imani ya kweli?—1 Timotheo 2:4.

● Tunajifunza nini kutokana na ufafanuzi wa Biblia wa imani?—Waebrania 11:1.

[Blabu katika ukurasa wa 29]

Mungu huwathawabisha wale wanaotafuta kweli kwa bidii