MAKALA YA 43
WIMBO 90 Tianeni Moyo
Jinsi ya Kushinda Shaka
“Hakikisheni mambo yote.”—1 THE. 5:21.
JAMBO KUU
Jinsi ya kushughulikia mambo tunayotilia shaka ambayo yanaweza kuathiri utumishi wetu kwa Yehova.
1-2. (a) Huenda watumishi wa Yehova wakatilia shaka mambo gani? (b) Tutachunguza nini katika makala hii?
WATU wenye umri mbalimbali huwa na shaka a pindi fulani. Kwa mfano, mfikirie kijana ambaye ni Shahidi anayejiuliza ikiwa kwa kweli Mungu anamjali. Huenda kijana huyo hana uhakika ikiwa angependa kubatizwa. Au mfikirie ndugu wa makamo ambaye alipokuwa kijana alichagua kutanguliza masilahi ya Ufalme badala ya kufuatilia kazi yenye mshahara mnono. Kwa kuwa sasa anapambana sana ili kuiandalia familia yake, huenda anatilia shaka uamuzi aliofanya alipokuwa kijana. Mfikirie dada aliyezeeka ambaye nguvu zake zimepungua. Huenda amevunjika moyo kwa sababu hawezi kutimiza mambo ambayo zamani alifanya. Je, umewahi kujiuliza maswali yafuatayo: ‘Je, kweli Yehova ananijali? Je, jitihada zangu za kujidhabihu kwa ajili yake zilikuwa za bure? Je, bado Yehova anaweza kunitumia?’
2 Ikiwa hatutatafuta majibu ya maswali hayo, shaka hizo zinaweza kuathiri ibada yetu. Katika makala hii, tutachunguza jinsi kukazia fikira kanuni za Biblia kunavyoweza kutusaidia ikiwa tunatilia shaka kwamba (1) Yehova anatujali, (2) maamuzi tuliyofanya wakati uliopita yalikuwa mazuri, au (3) ikiwa bado Yehova anaweza kututumia.
JINSI YA KUSHINDA SHAKA ULIZO NAZO
3. Taja njia moja ambayo inaweza kutusaidia kushinda shaka tulizo nazo.
3 Njia moja ambayo inaweza kutusaidia kushinda shaka tulizo nazo ni kutafuta majibu ya maswali yetu katika Neno la Mungu. Ikiwa tutafanya hivyo, tutaimarishwa, tutakua kiroho, na tutakuwa na uwezo mzuri zaidi wa “[kusimama] imara katika imani.”—1 Kor. 16:13.
4. Tunawezaje ‘kuhakikisha mambo yote’? (1 Wathesalonike 5:21)
4 Soma 1 Wathesalonike 5:21. Ona kwamba Biblia inatuhimiza ‘tuhakikishe mambo yote.’ Tunawezaje kufanya hivyo? Tunaweza kuhakikisha kwamba mambo tunayoamini ni ya kweli kwa kuyalinganisha na mambo ambayo Biblia inasema. Kwa mfano, fikiria kisa cha kijana anayejiuliza ikiwa ana thamani yoyote machoni pa Mungu. Je, anapaswa kukubaliana tu na wazo hilo na kuliona kuwa la kweli? Hapana, anapaswa ‘kuhakikisha mambo yote’ kwa kujifunza maoni ya Yehova kuhusu jambo hilo.
5. Tunawezaje “kumsikia” Yehova akijibu maswali yetu?
5 Tunaposoma Neno la Mungu, ni kana kwamba tunamsikia Yehova akizungumza nasi. Lakini ili kujua maoni yake kuhusu maswali yetu hususa tunahitaji kufanya jitihada. Tunaposoma Biblia, tunahitaji kukazia fikira mistari ambayo itajibu maswali yanayotuhangaisha. Tunaweza kufanya utafiti kuhusu habari hiyo, tukitumia vifaa vingi vya kujifunzia ambavyo tengenezo la Yehova limetuandalia. (Met. 2:3-6) Tunaweza kusali kwa Yehova ili atuongoze tunapofanya utafiti na atusaidie kupata maoni yake kuhusiana na swali letu. Kisha, tunaweza kutafuta kanuni za Biblia na habari hususa tunazoweza kutumia katika kisa chetu. Pia, tunaweza kunufaika kwa kuchunguza masimulizi ya Biblia kuhusu watu ambao walikabili hali kama yetu.
6. Mikutano inatusaidiaje kushinda shaka tulizo nazo?
6 Pia, ni kana kwamba tunamsikia Yehova akizungumza nasi kwenye mikutano yetu. Ikiwa tunahudhuria mikutano kwa ukawaida, tunaweza kusikia kwenye hotuba au maelezo ya mtu jambo tunalohitaji kufanya ili kushinda shaka tulizo nazo. (Met. 27:17) Acheni tuchunguze jinsi ya kushughulikia baadhi ya mambo hususa tunayotilia shaka.
UNAPOTILIA SHAKA IKIWA YEHOVA ANAKUJALI
7. Huenda baadhi ya watu wakajiuliza swali gani?
7 Umewahi kujiuliza hivi: ‘Je, kweli Yehova ananijali?’ Ikiwa unajihisi huna thamani, wazo la kuwa rafiki ya Muumba wa ulimwengu linaweza kuonekana kuwa jambo lisilowezekana, au jambo usiloweza kufikia. Huenda wazo kama hilo lilimhangaisha Mfalme Daudi. Alistaajabishwa kujua kwamba Yehova hata aliwajali wanadamu na aliuliza hivi: “Ee Yehova, mwanadamu ni nini hata umtambue, mwana wa mtu anayeweza kufa ni nini hata umkazie uangalifu?” (Zab. 144:3) Unaweza kupata wapi jibu la swali, ‘Je, kweli Yehova anatujali?’
8. Kulingana na 1 Samweli 16:6, 7, 10-12, Yehova anaona nini anapowatazama watu?
8 Katika Biblia, tunajifunza kwamba Yehova anawatambua wale ambao huenda wengine wanawaona kuwa si watu muhimu. Kwa mfano, Yehova alimtuma Samweli kwenye nyumba ya Yese ili akamtie mafuta mfalme aliyefuata wa Israeli. Yese aliwaita watoto wake wa kiume saba kati ya wanane ili wakutane na Samweli lakini hakumwita Daudi, ambaye alikuwa mdogo kuliko wote. b Hata hivyo, Yehova alimchagua Daudi. (Soma 1 Samweli 16:6, 7, 10-12.) Yehova aliona jinsi Daudi alivyo moyoni—kijana aliyethamini mambo ya kiroho.
9. Kwa nini unaweza kuwa na uhakika kwamba Yehova anakujali? (Tazama pia picha.)
9 Fikiria jinsi ambavyo tayari Yehova ameonyesha anakujali. Anakupatia ushauri unaofaa hali yako. (Zab. 32:8) Hilo linathibitisha kwamba anakujua vizuri. (Zab. 139:1) Unapotumia ushauri ambao Yehova anakupatia na kuona jinsi unavyokusaidia, utasadiki kabisa kwamba Yehova anakujali. (1 Nya. 28:9; Mdo. 17:26, 27) Yehova anatambua jitihada zako. Anaona sifa zako nzuri na anataka awe Rafiki yako. (Yer. 17:10) Naye atafurahi sana ukiamua kuwa rafiki yake.—1 Yoh. 4:19.
“Ukimtafuta [Yehova], atakuruhusu umpate.”—1 Nya. 28:9 (Tazama fungu la 9) c
UNAPOTILIA SHAKA IKIWA MAAMUZI ULIYOFANYA ZAMANI YALIKUWA YA HEKIMA
10. Tunapofikiria maamuzi tuliyofanya wakati uliopita, huenda tukajiuliza maswali gani?
10 Baada ya muda, huenda baadhi ya watu wakajiuliza ikiwa walifanya maamuzi sahihi wanapokumbuka maamuzi waliyofanya zamani. Labda waliamua kudhabihu kazi yenye mshahara mnono au biashara yenye faida kubwa ili kumtumikia Yehova kikamili zaidi. Lakini huenda sasa miaka mingi imepita tangu walipofanya uamuzi huo. Huenda wanawaona watu wanaowafahamu ambao walifuatilia mambo hayo ya kimwili wakionekana kuwa na pesa nyingi na kuishi maisha yenye kustarehesha. Matokeo ni kwamba huenda wakajiuliza: ‘Je, jitihada zangu za kujidhabihu kwa ajili ya Yehova zilikuwa za bure? Au je, zimefanya nikose fursa nyingine mbalimbali?’
11. Ni nini kilichomhangaisha mwandikaji wa Zaburi ya 73?
11 Ikiwa unahangaishwa na maswali kama hayo, fikiria jinsi mwandikaji wa Zaburi ya 73 alivyohisi. Aliona ni kana kwamba wengine wanafurahia afya njema, ufanisi, na maisha yasiyo na mikazo. (Zab. 73:3-5, 12) Alipowatazama na kuona jinsi maisha yao yalivyoonekana kuwa na mafanikio, alihisi jitihada zake za kumtumikia Yehova zilikuwa za bure. ‘Alitaabika mchana kutwa’ kwa sababu ya mawazo hayo yenye kuvunja moyo. (Zab. 73:13, 14) Alishughulikiaje hisia hizo zilizomhangaisha?
12. Kulingana na Zaburi 73:16-18, mwandikaji wa zaburi hiyo alishughulikiaje mahangaiko yake?
12 Soma Zaburi 73:16-18. Mtunga zaburi alienda mahali patakatifu pa Yehova. Akiwa mahali hapo, aliweza kufikiri kwa njia nzuri. Alitambua kwamba ingawa maisha ya baadhi ya watu yalionekana kuwa yenye kustarehesha, watu hao hawakuwa na tumaini la wakati ujao. Alipotambua jambo hilo, alipata amani ya akili na akajua kwamba kufuatilia mambo ya kiroho ndio uamuzi bora kabisa. Matokeo ni kwamba aliazimia tena kuendelea kumtumikia Yehova.—Zab. 73:23-28.
13. Unawezaje kupata amani ya akili ikiwa unatilia shaka maamuzi uliyofanya wakati uliopita? (Tazama pia picha.)
13 Kwa msaada wa Neno la Mungu wewe pia unaweza kupata amani ya akili. Jinsi gani? Tafakari thamani ya kile ulicho nacho—kutia ndani hazina zilizo mbinguni—na ukilinganishe na matokeo ambayo watu wanaotegemea tu vitu vya ulimwengu huu hupata. Huenda wakategemea kikamili mambo waliyotimiza katika mfumo huu kwa sababu hawana tumaini lolote la wakati ujao. Hata hivyo, kwa upande wako, Yehova anaahidi kukupatia baraka zinazozidi jambo lolote ambalo umewahi kuwazia. (Zab. 145:16) Pia, fikiria jambo hili: Je, kweli tunaweza kujua maisha yetu yangekuwaje ikiwa tungefanya maamuzi tofauti? Jambo moja ni hakika: Wale wanaofanya maamuzi yanayotegemea upendo wao kwa Mungu na kwa jirani, kamwe hawatakosa kitu chochote ambacho kwa kweli ni chema.
Kazia fikira baraka za wakati ujao ambazo Yehova ameahidi (Tazama fungu la 13) d
UNAPOTILIA SHAKA IKIWA BADO UNAWEZA KUTUMIWA NA YEHOVA
14. Baadhi ya watu wanapitia hali gani, na huenda wanahangaishwa na swali gani?
14 Baadhi ya watumishi wa Yehova wanakabiliana na matatizo yanayotokana na kusonga kwa umri, afya mbaya, au ulemavu fulani. Huenda mambo hayo yakawafanya watilie shaka thamani yao machoni pa Yehova. Huenda wakajiuliza, ‘Je, bado Yehova anaweza kunitumia?’
15. Mwandikaji wa Zaburi ya 71 alisadiki nini?
15 Mwandikaji wa Zaburi ya 71 alizungumzia hali kama hiyo. Alisali hivi: “Usiniache ninapoishiwa na nguvu.” (Zab. 71:9, 18) Hata hivyo, mtunga zaburi huyo aliendelea kusadiki kwamba ikiwa angemtumikia Mungu kwa ushikamanifu, Yehova angemwongoza na kumtegemeza. Mtunga zaburi huyo alijionea kwamba Yehova anapendezwa na wale ambao wanafanya yote wawezayo ili kumtumikia licha ya matatizo wanayokabili.—Zab. 37:23-25.
16. Ni katika njia gani wale wenye umri mkubwa wanaweza kutumiwa na Yehova? (Zaburi 92:12-15)
16 Ikiwa wewe ni mwenye umri mkubwa, ione hali yako kama Yehova anavyoiona. Anaweza kukusaidia kunawiri kiroho hata ikiwa huenda unakabili matatizo ya kiafya. (Soma Zaburi 92:12-15.) Badala ya kukazia fikira mambo ambayo kwa sasa huwezi kutimiza, kazia fikira yale unayoweza kutimiza. Kwa mfano, unaweza kuwaimarisha wengine kupitia mfano wako wa uaminifu na kuwaonyesha jinsi unavyopendezwa nao. Unaweza kuzungumzia jinsi ambavyo Yehova amekutegemeza kwa miaka mingi na uwajulishe ahadi za Biblia za wakati ujao ambazo unatazamia. Na kamwe usisahau kwamba sala zako za kutoka moyoni kwa niaba ya wengine zina nguvu sana. (1 Pet. 3:12) Licha ya hali zetu, sisi sote tuna jambo ambalo tunaweza kumtolea Yehova na kuwapatia wengine.
17. Kwa nini tunapaswa kupinga mwelekeo wa kujilinganisha na wengine?
17 Ikiwa umevunjika moyo kwa sababu huwezi kufanya mengi zaidi katika utumishi wa Yehova, uwe na uhakika kwamba Yehova anathamini chochote unachoweza kutimiza. Huenda una mwelekeo wa kulinganisha kile unachoweza kufanya na yale ambayo wengine wanafanya. Jitahidi kupinga mwelekeo huo! Kwa nini? Kwa sababu Yehova hatulinganishi na wengine. (Gal. 6:4) Kwa mfano, Maria alimpa Yesu zawadi ya mafuta yenye marashi ya gharama kubwa. (Yoh. 12:3-5) Tofauti na hilo, mjane mwenye uhitaji alichangia hekaluni sarafu mbili zenye thamani ndogo sana. (Luka 21:1-4) Hata hivyo, Yesu aliona zawadi hizo zote kuwa wonyesho wa imani. Yehova anathamini sana kitu chochote unachofanya ambacho kinachochewa na upendo na imani yako kwake, hata ikiwa unakiona kuwa kidogo.
18. Ni nini kitakachotusaidia kushinda shaka tulizo nazo? (Tazama pia sanduku “ Neno la Mungu Linaweza Kukusaidia Kushinda Shaka.”)
18 Sisi sote tunaweza kuwa na shaka nyakati fulani. Hata hivyo, kama tulivyoona, Neno la Mungu la kweli linalotegemeka linaweza kutusaidia kushinda shaka hizo. Hivyo, jitahidi kushinda shaka ulizo nazo, nawe utakuwa na uhakika badala ya kuvunjika moyo. Bila shaka, Yehova anakujali wewe binafsi. Anathamini mambo ambayo umejidhabihu na ameahidi kwamba atakuthawabisha. Uwe na uhakika kwamba Yehova anawaona watumishi wake wote washikamanifu kuwa wanastahili upendo wake na anawajali.
WIMBO 111 Sababu za Kuwa na Shangwe
a UFAFANUZI WA MANENO: Katika makala hii, tunazungumzia kuhusu shaka ambazo zinafanya tusiwe na uhakika kuhusu thamani yetu kwa Yehova au ikiwa maamuzi tuliyofanya zamani yalikuwa ya hekima. Hizo si aina ya shaka ambazo zinarejelewa katika Biblia kuwa ni uthibitisho wa kwamba mtu hana imani katika Yehova na ahadi zake.
b Ingawa Biblia haitaji umri hususa wa Daudi wakati Yehova alipomchagua kuwa mfalme, inawezekana kwamba bado alikuwa tineja.—Tazama gazeti la Mnara wa Mlinzi la Septemba 1, 2011, uku. 29, fungu la 2.
