Akina ndugu waliokuwa Betheli walikuwa wamefanya kazi kwa zaidi ya mwaka mmoja ili kujenga kituo cha redio cha WBBR huko Staten Island, New York City. Baada ya kutayarisha eneo hilo, walijenga nyumba kubwa kwa ajili ya wafanyakazi na jengo lingine kwa ajili ya kuhifadhi vifaa. Walipomaliza kazi hiyo, akina ndugu walianza kuleta vifaa vilivyohitajika ili kuanza “kurusha vipindi hewani.” Lakini wangehitaji kushinda changamoto mbalimbali.

Akina ndugu hao waligundua kwamba kuweka antena kuu ya kituo hicho lilikuwa jambo gumu sana. Antena hiyo yenye urefu wa mita 91 ilihitaji kuning’inizwa kati ya nguzo mbili za mbao zenye urefu wa mita 61. Jaribio la kwanza halikufanikiwa. Lakini kwa kutegemea msaada wa Yehova, hatimaye akina ndugu hao walifanikiwa. Calvin Prosser, aliyefanya kazi kwenye mradi huo, alisema hivi: “Ikiwa jaribio letu la kwanza lingefanikiwa, tungejipongeza na kusema, ‘Ona jambo ambalo sisi tumetimiza!’” Akina ndugu hao walitambua kwamba Yehova ndiye aliyefanikisha jambo hilo. Lakini walikabili changamoto nyingine.

Kurusha vipindi vya redio lilikuwa bado jambo jipya, na haikuwa rahisi kununua vifaa vilivyohitajika. Hivyo, akina ndugu walinunua kifaa cha wati 500 cha kurushia mawimbi ya redio ambacho kilikuwa kimetumiwa awali kutoka kwa mtu aliyeishi jirani. Badala ya kununua maikrofoni, walitumia simu ya kawaida. Usiku mmoja mwezi wa Februari, akina ndugu waliamua kujaribu mitambo hiyo yote. Walihitaji programu ya kurusha hewani, hivyo akina ndugu waliimba nyimbo za Ufalme. Ernest Lowe anakumbuka jambo lenye kufurahisha lililotokea. Akina ndugu walipokuwa wakiimba,  walipigiwa simu na Jaji Rutherford, b ambaye aliwasikia wakiimba kwenye redio yake akiwa Brooklyn, karibu umbali wa kilomita 25.

Ndugu Rutherford aliwaambia: “Acheni kupiga hizo kelele. Sauti zenu zinasikika kama paka wanaopiga kelele!” Wakiwa wameaibika kidogo, akina ndugu hao walizima mitambo haraka, lakini walikuwa na uhakika kwamba walikuwa tayari kwa ajili ya kurusha hewani kipindi cha kwanza.

Februari 24, 1924, siku ya kurusha rasmi kipindi cha kwanza hewani, Ndugu Rutherford alikiweka wakfu kituo cha redio ili kitumikie “masilahi ya ufalme wa Masihi.” Alisema kwamba kusudi la kituo hicho “ni kuwawezesha watu waelewe maana ya nyakati tunazoishi kulingana na Biblia, licha ya imani yao au dhehebu lao.”

Kipindi cha kwanza kurushwa hewani kilikuwa na mafanikio makubwa. Kwa miaka 33 iliyofuata, kituo hicho cha redio cha WBBR kilitumiwa kurusha programu za redio za watu wa Yehova.

Julai 1924, Wanafunzi wa Biblia walikusanyika kwa ajili ya kusanyiko huko Columbus, Ohio. Wajumbe walikuja kutoka ulimwenguni kote, na walisikiliza hotuba katika lugha ya Kiarabu, Kifaransa, Kigiriki, Kihungaria, Kiingereza, Kiitaliano, Kijerumani, Kilithuania, Kipolishi, Kirusi, na lugha za nchi za Skandinavia, na Ukrainia. Sehemu za programu zilirushwa kupitia redio, na mipango ilifanywa ili gazeti la Ohio State Journal liandike ripoti za kila siku kuhusu kusanyiko hilo.

Siku ya Alhamisi, Julai 24, zaidi ya wahudhuriaji 5,000 wa kusanyiko walishiriki katika utumishi wa shambani. Waliwaachia watu karibu vitabu 30,000 na walianzisha maelfu ya mafunzo ya Biblia. Gazeti la The Watch Tower liliita siku hiyo “pindi yenye shangwe zaidi katika kusanyiko.”

Jambo lingine lenye kuvutia kuhusu kusanyiko hilo lilitokea siku ya Ijumaa, Julai 25, Ndugu Rutherford aliposoma ujumbe wa shutuma, tangazo zito dhidi ya makasisi. Ukiwa katika mfumo wa hati ya kisheria, ujumbe huo wa shutuma uliwashtaki viongozi wa kisiasa, kidini, na kibiashara kwa “kuendelea kuwazuia watu wasijifunze kuhusu maandalizi ya Mungu ya kuwapa baraka ya uzima.” Kwa kuongezea, ujumbe huo wa shutuma ulisema kwamba wanaume hao walikuwa “wameunga mkono Ushirika wa Mataifa na kuutangaza  kuwa ‘shirika la kisiasa linalowakilisha Ufalme wa Mungu duniani.’” Wanafunzi hao wa Biblia walihitaji ujasiri ili kuwahubiria watu ujumbe huo.

Likielezea kwa ufupi matokeo ya kusanyiko hilo, gazeti la The Watch Tower lilisema hivi: “Jeshi hili dogo la Bwana lililokutana kwenye Kusanyiko la Columbus liliondoka likiwa limeimarishwa katika imani . . . , mishale ya moto ya adui ambayo ingerushwa dhidi yao haingekuwa na nguvu yoyote.” Leo Claus, ambaye alihudhuria kusanyiko hilo, anakumbuka hivi: “Tuliondoka kusanyikoni tukiwa na shauku ya kusambaza ujumbe huo wa shutuma katika eneo letu.”

Mwezi wa Oktoba, Wanafunzi wa Biblia walianza kusambaza mamilioni ya trakti yenye kichwa Ecclesiastics Indicted, (Viongozi wa Kanisa Washtakiwa) ambayo ni nakala iliyochapishwa iliyotia ndani ujumbe wa shutuma ambao Ndugu Rutherford alitoa dhidi ya makasisi. Katika mji ndogo wa Cleveland, Oklahoma, Frank Johnson alimaliza kusambaza trakti hizo katika eneo ambalo alikuwa amegawiwa dakika 20 kabla ya wahubiri wengine kuja kumchukua. Hakuweza kusubiri katika eneo lililo wazi kwa sababu wanaume wa mji huo ambao walikuwa wamekasirishwa na kazi yake ya kuhubiri walikuwa wakimtafuta. Ndugu Johnson aliamua kujificha ndani ya kanisa lililokuwa karibu. Hakukuwa na mtu yeyote ndani, hivyo aliacha nakala ya trakti Ecclesiastics Indicted ndani ya Biblia ya kasisi na katika kila kiti. Alifanya hivyo haraka sana. Bado alikuwa na muda, hivyo aliingia katika makanisa mengine mawili, na kufanya kama alivyofanya kwenye kanisa la kwanza.

Frank alirudi haraka mahali alipopaswa kukutana na ndugu wengine. Alijificha nyuma ya kituo cha mafuta, akichungulia ili kuona ikiwa wanaume wanaomtafuta watapita. Wanaume hao walipita hapo na gari, lakini hawakumwona. Muda mfupi tu baada ya wanaume hao kupita, ndugu na dada waliokuwa wakihubiri kwenye eneo la jirani walifika na gari ili kumchukua Frank, kisha wote wakaondoka.

Ndugu mmoja anakumbuka hivi: “Tulipokuwa tukiondoka katika mji huo, tulipita nje ya yale makanisa matatu. Mbele ya kila kanisa kulikuwa na watu 50 hivi. Baadhi ya watu walikuwa wakisoma trakti hizo, na wengine waliziinua juu ili kasisi wao azione. Kwa kweli, tuliondoka kwa muda mwafaka! Tulimshukuru Yehova Mungu wetu kwa kutulinda na kutupatia hekima ya kuwakwepa maadui hao wa Ufalme.”

Wanafunzi wa Biblia katika nchi nyingine walifuata mfano huo wa kuhubiri kwa ujasiri. Józef Krett aliwahubiria wahamiaji kutoka Poland waliofanya kazi kwenye migodi kaskazini mwa Ufaransa. Alipanga kutoa hotuba yenye kichwa, “Wafu Watafufuliwa Hivi Karibuni.” Mialiko iliposambazwa kwa wakazi wa mji huo, kasisi wa eneo hilo aliwaonya waumini wake wasihudhurie. Onyo lake lilikuwa na matokeo tofauti. Zaidi ya watu 5,000 walihudhuria hotuba hiyo, kutia ndani kasisi huyo! Ndugu Krett alimwalika kasisi huyo atetee imani yake, lakini alikataa. Ndugu Krett alisambaza machapisho yote aliyokuwa nayo, na alitambua kwamba watu aliowatolea ushahidi walikuwa na kiu ya Neno la Mungu.—Amo. 8:11.

Barani Afrika, Claude Brown alihubiri habari njema nchini Gold Coast, ambayo sasa inajulikana kama Ghana. Hotuba zake na machapisho aliyowaachia watu yalisaidia kusambaza kweli haraka katika nchi hiyo. John Blankson, ambaye alikuwa akisomea ufamasia, alihudhuria mojawapo ya hotuba za Ndugu Brown. Mara moja alitambua kwamba alikuwa ameipata kweli. John anakumbuka  hivi: “Kweli ilinifanya niwe na furaha sana na nilizungumza kuihusu kwa uhuru katika shule yetu ya ufamasia.”

Siku moja, John alitembelea kanisa la Kianglikana ili kumuuliza kasisi kuhusu Utatu, ambao sasa John alielewa vizuri kwamba si fundisho la Kimaandiko. Kasisi alimfukuza, na kusema kwa sauti kubwa: “Wewe si Mkristo; wewe ni wa Ibilisi. Toka hapa!”

Aliporudi nyumbani, John alimwandikia barua kasisi huyo, akimwalika aje kutetea fundisho la Utatu kwenye mkutano wa watu wote. Kasisi huyo alimwambia John aende kwenye ofisi ya mhadhiri mkuu wa shule ya ufamasia aliyosoma, ambapo mhadhiri huyo alimuuliza ikiwa kwa kweli alimwandikia barua kasisi huyo.

John alijibu hivi: “Ndiyo, niliandika.”

Mhadhiri huyo alimlazimisha John amwandikie kasisi huyo barua ya kumwomba msamaha. Hivyo, John aliandika hivi:

“Mwalimu wangu ameniomba niandike barua ya kukuomba msamaha, na niko tayari kuandika barua hiyo ikiwa utakubali kwamba unafundisha mafundisho ya uwongo.”

Mwalimu huyo alishtuka na kumuuliza, “Blankson, hivi ndivyo unavyotaka kuandika?”

“Ndiyo mwalimu. Siwezi kuandika jambo lolote lingine.”

“Utafukuzwa shule. Unawezaje kumpinga kasisi wa kanisa la serikali na utarajie kuwa mwajiriwa wa serikali?”

“Lakini, mwalimu, . . . unapotufundisha jambo fulani na kuna mambo ambayo hatuelewi, je, hatukuulizi maswali?”

“Bila shaka mnauliza maswali.”

“Hilo ndilo jambo lililotukia. Kasisi alikuwa akitufundisha Biblia na nikamuuliza swali. Ikiwa hawezi kujibu swali langu, kwa nini nilazimishwe kumwandikia barua ya kumwomba msamaha?”

Blankson hakufukuzwa shule. Na hakuna barua ya kuomba msamaha iliyotumwa.

Likizungumzia kuhusu utendaji wa mwaka huo, gazeti la The Watch Tower lilisema hivi: “Kwa kweli, kama Daudi tunaweza kusema hivi: ‘Nawe hunifunga mshipi wa nguvu kwa vita.’ (Zaburi 18:39) Mwaka huu tumetiwa moyo sana, kwa sababu tumeuona mkono wa Bwana . . . watu wake waliobatizwa . . . wamekuwa wakitoa ushahidi kwa shangwe.”

Baadaye mwaka huo, akina ndugu walifanya mipango ya kuwa na kituo kingine cha redio. Kazi ya kujenga kituo kingine cha redio ilianza karibu na jiji la Chicago. Kituo hicho kipya kiliitwa WORD. Kwa kutumia kifaa cha kurushia mawimbi cha wati 5,000, kituo cha WORD kingerusha ujumbe wa Ufalme kwa mamia ya kilomita, hata kuelekea kaskazini nchini Kanada.

Muda mfupi baadaye, katika mwaka wa 1925 kungekuwa na nuru ya kiroho yenye kusisimua, ambayo ingerekebisha uelewaji wa Wanafunzi wa Biblia kuhusu Ufunuo sura ya 12. Baadhi ya watu wangekwazwa na nuru hiyo. Hata hivyo, wengine wengi walifurahia kuelewa vizuri matukio ambayo yangetukia mbinguni na kuona matokeo ya uelewaji huo kwa watu wa Mungu duniani.