Mikutano ya utumishi wa shambani, sawa na mikutano mingine ya kutaniko, ni uandalizi kutoka kwa Yehova unaotusaidia kuchocheana katika upendo na matendo mazuri. (Ebr 10:24, 25) Inapaswa kufanywa kwa dakika tano hadi saba, ikitia ndani kupanga waandamani, kuwapa eneo, na kutoa sala. (Mkutano huo unapaswa kuwa mfupi zaidi ikiwa unafanywa baada ya mkutano mwingine.) Anayeongoza anapaswa kutayarisha jambo litakalotumiwa na wanaoshiriki huduma siku hiyo. Kwa mfano, siku ya Jumamosi kwa kuwa wengi wanaohudhuria mkutano huo hawajashiriki huduma tangu juma lililotangulia, huenda ikafaa kuzungumzia mambo tutakayosema katika huduma. Ni mambo gani mengine yenye kunufaisha yanayoweza kuzungumziwa?

• Pendekezo la kuanzisha mazungumzo kutoka kwenye Daftari la Mkutano wa Huduma na Maisha Yetu ya Kikristo

• Jinsi ya kutumia matukio au taarifa za habari za karibuni ili kuanzisha mazungumzo

• Jinsi ya kushughulikia kizuia-mazungumzo cha kawaida

• Jinsi ya kuzungumza na mtu anayeamini kwamba hakuna Mungu, anayeamini katika mageuzi, mtu anayezungumza lugha nyingine, au mshiriki wa dini ambayo si ya kawaida katika eneo lenu

• Jinsi ya kutumia sehemu fulani ya tovuti ya jw.org, programu ya JW Library^®, au Biblia

• Jinsi ya kutumia chapisho kutoka kwenye Sanduku la Vifaa vya Kufundishia

• Jinsi ya kushiriki aina fulani ya huduma, kama vile kuhubiri kwa kutumia simu, kuandika barua, utumishi wa hadharani, kufanya ziara za kurudia, au kuongoza mafunzo ya Biblia

• Vikumbusho vinavyohusu usalama, kubadilikana na hali, kuwa na adabu, kuwa na mtazamo mzuri, au jambo lingine

• Kuchunguza somo au kutazama video inayopatikana kwenye broshua Boresha Uwezo Wako wa Kusoma na Kufundisha

• Jinsi ya kumtia moyo na kumsaidia mwandamani wako katika huduma

• Andiko linalohusiana na huduma au simulizi linalotia moyo kuhusu huduma ya shambani